نبشتانک: لالا منیر ءِ کرد زندگ دارگی انت
نبشتہ کار: فاطمہ بلوچ
دی بلوچستان پوسٹ
ھَمُک انسان گوں یک جتائیں دروشمے ءَ جتائیں تبے ءِ پجیگ ءَ یک چاگردے ءِ توک ءَ ودی بیت ءُ رند ءَ چنچو کساس دگری وتی توک ءَ کار ایت یاں کہ وت ءَ مُھکم دارگ ءَ سوبین بیت آ وھد ءِ ھمرائی ءَ پدر بنت مئے میان ءَ اے پیمیں بازیں درور گندگ ءَ کیت کہ آھانی زند چہ ایدگہ مھلوک ءَ جتا بیت بزان کہ آرزان نہ بیت ءُ آھانی مرگ ھم گرانیں مرگے بیت اِنت ۔
ماں بلوچ چاگرد ءِ توک ءَ ھزاراں چشیں مردم گِند ایں کہ جنگ ءِ توک ءَ زندگی کن اَنت وت ءَ را مُھکم دار اَنت بے کساس کربانی دے اَنت ءُ وتی جان ءَ بباہ دے اَنت بلے لھتے انچیں درور ھم گندگ ءَ کیت کہ آھانی زندگی ھم جنگجاھے ءَ گوز ایت ءُ مرگ ءَ رند ھم آھانی جنگ ھلاس نہ بیت اِنت ۔
بلوچ راج یک نسلے ءَ چہ نہ انت یک زبانے ءَ چہ نہ انت بلے مُھکیں دودے ءِ واھند انت اے زمین ءِ واھند انت ایش گپ ءِ کنگ ءُ پھر بندگ ارزان انت بلے ھمایاں کہ اے جنگ ءِ نوبت گوازینتگ انت جُست گرگ بہ بنت یا پُشدر زانگ بہ بنت یا کہ آھانی سرجمیں زند وانگ بہ بیت ءُ ھمیش مھکمی در برگ بہ بیت گڑا آشوب ءُ گھگیری لبز ءِ گُشگ ھم ارزان نہ بنت ایشانی وانگ دربرگ ءُ وتی سر ءَ کارمرز کنگ دور ءِ گپے۔ قاضی انچش نہ گُشتگ “کبر نصیب نہ بوتگ گِس آنی واھُند آں “۔
آشوب بہ بیت یاں کہ گھگیری بندات چہ وت بہ بیت ایشی ءِ یک بلاھیں درورے لالا منیر انت کہ وت ءَ را مھکم داشتگ ئِے استان ءِ ھلاپ ءَ جنگ ئِے کتگ چاگرد ءِ سر ءَ بیوکیں زُلمانی ھلاپ ءَ جنگ ئِے کتگ ءُ بگندے وت ءَ را بلوچ منارینگ ءِ ھاتر ءَ ھم جنگ ءِ کتگ وتی مرگ ءَ چہ پیش ھمک درد تکلیپے برداشت کتگ ،مرگ ءِ ساھتاں ھم برداشتے کُتگ ءُ بگندے مرگ ءَ رند آئی ءِ ارواہ ھم یک مدامی ئیں جنگے ءِ توک ءَ انت ءُ اے جنگ لالا ءِ زند ءِ جنگ ءَ چہ گیش گران تر انت کہ لالا ءِ ارواہ زبانی تپاوت ،نسلی ءُ (علاقائی)ھندی تپاوت ءِ دروشم ءَ مروچی بلوچ چاگرد ءِ توک ءَ گندگ ءَ انت ۔ اے گپاں من لالا ءِ گون ءَ چیا گیش جوڑینگ ءَ آں؟ ایشی ءِ سوب ھمیش انت کہ لالا ھما بلوچ جہمھد کار بوتگ کہ مھلوک ءِ گپ ءُ ھبرانی پروش دیگ ءِ ھاتر ءَ بلوچ ءِ ھما ھند ءَ سیاست ءِ کتگ کہ آ ھند ءَ لالا ءِ پیمیں بلوچ کدی بلوچ لیکگ نہ بوتگ انت یا کہ کم لیکگ بوتگ انت گڑا لالا ءَ اے تپاوت ءِ ھلاس کنگ ءِ ھاتر ءَ وتی جان کربان کتگ ءُ بلوچ ءِ یک نسل نہ بوگ ءِ گواھی یے داتگ –
