آئی سی سی جھانی ٹیسٹ چیمپئن شپ آسٹریلیا ءَ کٹ اِتگ

آسٹریلیا ءَ گڈی گوازی (فائنل) ءَ انڈیا پروش داتگ ءُ آئ سی سی ءِ جھانی ٹیسٹ چیمپئن کٹ اِتگ –

لندن ءِ اوول کرکٹ گوازی پٹ ءَ بوتگیں فائنل گوازی ءَ آسٹریلیا ءَ انڈیا دوسد ءُ نُھ رناں پروش داتگ –

گوازی ءَ اولسر ءَ بیٹنگ کنان ءَ آسٹریلیا ءَ چار سد ءُ شست ءُ نُھ رن جوڈ کتگ انت بلے انڈیا ءَ وتی اولی اننگز ءَ بس دوسد ءُ نود ءُ شش رن جوڈ کت کتگ –

آسٹریلیا ءَ وتی دومی اننگز ءَ ھشت وکٹانی تاوان ءَ دو سد ءُ ھپتاد رن جوڈ کتگ ءُ انڈیا ءِ دیم ءَ چارسد ءُ چِل ءُ چار ٹار گٹ اِیر کتگ –

انڈیا ءِ ٹیم ءَ پہ ٹارگٹ ءِ پروشگ ءَ گوازی ءِ چارمی روچ ءَ تاں سَے وکٹانی تاوان ءَ یکسد ءُ شست ءُ سَے رن جوڈ کتگ انت –

پنچمی روچ ءَ آسٹریلیا ءِ بالرانی دیم ءَ انڈیا ءِ یک بیٹسمینے ءَ ھم اشتات نہ کتگ ءُ سرجمیں ٹیم دوسد ءُ سِی ءُ چار رنانی سر ءَ ھلاس بوتگ انت –