ھیلی کاپٹرانی کپگ ءِ تہ ءَ گیشی امریکہ ءِ لشکر ءَ پائلٹ گراؤنڈ راہ داتگ

امریکہ ءِ لشکر ءِ بالیگانی کپگ ءِ وئیلانی تہ ءَ گیشی یکشل ءَ برجاہ بیگ ءَ پد آرمی چیف آف اسٹاف ءَ پائلٹس گراؤنڈ ءَ روگ ءِ ھکم داتگ اَنت-

ھاپ سر کنوکیں ادارہ اے ایف پی ءِ رد ءَ لھتے ھپتگانی توک ءَ امریکہ ءِ لشکر ءِ چار ھیلی کاپٹر کپتگ ءُ تباہ بیتگ اَنت چریشی ءَ آ جوانیں مشنانی بھر جوڑ بوت نہ بیتگ اَنت –

پشمبے ءِ روچ ءَ دو اپاچی ھیلی کاپٹراں ٹکر وارتگ ات ءُ چریشی ءَ سے پوجی بیران ءُ یکے زدگ بیتگ ات-

دو ھپتگاں پیش ریاست کینٹکی ءَ دو بلیک ھاک ھیلی کاپٹر کپتگ ءُ تباہ بیتگ اَنت چریشی ءَ نُھ مردم مرتگ ات اَنت-

امریکہ ءِ لشکر ءِ نیمگ ءَ شنگ بیتگیں درشان ءَ گوشگ بیتگ کہ چیف آف آسٹاف جنرل جیمز میک کونویل ءَ کڈنی ھکم ءِ رد ءَ سرجمیں پاٹلٹاں دوبر ھیلکاری ءِ سرجم کنگ ءَ پد ھیلی کاپٹراں بال دات کن اَنت-

درشان ءِ رد ءَ امریکہ ءِ آرمی ءِ رسک مینجمنٹ ترس ءِ رکگ ءِ واستا، بالیگانی چار ءُ ٹپاس ءِ ھیلکاری، برزی رھبندانی ھیلکاری ءُ چیزانی چار ءُ ٹپاس ءَ کنت اِنت-

گوستگیں لھتے سالانی توک ءَ امریکہ ءِ لشکر ءِ بازیں بالیگ کپتگ بیتگ اَنت ھمے سال ءِ فروری ءِ ماہ ءَ ھیلکاری ءِ وھد ءَ یک بلیک ھاک ھیلی کاپٹرے ءِ کپگ ءِ وئیل پیش اتکگ چریشی ءَ نیشنل گارڈ ءِ دو کارندہ بیران بیتگ ات اَنت-

گوستگیں سال ءَ ناروے ءَ نیٹو ءِ ھیلکاریانی وھد ءَ وی 22 بی اوسیرے بالیگ ناگتی کوھے ءَ ٹکرے وارتگ ءُ تباہ بیتگ ات چریشی ءَ امریکہ ءِ لشکر ءِ چار کارندہ بیران بیتگ ات انت-

سال دوھزار ءُ بیست ءُ یک ءَ ٹریننگ ءِ وھد ءَ ٹی 44 سی گو شاک جیٹ بالیگ ٹیکساس ءِ جھمنندی ھند ءَ کپتگ ات چریشی ءَ نیوی ءِ دو پاٹلٹ وئیل ءَ بچ اتگ انت، پیرا شوٹ ءِ کمک ءَ آیاں دور کتگ ات –