بلوچستان : جتاجتائیں وئیلانی آسرءَ پنچ مردم بیران بیتگ اَنت

بلوچستان ءِ جتائیں دمگ چاگی، پشین، نوشکی ءُ ھب ءَ جتاجتائیں وئیلانی آسر ءَ پنچ مردم بیران بیتگ اَنت-

گیشیں ھالانی رِد ءَ دالبندین ءَ ائیرپورٹ ءِ نزیک ءَ شمشان گھاٹ ءِ ھند ءَ چہ یک مردمے ءِ لاش دزکپتگ کہ آ دمگی نادُراھجاہ ءَ برگ بیتگ ءُ اود ءَ آئی ءِ پجّار جمیل اھمد ءِ نام ءَ چہ بیتگ-

پولیس ءِ رِد ءَ کُشگ بیتگیں لَٹ ءُ کُٹ کنگ ءَ پد تیرگواری کنگ ءُ کُشگ بیتگ، گیشیں پٹ ءُ پول دمگی واکدار کنگ ءَ اِنت-

دومی نیمگ ءَ نوشکی کلی فقیران ءَ تیرگواری ءِ آسر ءَ کامران ء شیر دل خان مینگل ٹپی بیتگ ءُ زوت نادُراھجاہ برگ بیتگ ءُ الاج ءِ وھد ءَ ٹپانی درد نہ سگگ ءَ بیران بیتگ-

ھمے وڑ پشین ءِ منزی بازار ءَ تیرگواری ءَ چہ کلیم نامیں مردمے بیران بیتگ وئیل لوگی جیڑھے گوشگ بوگ ءَ اِنت-

لاش چار ءُ ٹپاس کنگ ءَ پد کھول ءِ دست ءَ دیگ بیتگ ءُ گیشیں پٹ ءُ پول واکدار کنگ ءَ اَنت-

دومی نیمگ ءَ بلوچستان ءِ باپاری شھر ھب ءَ جمعہ گوٹھ ءِ نزیک ءَ کور ءَ لھتیں روچ کوھنیں یک مردمے ءِ بُڈاتگیں لاشے دزکپتگ- ایدھی کارداراں لاش در کتگ نزیکیں تھانہ ءَ برتگ-

وھدے کہ پلیری ءِ نزیک ءَ سے تیل کشیں گاڑیانی میان ءَ ڈک ورگ ءَ چہ یک مردمے بیران بیتگ-