آؤکیں راھشوناں ھمے سلاہ ءَ دیگ لوٹ آں کہ آ ھمک دو سال ءِ بنجاھی لس مجلس ءَ بی ایس او ءَ دو گام گیش دیم ءَ برگ ءِ ھاتر ءَ کار بہ کن انت ءُ پہ بی ایس او ءَ آشوبی پالیسی اڈ بہ دینت- ابرم بلوچ
بلوچ نودربر گل آزاد (BSO Azad) بیست ءُ سیمی بنجاھی لس مجلس ءِ نیاد بیاد لمہ ء وتن بانک کریمہ بلوچ ءُ بلوچ نمیران ءُ بنام بیگواھیں بلوچانی یات ءَ مروچی اولی روچ برجم دارگ بوتگ ءُ مروچی بزاں 17 اپریل دوشمبے ءِ روچ ءَ بلوچ نمیرانانی یات ءَ دو دمان ءِ بے تواری ءُ گوں بلوچ راجی سوت ءَ گل ءِ بنجاھی لس مجلس ءِ نیاد بندات کنگ بوتگ –
بی ایس او آزاد ءِ بیست ءُ سیمی بنجاھی لس مجلس ءِ دیوان ءِ مروچی اولی روچ ءَ بنجاھی سرکماش ءَ تران کُتگ ، آئین سازی، سیکٹری اھوال ءُ تنقیدی نشست ءِ سرھالانی سر ءَ کونسلرانی میان ءَ گوں دلجمی ءَ باوست کنگ بوتگ-
بنجاھی لس مجلس ءِ اولی سرھال بنجاھی سرکماش ءِ تران بوتگ کہ آزاد ءِ سرکماش ابرم بلوچ ءَ گوں دیوان ءَ تران کتگ ءُ گوشتگ کہ باز وشی ءِ گپے کہ بی ایس او ءِ باسک چوشیں نگیگیں جاوراں سرجمیں امیتے ءِ گوم ءَ چہ ھر وڈیں جنجالانی تہ ءَ گوستگ انت ءُ گل ءِ نیمگ ءَ اڈّ داتگیں دیوان ءَ وتی ھر شے یلا داتگ ءُ اد ءَ ساڑی اَنت – بلوچ ڈیھ دوستی ءِ اے مزن شانیں لیکہ ءِ بنیاد ءَ سپرکنوکیں اے دیوان ءِکلیں سنگتاں وش اتک گش آں کہ آھاں نہ تھنا دژمن ءِ اے مَڑاہ ءَ را گوں ھاکاں ھوار کت کہ آ چہ گوستگیں دو دھکاں بی ایس او ءِ نزور ءُ ھلاس کنگ ءِ کوشست ءَ انت بلکیں ھما دراھیں رد آشوبی تاکتاں اوں ھمے پیش داشتگ ات کہ آ مدام بی ایس او آزاد ءِ مزن شانیں پگر ءُ لیکہ ءُ آئی ءِ امل ءُ ترزکارانی سر ءَ کِچہ چینی کن انت ءُ بی ایس او ءِ بے سوبی ءُ آؤکیں باندات ءَ آئی ءِ ھلاس بوگ ءِ گپ ءَ کن اَنت – من مرچی بی ایس او ءِ آشوبی کیڈرانی ساڑی بوگ ءِ بستار ءَ آھاں ھمے کلوہ ءَ دیگ لوٹ آں کہ بی ایس او انچوش کہ مرچی مھکم انت آئی ءِ درور نیست انت، بی ایس او بلوچ راجمان ءُ جنز ءِ تہ ءَ ھما بدلیاں کہ آرگ ءَ انت آ آؤکیں باندات ءَ راجی آجوئی ءِ مانزمانی ءِ سوب جوڑ بنت –
سرکماش ابرم بلوچ ءَ گشتگ کہ مارا وتی لٹریچر ءُ وانگءِ بستار ءِ تہ ءَ بدلی آرگ لوٹ ایت ، چہ گوستگیں بیست سالاں ما یک انچیں لٹریچرے وانگ ءَ ایں کہ آ استیں وھد ءَ بے مانا انت – بلوچ ورنا چہ گوستگیں بازیں سالاں انچیں جنز ءُ مردماں وانگ ءَ انت کہ آھانی راج مرچی یا وَ گلام انت یا کہ آجوئی ءِ گرگ ءَ پد وتی بانداتے ءِ جوڑ کنگ ءَ سرجم بے سوب بوتگ انت- پمیشکہ استیں وھد ءِ لوٹانی بنیاد ءَ بلوچ ورناہانی واست ءَ المی انت کہ آ ھما راج ءُ مردماں بہ وان انت کہ آھاں نوکیں زمانگ ءَ وتی راجان ءَ وشھالیں زند بکشاتگ-
