بلوچستان ءَ پاکستانی پوج ءِ دست ءَ آوار جنگ ءَ پد زورانسری آوار جنی ءِ نشانگ کنگ بیتگیں دو مردم آجو بیتگ اَنت- دوئیں ورناھانی ھمراھی ءَ زورانسری بیگواہ بیتگیں ورناہ دروگیں میڑے ءَ کُشگ بوتگ اَنت-
گیشیں ھالانی رِد ءَ نُھ جون 2021 ءَ چہ ھُزدار ءَ پاکستانی پوج ءِ دست ءَ آوار جنگ ءَ پد بیگواہ بیتگیں لیاقت زھری گوستگیں روچ ءَ یل کنگ بیتگ وتی لوگ ءَ سر بیتگ- لیاقت زھری ءِ یل بوگ ءِ گپ بیگواھیں مردمانی کھولانی گل وائس فار بلوچ مسنگ پرسنز ءَ راست کتگ-
وائس فار بلوچ مسنگ پرسنز ءِ رِد ءَ لیاقت زھری ءُ آئی سیاد وسیم تابش یکجاہ ءَ چہ ھُزدار ءَ پوج ءَ آوار جنگ ءَ پد بیگواہ کتگ بیتگ اَنت-
زانگ بہ بیت تابش وسیم ءِ لاش گوستگیں سال اکتوبر ءَ بلوچستان ءِ دمگ ھاران ءَ دزکپتگ کہ سی ٹی ڈی ءَ آئی ءِ دگہ ارشکارانی ھمراھی ءَ دروگیں میڑے ءَ جَنَگ ءِ ٹاہ داتگ اَت-
دومی نیمگ ءَ گوستگیں سال ءَ پاکستانی پوج ءِ دست ءَ آوار جنگ بیتگیں ھُزدار نال ءِ جھمنند احمد خان ء بادر خان پندرانی ھم آجو بیتگ-
احمد خان 4 جون 2022 ءَ آئی ءِ دگہ سئے سنگت کلات ءِ جھمنند شھزاد ء خدا بخش ءُ عتیق الرحمان ء بیبرس خان ءِ ھمراھی ءَ چہ شال موسیٰ کالونی ءَ پاکستانی پوج ءَ آوار جتگ ءُ ناشناسیں جاھے ءَ برتگ-
یات بہ بیت احمد خان ءِ ھمراھی ءَ بیگواہ بیتگیں بلوچستان ءِ دمگ کلات ءِ جھمنند شھزاد ء خدابخش ءِ لاش جولائی 2022 ءَ دگہ دہ مردمانی لاشانی ھمراھی ءَ زیارت ءَ دزکپتگ اَنت کہ پوج ءَ بلوچ لبریشن آرمی ءِ بگیری ءَ لشکر کشی ءِ میان ءَ دروگیں میڑے ءَ جنگ ءِ ٹاہ داتگ-
بلے پد ءَ زیارت ءَ جنگ بیتگیں سرجمیں مردمانی پجّار پیسر ءَ چہ پوج ءِ دست ءَ بیگواہ بیتگیں مردمانی ردءَ بیتگ اَنت-