مئی ءِ ماہ ءَ چہ بلوچستان ءَ سرتاکاں بیتگیں اھوال

بلوچستان ءَ مئی ءِ ماہ ءَ بازیں اھوالے سرتاکاں بوتگ انت کہ آھانی تہ ءَ پاکستانی پوج ءِ سر ءَ اُرش، لشکر کشی، زورانسری آوار جنگ بوتگیں بلوچ زالبولے یل بوگ، زالبولیں پدائی شاری بلوچ ءِ نماز جنازہ ءَ ھوار استانی وتکشی ءُ چہ ایران ءَ بلوچ ملایاں ڈیھ ءَ در کنگ ھوار انت –

گوستگیں ماہ ءِ گچینی اھوالانی سر ءَ چمشانک:

زورانسری اوار جنگ بوتگیں ماھل بلوچ پنچ لک کلدار ءِ دیم ءَ زمانت ءِ سر ءَ یل کنگ بوتگ – ماھل بلوچ سَے ماھاں بندیگ بوتگ – چہ شال ءَ جند ءِ گس ءَ زورانسری آوارجنی ءَ پد رند ءَ آئی ءِ دزگیری زاھر کنگ بوتگ وھدیکہ آئی ءِ سر ءَ بلوچ آجوئیں لوٹوکیں سلاہ بندیں گلانی کمک کاری ءِ بھتام جنگ بوتگ –

روکپتی بلوچستان ءَ ایرانی لشکر ءُ پوجی ٹولیانی دست ءَ مزنیں کچے ءَ ورنایانی دزگیری ءِ بگیری ءَ دگہ دھ مردم دزگیر کنگ بوتگ انت – ایران ءَ بازیں وھدے بیت بلوچ ھند ءُ دمگاں زھرشانی کنگ بوگ ءَ انت –

اے ماہ ءَ گوادر ءَ مرتگیں دیوہیکل ماھیگے دست کپتگ – بلوچستان ءِ تیاب دپی دمگ ءَ کساس چِل ءُ دو فُٹ دراجیں نیلی وہیل ماھیگے دست کپتگ – نیلی وہیل قوی البحثہ ءِ ھما ماھیگانی تہ ءَ ھوار انت کہ آھانی کچ سک باز کم انت –

آواران کولواہ ءَ بلوچ سرمچار ءُ پوج ءِ میان ءَ میڑے ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ شش باسک جنگ بوتگ انت – وھدیکہ گل ءَ دوازدہ ایس ایس جی کمانڈوزانی کوش ءِ زمہ داری منّ اِتگ – اے میڑ ءَ پیسر پاکستانی پوج ءَ چہ ڈرون ءِ سر ءَ گولہ ھم آس داتگ –

پاکستان ءِ بنجاھی پتر ءَ آرٹیکل 245 ءِ رِد ءَ بلوچستان ءَ گیشیں پوج ءِ آرگ ءِ منگ نامہ داتگ – پاکستان ءِ رسانکدرانی رِد ءَ بلوچستان سرکار ءَ پوج ءِ آرگ ءِ ھاتر ءَ ریکوزیشن دیم داتگ بوتگ –

بولان ءُ کش گوری ھند ءُ دمگاں لشکر کشی کنگ بوتگ، اے میان ءَ بلوچ آجوئی لوٹوکیں سلاہ بندیں گل ءُ پاکستانی پوج ءِ میان ءَ میڑ ھم بوتگ انت، بلوچ لبریشن آرمی ءَ زرغون، مارگٹ ءَ سَے اُرشاں پاکستانی پوج ءِ ایس ایس جی کمانڈراں ھوار دوازدہ کارمندانی کوش ءِ زمہ واری منّ اِتگ –

چہ گوادر ءَ حق دو تحریک ءِ رھشون ملا ھدایت الرحمان یل بوتگ – آ ھمے سال ءِ جنوری ماہ ءَ چہ گوادر ءِ آمیدگس ءَ دزگیر کنگ بوتگ، ہدایت الرحمان ءِ یل بوگ ءَ گوادر ءَ ھوار دگہ دمگاں وش آتکی ءِ روانک کشگ بوتگ انت کہ مزنیں کچے ءَ زالبولاں ھم بھر زرتگ –

سالے ءَ پیسر چہ ترکی ءَ دزگیر کنگ بوتگیں بلوچ نیشنلسٹ آرمی ءِ رھشون گلزار امام رسانکدر ءِ دیم ءَ آرگ بوتگ – اے درگت ءَ گلزار امام ءِ گوشگ ات کہ من ھما راہ گچین کتگ رد بوتگ – مئے جیڑہ پرایمنی ءَ گیش ءُ گیوار کنگ بنت –

چد ءُ پیسر بلوچ نیشنلسٹ آرمی ءَ وتی درشانانی تہ ءَ اے ھبر زاھر کتگ کہ پاکستانی استان گلزار امام ءَ لٹ ءُ کٹ کنت ءُ آئی ءَ بلوچ راجی زرمبشت ءِ بگیری ءَ کارمرز کنگ ءِ جھد ءَ کنت ءُ زرمبشت ءِ بگیری ءَ پندل سازی یے بندات کنت –

ایرانی سرکار ءَ چہ روکپتی بلوچستان ءَ بازیں سنی ملا چہ ڈیھ ءَ درکتگ انت ، اے ملایانی تہ ءَ عبدالعزیز عمر زئی، ملا رضا رخشانی، ملا عبدالرؤف رخشانی، ملا عبدالمجید مراد زئی ءُ ملا امان اللہ سعدی ھوار انت –

آواران ءَ پاکستانی ءِ کمک کارانی بلیک میل کنگ ءُ دلسیاھی ءَ بیزار بوتگیں پرائیویٹ وانکجاھے ءِ ماسٹر نجمہ ءَ وتکشی کتگ –

نجمہ ءِ پت دلسرد ءُ مات ءَ تربت پریس کلب ءَ گوں اھوالکاراں تران کنان ءَ گوشتگ کہ لیویز کارمنداں سرکاری ادارھانی نام گپتگ ءُ نجمہ ترسینتگ، نجمہ ءَ اے درگت ءَ مارا سرپدی داتگ بوتگ –

تربت سول سوسائٹی ءِ کنوینر ءَ آل پاٹی کیچ ءِ کنوینر غلام یاسین بلوچ ءَ گوشتگ کہ یک لیوز کارمندے ءِ تہ ءَ انچو ھمت نیست کہ آ لس مردمے ءَ دلسیاہ بہ ہنت ءُ بہ تُرسینیت چریشی ءَ آ وتکشی بہ کنت اشی ءَ پُشت الم دگہ تاکت ءِ ھست –

چینیانی سر ءَ پدائی اُرش کنوکیں بلوچ زالبول شاری بلوچ ءِ جسد کھول ءِ دست دیگ بوتگ، سیزدہ ماہ ءَ پد آئی ءِ نماز جنازہ بنکی ھنکین ءَ وانگ بوتگ –

کراچی ءَ گوستگیں سال ءں بیست ءُ شش اپریل ءَ پدائی اُرش ءَ سَے چینی جھمننداں ھوار چار مردم مرتگ ات انت، کراچی اُرش ءِ زمہ واری بلوچستان ءِ آجوئی لوٹوکیں سلاہ بندیں گل بلوچ لبریشن آرمی ءَ منّ اِتگ – جارکش جیئند بلوچ ءَ گوشتگ ات کہ اے اُرش گل ءِ مجید برگیڈ ونگ ءِ سنگت شاری بلوچ ءَ کتگ –