اسرائیل ءِ ڈولیں سوبمندیں استان کہ آئی ءِ آبادی یک کروڑے ءَ برز اِنت، مرچی دنیا ءِ تاکتورتریں استان ءُ عرب ملکانی یکشلیں مزن مزنیں ارشاں ابید مھکمیں شکلے ءَ ساڑی اِنت، چوشیں استاناں دژمن سرپد بوگ ءُ وانگ ءِ بدل ءَ آئیڈیل جوڑ کنگ ءُ وانگی انت کہ آھاں کسانیں مدتانی نیام ءَ چے پیمیں نیزگاریں یہودیان ءَ چونیں مزنیں تاکتے بکشاتگ – ھمے پیم انگریز ءِ دزچیر ءِ زلم آماچیں چین ءَ را ماؤ ءَ کجا چہ کجا سر کنت کہ مرچی آ دنیا ءِ مزنیں تاکتاں ءَ چم پیشدارگ ءَ انت ءُ وت وتی ایردستیں دمگ جوڑ کنگ ءِ جھد ءَ اِنت – مارا چہ زورآور ءُ ایردست ءِ سرھال ءَ درآیگ ءُ بلوچ راجی پائیدگانی ھک ءَ جیڑگ ، پگر کنگ ءُ امل کنگ ءِ درکار اِنت – یورپ ءَ سرجمیں دنیاءِ تہ ءَ ھزاراں جنگ کت ءُ کروڑانی ھساب ءَ مردم کُشت انت بلے مرچی آ مردمی ھکانی چیمپئن سر ءَ پھر بندیت – بلوچ یک مزنیں تاکتے ءِ گوما پہ وت ءَ چیزے کت کنت ، چہ گوستگیں سے سد سالاں ما ھرچی کہ ببا داتگ راجی جنز ءِ نزوری ءُ پروش ورگ ءِ شکل ءَ استیں جاوراں چہ بدتریں جاورانی دیمپان بوگی انت – ھما راج کہ اے دمگ ءَ نوری نصیر خان ءِ سروکی ءَ چہ درستاں مستریں تاکتے ءِ واھند اَت، مرچی کجام شے ءُ بے سوبیانی سوب انت کہ پرے ھال ءَ اِنت، ایشی ءِ سر ءَ بلوچ ورنایاں پگر کنگ ءُ جیڑگ لوٹ ایت – یک مزنیں تاکتے ءِ گوما ما چہ مردمی اگبالاں بگر تاں ایندگہ زِر ءُ مڈیانی سر ءَ وتی واک ءُ دزرسے ایر کت کن اِیں –
آئی ءَ گوشتگ کہ بی ایس او بلوچ راجی جنز ءِ وانگجاہ اِنت کہ اود ءَ بلوچ ورنا ءُ گوں جنز ءَ ھمگرنچیں تمردیں سنگت وتی پگر ، ھیال ءُ لیکھاں وان انت ءُ پہ جنز ءِ ھاتر ءَ وتی تواناں بکشاینت – بلوچ راجی جنز ءِ وانگجاہ ءِ بستار ءَ بی ایس او آزاد ءِ کلیں مراگش ءُ چست ءُ ایر پہ بلوچ راجی جنز ءُ جھد ءِ مھکم کنگ ءِ ھاتر ءَ بہ بنت – بی ایس او ءِ ھستانکی ءِ سیادی چہ بلوچ راجی جنز ءَ زانگ بیت – بلوچ راجی جنز ھرچی گیش کہ مھکم ءُ پراہ شاھگان بیت بلوچ راجمان ءَ بی ایس او ءِ کرد ھمینکس گیش شاھیگان بیت – بی ایس اوءَ را یک بنکی درسگاہ ءِ (اسکول)ءِ بستار ءَ بلوچ راجی جنز ءِ پکر ءَ ورنایانی تہ ءَ مھکم ءُ گیش کنگ ءِ ھاتر ءَ پروگرام ءُ پالیسی اڈ دیگی انت-
