اولی بلوچ زالبولیں پدائی شاری بلوچ ءِ اولی سالروچ ءِ درگت ءَ مراگش

بلوچ لبریشن آرمی ءِ مجید برگیڈ ءُ اولی بلوچ زالبولیں پدائی شاری بلوچ ءِ نمیرانی ءِ اولی سالروچ دارگ بوگ ءَ انت- اے درگت ءَ مراگش ءَ ھوار چاگردی ترامجاہ ٹویٹر ءَ “شاری دی لیجنڈ” ءِ نام ءَ ھیش ٹیگ جنزینگ بوگ ءَ انت ءُ پہ آئی ءَ سھریں دروت ندر کنگ بوگ ءَ انت –

شاری بلوچ ءِ اولی سالروچ ءِ درگت ءَ ساز ءُ زیملی مراگش ءِ ھم جم دارگ بوتگ کہ اودا بلوچی ءُ براھوئی ءِ وش تواریں گشندہ میراحمد بلوچ، میرل بلوچ ءُ ساول کندیل ءَ بلوچی ءُ براھوئی ءِ تہ ءَ سوت گوشتگ ءُ آ دروت ندرکتگ –

دومی نیمگ ءَ چاگردی ترامجاہ ٹویٹر ءَ بلوچستان ءَ ھوار سرجمیں جھان ءِ سوشل میڈیا ایکٹوسٹ شاری بلوچ ءَ سھرچکیں دروت ندر کنگ انت ءُ آئی ءِ ستاشانی کنگ ءَ انت – وھدیکہ سندھی ءُ پشتون سوشل میڈیا ایکٹوسٹ ھم شاری دی لیجنڈ ءِ ھیش ٹیگ ءَ کارمرز کنگ ءُ آئی ءِ جھد ءَ ایردستیں راجانی ھاتر ءَ پہ بنھشت گوشگ انت –

زانگ بہ بیت گوستگیں سال ءِ اپریل ماہ ءَ جامعہ کراچی ءَ وتکش کنوکیں زالبولے ءَ کنفیوشس انسٹیٹوٹ ءِ باسکانی گاڑی ءِ سر ءَ تراک ءِ کتگ ات کہ چریشی ءَ سَے چینی جھمننداں ھوار چار مردم مرتگ ات ءُ سَے زدگ بوتگ اِتاں –

کراچی ءَ بوتگیں اُرش ءِ زمہ واری بلوچ آجوئی لوٹوکیں سلاہ بندیں گل بلوچ لبریشن آرمی ءَ منّ اِتگ ات ءُ گل ءِ جارکش جیئند بلوچ ءَ وتی درشان ءِ تہ ءَ گوشتگ ات کہ اے کار بی ایل اے ءِ مجید برگیڈ ءِ اولی بلوچ زالبولیں پدائی شاری بلوچ پنام ءِ برمش بلوچ ءَ کُتگ –