لالا بلوچ جھد ءِ یک مھکمیں سپاھی یے بوتگ کہ پارٹی سیسٹم ءَ وتی ھنداں بے ھیال کنگ ءِ سِتک ءَ دار ایت ءُ وتی گڈی ساھتاں تاں پارٹی ءَ مھکم کنگ ءِ جھد ءَ کنت ، لالا ھما مردم ءَ چہ یکے کہ بلوچ مھلوک ءَ گوں وت اوار برگ ءُ چاگردی سیاست کنگ ءِ دروشم ءَ مٹ کنگ ءِ واھشت ءَ دار ایت ۔ لالا ءِ جھد ءِ برورد انت کہ بلوچ مھلوک مروچی سرپد انت کہ بلوچ سرڈگار ءِ سر ءَ بؤکیں اے جنگ ءِ سوب چی انت ءُ سرڈگار ءِ ھاتر ءَ جنگ کنگ چیا لازمی انتءُ لالا ءِ امل ءُ شھادت ءَ پد اے گپ مھلوک ءِ تھ ءَ پدر بوتگ کہ بلوچ ءِ جنگ جزباتی جنگے نہ انت نہ کہ اے جنگ یک ھندے، یک نسل، یک زبانے ءِ مھلوک ءِ انت اے جنگ بلوچ ءِ جنگ انت پہ بلوچ ءِ سرڈگار ءَ بوگ ءَ اِنت-
لالا ءَ وتی زند پہ بلوچ ءِ جنگ ءِ سرپدی دیگ ءَ گوازینتگ ءُ لالا ءَ بلوچ مھلوک ءَ راھ ءِ جنزگ ءِ وڑ ءُ ڈول سوج داتگ انت کہ اے گرانیں راھانی مساپر سپر چون کن انت بگندے ھمیش سکین ریاست ءِ واستا سردرد اِنت کہ لالا ءِ پیم جنزگ گران انت بلے مھلوک ءَ لالا ءِ وڑ ءُ پیم وتی کتگ ات انت ،بلوچ ءَ لالا منیر “لالا” ءِ پنام داتگ ات ءُ لالا ءَ بلوچ ءِ اے پنام شرپ بکشاتگ گوں وتی مھکی ءَ لالا مرگاپ ءِ ھما نمیرانیں سر ءَ آوار انت کہ کجا ھم پارٹی ءِ نام گرگ بہ بیت لالا ءِ نام الم کیت انت-
لالا نمیران انت ، لالا ءِ مکسد ستک ءُ ایمان ھم نمیران انت بلے لالا ءِ جھد ءِ دیم ءِ اڑاند ھلاس کنگی انت ھما اڑاند کہ لالا ءِ ارواہ ءِ واستا گرانی پیداگ کنگ ءَ انت ھما تپاوت کہ لالا ءِ بلوچیت ءِ سر ءَ سوال چِست کنگ ءَ انت ھما کینگ ھلاس کنگی انت چیا کہ لالا ءَ وتی امل ءُ ھون ءَ گوں زاھر کتگ “ بلوچ کے انت ءُ کے نہ انت “۔
مروچی بلوچ جھد ٹیکنیکل کنگی انت زبانی نسلی ھندی تپاوت ءَ چہ بلوچ جنگ در اتکگ ءُ مھکمی ءِ نیمگ ءَ رپتگ گڑا ایش جنگ ھمیش پیم برجاہ دارگی انت مھکم دارگی انت لالا ءِ نمیرانیں جھد ءِ پیم اِنت۔
مروچی بلوچ راج ءِ توک ءَ پارٹی سسٹم ءُ ایشی ءِ ارزشت ءِ دیم ءَ آرگ المی انت چیا کہ پارلیمانی سیاست مئے مھلوک ءَ توک ءَ چہ ورگ ءَ انت مروچی مھلوک واپس پارلیمانی پارٹیانی پندلانی آماچ انت ءُ جیڑگ ءِ امل ءِ دیم ءَ کسانی نوکری ءِ پُشت ءَ کپتگ۔ مروچی مئے چاگرد بازیں پندلانی آماچ انت کہ ایشانی توک ءَ مسیتانی گیشی ، پرائوئٹ اسکول ءَ اکیڈمیانی سی ایس ایس ءِ نیمگ ءَ مھلوک آں برگ ، نشہ عام کنگ توکہ بلوچ سیاست نہ بوگ ءِ سوب انت کہ مھلوک ایش پندلانی آماچ بوگ ءَ انت ءُ گِر ءُ دار نیست ۔
اے پندلانی اوشت ءِ واستا الم انت کہ لالا ءِ جھد ھما ھند آں زندگ دارگی انت کہ لالا ءَ جھد کتگ ءُ وتی جان ببا داتگ ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