سرکماش ءَ دیمتر ءَ گوشتگ کہ بلوچ راجی جنز ءَ گیش مھکم ءُ برجاہ دارگ ءِ ھاتر ءَ بلوچ ورنایاں پرز ءُ زمہ واری ءِ میان ءَ تپاوت سرپد بوگی انت – بلوچ ورنا پرز ءِ پیلو کنگ ءِ نام ءَ راجی جنز ءِ ھاتر ءَ تھنا ربیتی کرد پیلو مہ کن انت بلکیں بلوچ راجی آجوئی ءِ جھد ءَ مھکم ءُ برجاہ دارگ ءِ ھاتر ءَ مزنءَ چہ مستریں زمہ واری ءِ بار وتی کوپگاں بہ کن انت – وھدے کہ یک ایردستے جنگی جاورانی آماچ بیت ، آئی ءِ سر ءَ زورآور ءُ زالمیں استانے ءِ کبزہ بیت گڑا آ راج ءِ ورنا تھنا ربیت ءِ بنیاد ءَ وتی پرزانی پیلو کنگ ءِ بنیاد ءَ راجی جھد ءَ را آسرے دات نہ کن انت، بگندئے آھاں راجی جھد ءَ را تاں منزلے ءَ رسینگ ءِ ھاتر ءَ مزنیں زمہ واری وتی کوپگاں کنگ لوٹ ایت۔ اے وھداں بلوچ راجی جنز چہ دژمن ءِ نیمگ ءَ مزنیں چیلنجانی دیپمان انت ءُ دومی نیمگ ءَ چین ءِ ڈولیں میان استمانی تاکت بلوچ راجی جنز ءِ ھلاپ ءَ دیم ءَ اتکگ انت ءُ اے جنگءَ آ سرجم ءَ پاکستان ءِ ھمکوپگ انت، آ نہ تھنا زر ءُ مالی بنیاد ءَ بگندئے ٹیکنالوجی ءُ دگہ وسیلھاں چہ چین ءِ ڈولیں زورگیریں استانانی کمک گون انت – چوشیں جاوراں بلوچ ورنا تھنا ربیتانی پیلو کنگ ءِ بنیاد ءَ راجی جھد ءَ ھچ دات کت نہ کن انت، بلکیں آھاں گوں جنز ءَ ھمگرنچیں ھاسیں زمہ واری زورگ ءُ دیم ءَ روگی انت ءُ راجی جنز ءَ را گیش مھکم کنگ ءُ برجاہ دارگ ءِ ھاتر ءَ وتی تواناں ھرچ بہ کن انت-
نودربرگل ءِ کماش ابرم بلوچ ءَ گوشتگ کہ استیں جاوراں لائک ءُ بودشتی ئیں ورنا راجی جنز ءَ مھکمیں دابے ءَ دیم ءَ برت کن انت ءُ دژمنءِ دیمءَ آئیءِ مکابلہ ءِ تاکت جوڑ کت کن انت، پمیشکہ بلوچ ورنا ءُ ھاسکار گوں بی ایس او آزاد ءَ بندوکیں ورنایاں لوٹ ایت کہ آ راجی سما ءُ پگر ءِ ھمبرائی ءَ وتی بودشتانی سر ءَ اوں کار بہ کن انت ، ءُ ورنا کجام اوں پیلڈے ءَ زان انت کہ ما گیش دزرس دار یں گڑا ھما پیلڈ ءِ نیمگ ءَ برو انت ءُ آوکیں وھد ءَ ھما پیلڈ ءِ بنیاد ءَ راجی جنز ءَ وتی کرد ءَ پیلو بہ کن انت – اے لائک ءُ بودناکیں مردمانی کرن انت، ھما ورنا کہ پہ بلوچ راجی جنز ءِ ھاتر ءَ وتی ساہ ءُ جانانی دیگ ءَ جاڑیگ بوت کن انت گڑا پرایانی ھاتر ءَ وتی بودشتانی سر ءَ کار کنگ اوں گرانیں کارے نہ بیت، پمیشکہ اے ھیال ءِ سر ءَ گیش دلگوش دیگ بہ بیت کہ بلوچ ورنا جزبات ءُ گوں جنز ءِ دلی ھمگرنچی ءِ ھمبرائی ءَ جنز ءِ جتائیں تک ءُ پھناتاں گیش مھکم کنگ ءُ جنز ءِ برجاہ دارگ ءِ ھمبرائی ءَ وتی بودشتانی سر ءَ دلجمی ءَ کار بہ کن انت ءُ آھاں استیں دور ءِ لوٹانی بنیاد ءَ اڈ بہ دینت ، تاکہ یک مھکمیں جنزے دیم ءَ بئیت انت-
