شال ءِ نادراھجاہ ءَ پوج ءِ آؤرتگیں ھرسَئیں جونانی پجار کنگ بوتگ اَنت

بلوچستان ءِ بنجاھی شھر شال ءَ پاکستانی پوج ءِ آؤرتگیں ھر سَئیں جونانی پجار کنگ بوتگ اَنت کہ ھر سَئیں مردم بلوچستان ءِ جتا جتائیں ھند ءُ دمگاں پاکستانی پوج ءِ دست ءَ زورانسری آوار جنی ءَ پد بیگواہ کنگ بوتگ انت –

پاکستانی پوج ءِ دست ءَ زورانسری آوار جنی ءَ پد بیگواہ ءُ پد ءَ زندانانی تہ ءَ نمیران کنگ بوتگیں مردمانی تہ ءَ یکے ءِ پجار گلام فرید شاھوانی جھمنند مستونگ سور کاریز نام ءَ بوتگ کہ آ سال دوھزار یُ بیست ءُ دو ءِ اگست ءِ ماہ ءَ پاکستانی پوج ءَ زورانسری آوار جتگ ءُ بیگواہ کتگ – دومی ءِ پجار عظیم خان ء یار خان مری جھمنند ھرنائی نشپا کہ آ مالدارے بوتگ ءُ ھمے سال ءَ دوھزار ءُ بیست ءُ سَے ءِ بیست ءُ یک مارچ ءَ پاکستانی پوج ءَ ھما وھد ءَ زورانسری آوار جتگ ءُ بیگواہ وھدیکہ آ شال تاں ھرنائی ءَ رؤگ ءَ بوتگ –

شال ءِ نادراھجاہ ءَ سر کنگ بوتگیں سیمی جون ءِ پجار حضرت سمالانی ء محمد خان جھمنند سنجل گربوک ءِ نام ءَ بوتگ کہ آ پاکستانی پوج ءَ ھمے سال ءِ بیست ءُ سَے مارچ ءَ چہ ھرنائی ءَ زورانسری آوار جتگ ءُ بیگواہ کتگ –

پاکستانی پوج ءَ ھر سَئیں مردمانی جون دو روچ ساری بزاں چارشمبے ءِ روچ ءَ آؤرتگ ءُ نادراھجاہ ءَ سرکتگ انت – اھوالکارانی رِد ءَ ھرسَئیں مردمانی جان ءَ تیرانی ٹپ پر انت –

زانگ بہ بیت بلوچستان ءَ اے داب ءَ مردمانی جنگ ءُ دور ءُ پد ءَ آیانی سر ءَ دروگیں جنگ ءِ نام دیگ پیش ءَ ھم بیتگ اَنت ءُ پد ءَ آ مردم بندیگیں مردمانی ناماں پجار بیتگ اَنت-

دومی نیمگ ءَ بیگواھیں مردمانی کھولاں باندا عید ءِ روچ ءَ تیوگیں بلوچستان ءَ زھرشانی روانک کشگ ءِ جار پرینتگ اَنت ءُ اے درگت ءَ شال، ھزدار، تربت ءُ گوادر ءُ دگہ دگہ جاھاں روانک کشگ ءِ جار جنگ بیرگ اَنت-