زاھدان: آدینگ ءِ روچ ءَ ایرانی لشکر ءَ نُھ مردم آوار جتگ ءُ بیگواہ کتگ اَنت

روکپتی بلوچستان ءِ بنجاھی شھر زاھدان ءَ ایرانی لشکر ءَ ادینگ ءِ نماز ءَ پد نُھ ورنا دزگیر کنگ ءَ پد بیگواہ کرتگ اَنت-

روکپتی بلوچستان ءَ انسانی ھکانی واستا کار کنوکیں گل بلوچ کمپعن فعالین ءِ رد ءَ نُھ کس آوار جنگ ءُ بیگواہ کنگ بیتگ اَنت-

آوار جنگ بیتگیں مردمانی پجار سعید گورگیج ء اھمد جھمنند زاھدان، یاسر توتازئی، روح اللہ شاہ بخش، خامد خارکوھی، علی ریگی، علی زردکوھی ء خلیل، باسط کاشانی جھمنند زاھدان، مھمد صادق براھوئی ء داود جھمنند شیر آباد، الیاس ءِ ناماں زانگ بیتگ اَنت-

ھمے وڑ ءَ عبداللہ خروت، ابراھیم گورگیج ءُ حامد ھم شیر آباد زاھدان ءَ آوار جنگ بیتگ اَنت کہ ایشانی اھوال پیسر ءَ ٹی بی پی پتر ءَ شنگ ءُ تالان بیتگ اَنت-

زاھدان ءَ آدینگ ءِ روچ ءَ زھرشانی ءَ پد داں انگت ءَ آوار جنگ بیتگیں مردمانی تہ ءَ دوازدہ کسانی نام دیم ءَ اتکگ انت داں انگت ءَ بندیگ اَنت-

زانگ بہ بیت روکپتی بلوچستان ءَ بیوکیں زھرشانیاں پد اود ءَ مزنیں کساسے ءَ مردم آوار جنگ ءُ بیگواہ کنگ بیتگ اَنت-