آئیءَ گشتگ کہ وھد ءِ ھمبرائی ءَ بلوچ راجمان ءَ رد آشوبی تاکت ھمک روچ ءِ بنیاد ءَ سرکشان ءُ مھکم بوان انت ءُ راجمان ءِ تہ ءَ آھانی روشت ردیں سان پیداک کنگ ءَ انت، پمیشکہ بلوچ ورنا ھاسکار بی ایس او آزاد ءَ لوٹ ایت کہ آ انچیں ریڈیکل لٹریچر آنی پجار ءَ بہ کنت کہ آ استیں جنز ءِ لوٹ انت۔ اے رد آشوبی تاکتانی ردیں روشتانی ایرجیگ کنگ ءِ ھاتر ءَ بی ایس او آزاد ءَ را یک مھکمیں ریڈیکل لٹریچرے ودیگ کنگی انت تاکہ آ ھمے ردیں روشتاں ایرجیگ کت بہ کنت- ما ایشی ءَ را وتی بدکسمتی بہ گشیں یا کہ نازانتی بلے مئے میان ءَ چوشیں مردم مدام ھست بوتگ انت کہ وتی زاتی لوٹانی نہ رسگ ءُ وتی واھشتانی ناسرجمی ءِ سوب ءَ مدام گل ءُ جنز ءِ ھلاپ پاد اتکگ انت – چوشیں نپر پہ جنزانی واستہ مزنیں تاوانانی مانزمان بنت کہ آ تھنا پہ وتی دلی واھشتانی پیلو نہ بوگ ءُ وتی دوستی ءُ نادوستی ءِ بنیاد ءَ جنز ءُ گلءِ ھلاپ بنت ءُ انچیں چست ءُ ایراں دیم ءَ کاینت کہ آھانی ردیں سان جنز ءِ سر ءَ کپ انت پمیشکہ چوشیں روشت ءُ ردیں چست ءُ ایرانی کاؤنٹر کنگ ءِ ھاتر ءَ بی ایس او آزاد ءِ نیمگ ءَ بلوچ ورنایاں یک مھکم ءُ ریڈیکل لٹریچرے سرکنگی انت کہ آ راستیں بنیاد ءَ بلوچ ورنایانی پگری ھیلکاری ءَ بہ کنت –
کماش ابرم بلوچءَ گشتگ کہ پہ بی ایس او آزاد ءِ ھاتر ءَ کلیں گل ءُ پارٹیانی مزنیں ارزشت ءُ اھترامے کہ آ گوں راجی آجوئی جنز ءَ ھمگرنچ انت، بی ایس او آزاد ءِ آوکیں راھشوناں لوٹ ایت کہ آ بلوچ جنز ءِ تہ ءَ یک انچیں روشتے پیداک بہ کن انت کہ آئی ءِ سیادی چہ ھچ پیمیں ھاسیں مردم یا کہ ٹولی ءَ مہ بیت بلکیں آ روشت مچانکی بستار ءَ کلیں جنز ءِ ھاتر ءَ بہ بیت – بی ایس او آزاد بلوچ راجی جنز ءَ وانگجاھے ءِ بستارے دار ایت، پمیشکہ یک وانگجاھے ءِ بستار ءَ بی ایس او ءَ را وتی کلیں توان تھنا راجی جنز ءِ مھکم کنگ ءُ برجاہ دارگ ءِ ھاتر ءَ دیگ لوٹ انت – بی ایس او یک گلے ءِ بستار ءَ ھچ پیمیں مخصوصیں گل ءُ پارٹی ءِ جھگیر نہ انت بلکیں بلوچ ورنایانی نیام ءَ راجی جنز ءَ گوں ھمگرنچیں کلیں پارٹی ءُ مچانکی بستار ءَ جنز ءِ جھگیریں گلے – ھمے سوچ ءِ گوما بی ایس او گیش مھکمیں رنگے ءَ کار کت کنت ءُ وتی دلگوش ءَ گھتریں ترزکارے ءَ پہ جنز ءَ دات کنت –
