تربت شھدربرجاہ : نودربرانی زھرشانی، واکدارانی نیمگ ءَ شھدربرجاہ ءِ بند کنگ ءِ جار

رزلٹ دارگ ءِ بگیری ءَ مروچی دو روچ انت کہ نودربر شھدربرجاہ ءِ مزنیں گیٹ دپ ءَ نشتگ ءُ زھرشانی انت –

گوستگیں روچاں شھدربرجاہ ءِ واکداراں اناگتی شھدربرجاہ ءِ رھبندانی پیلو نہ کنگ ءِ بھتام ءَ بی ایس ءِ لھتے نودربرانی رزلٹ داشتگ انت، نودربراں شھدربرجاہ ءِ واکدارانی بھتام نہ منّ اِتگ ءُ پیسلہ ءِ بگیری ءَ زھرشانی بندات کتگ –

اے میان ءَ بیچلر آف سائنس ءِ ھپتمی سمسٹر ءِ جنک ءُ بچکیں نودربراں زھرشانی کنان ءَ وتی کلاس یل کتگ انت –

درنگاز کنوکیں نودربراں شھدربرجاہ ءِ واکدارانی سر ءَ بھتام جتگ نودربرانی رزلٹ ھمے واست ءَ دارگ بوتگ انت کہ آھاں واکدارانی بگیری ءَ زھرشانی کتگ وتی ھمے بیر گرگ ءِ ھاتر رزلٹ دارگ بوتگ انت – نودربرانی لوٹ انت کہ ھر ھما نودربرانء رزلٹ دارگ بوتگ انت ھمے زوتاں دیگ بہ بنت –

دومی نیمگ ءَ تربت شھدربرجاہ ءَ نودربرانی زھرشانی دلگوش نہ داتگ ءُ شھدربرجاہ پنچ مئی بند کنگ ءِ جار جتگ ءُ تانکہ جاور وش بنت پدا پچ کنگ ءِ جار جنگ بیت وھدیکہ شھدربرجاہ ءِ واکدارانی نیمگ ءَ درسیں ھاسٹلانی بند کنگ ءِ جار ھم جنگ بوتگ –

نودربراں واکدارانی نیمگ ءَ شھدربرجاہ ءِ بند کنگ ءِ جار ایر جتگ ءُ گوشتگ کہ واکدار نودربرانی جیڑھاں گیش گیواری ءِ بدل ءَ تچگ انت بلے نودربر وتی لوٹانی منارینگ ءَ تاں زھرشانی ءَ برجاہ دار انت –