بلوچ بودربر گل ءِ سرکماش ابرم بلوچ ءَ گل ءِ بیست ءُ سیمی بنجاہی لس مجلس ءَ گوں بی ایس او ءِ کیڈرزاں گیش تران کنان ءَ گشتگ کہ بلوچ ورنا دژمن ءَ را یک ھاسیں اینگل ءُ ترزکارے ءَ وانگ ءِ بدل ءَ آئی ءَ جتائیں ڈسکورس ءُ اینگلانی بنیاد ءَ وانگ ءِ کوشست ءَ بہ کن انت ءُ ھمے درچ ءَ راجی جنز ءَ اوں ھمے دروشم ءَ گیش مھکم کنگ ءُ برجاہ دارگ ءِ جھد ءَ بہ کن انت۔ یک ھاسیں اینگل ءُ ترزکارے ءَ دژمن ءِ وانگ ءُ آئی ءِ چار ءُ بیچار کنگ پہ ورنایانی باندات ءَ ترسناک انت چیا کہ استان اے وھداں یک ھاسیں ترزکارے ءَ بلوچ جنز ءِ ھلاپ ءَ سرگرم نہ انت بگندئے آ مرچی سدانی ھساب ءِ ترزکارانی بنیاد ءَ راجی جنز ءَ را ایرجیگ کنگ ءِ ھاتر ءَ جھد ءَ انت ءُ ھمک روچ ءِ بنیاد ءَ گیشیں ترزکاراں گوں گندگ ءَ پیداک انت، پمیشکہ بلوچ ورنایاں لوٹ ایت کہ دژمن ءِ جتائیں دروشم ءُ ترزکاراں بہ وان انت ءُ پدا جنز ءَ را ھما ترزکارانی بنیاد ءَ جتائیں شوربندیانی بنیاد ءَ مھکم بہ کن انت- گوں جنز ءَ بندوکیں مردمانی گوما اے چیز باز ارزشت دار ایت کہ آ نوکیں جاورھال ءُ سائنسی دور ءِ لوٹاں سرپد بہ بنت ءُ ھمے سوچ ءُ پگر ءِ جھد ءِ مھکم کنگ ءِ ھاتر ءَ دلگوش بہ دینت کہ آئی ءِ گھتریں آسر دیم ءَ بیا انت –
گڈسر ءَ بی ایس او ءِ سرکماش ابرم بلوچ ءَ وتی گوشتگ کہ من گل ءِ آؤکیں راھشوناں ھمے سلاہ ءَ دیگ لوٹ آں کہ آ ھمک دو سال ءِ بنجاھی لس مجلس ءَ بی ایس او ءَ دو گام گیش دیم ءَ برگ ءِ ھاتر ءَ کار بہ کن انت ءُ پہ بی ایس او ءَ آشوبی پالیسی اڈ بہ دینت ءُ ھمایانی بنیاد ءَ کار بہ کن انت۔ بی ایس او ءَ را آشوبی امل ءُ راھبندانی بنیاد ءَ ورنا امل ءِ بھر کنگی انت کہ آھانی امل گھیں آسرے بہ دنت ، ھما آسر کہ آئی ءِ امیت ءَ بی ایس او ءُ گوں بلوچ راجی جنز ءَ بندوکیں مھلوک کنگ ءَ انت-
لس مجلس ءِ دومی ایجنڈا “راھبند” (بزانکہ آئین سازی) اَت۔ گوستگیں بنجاہی مزن کارگشاد مہرزاد بلوچ ءَ راھبندی کمیٹی ءِ اھوال پیش کت انت ءُ چہ کونسلرانی نیمگ ءَ جتائیں سلاہ ءُ شورانی دیگ ءَ پد راھبند ءِ شکانی تہ ءَ آؤرتگیں مٹّی ءُ بدلی ءُ کمی ءُ گیشی چہ بنجاھی لس مجلس ءِ کونسلرانی اکثریت ءِ منگ ءَ پد راھبند ءِ بھر کنگ بوت انت – دیوان ءِ سیمی ایجنڈا “کارگشادءِ دو سالی اھوال” اَت۔ کہ بنجاہی مزن کارگشاد مہرزاد بلوچ ءَ گوستگیں دو سالی کلیں اھوال بنجاھی لس مجلس ءِ دیم ءَ پیش کت اَنت ءُ آھانی سر ءَ باوست کنگ بوت ءُ دیوان ءِ مرچی ئیں روچ ءِ گڑی ءُ چارمی ایجنڈا شرگداری اَت کہ آئی ءِ سر ءَ کلیں کونسلراں گوستگیں گل ءِ کار ءُ کرد ءُ پرگرامانی سر ءَ وتی وتی نگدی ھیال درشان کت انت۔ بنجاھی لس مجلس ءِ ایدگہ پشت کپتگیں بنگپانی سر ءَ دیمی روچاں باوست کنگ بیت اِنت –