زاھدان: تیرگواری ءَ یک مردمے بیران، ءُ یکے چات ءُ چگل دیگ ءُ کشگ بیتگ

سر بیتگیں ھالانی رد ءَ روکپتی بلوچستان ءِ بنجاھی شھر زھدان ءَ یک مردمے تیرگواری کنگ ءُ کشگ بیتگ ءُ دگہ یکے ءِ لاش ماں چاتے ءَ دزکپتگ-

ھالانی رد ءَ زاھدان ءَ ناشناسیں مردماں تیرگواری کنان ءَ یک مردمے کُشتگ-

کُشگ بیتگیں مردم ءِ پجار مھمد امین براھوئی ء مھمد انور ءِ نام ءَ زانگ بیتگ –

وئیل زاھدان ءَ چُکانی پارک ءِ نزیک ءَ گوستگیں روچ ءِ نیمروچ ءَ پیش اتکگ کہ اود ءَ ناشناسیں مردماں تیرگواری کنان ءَ امین براھوئی کشتگ-

کوشکاراں کُشگ ءَ پد تتکگ ءُ شتگ اَنت ءُ کوش ءِ سبب زانگ نہ بیتگ-

ھمے وڑ ءَ زاھدان ءَ جنگل ءَ یک شوانگے ءِ لاش چات ءَ دزکپتگ-

ھالانی رد ءَ ناشناسیں مردماں یک شوانگے ءِ پس برتگ ءُ آئی ءِ دست ءُ پاد بستگ ءُ چات ءُ چگل داتگ چریشی ءَ چہ آئی ءِ لاش مروچی گندگ بیتگ –

لاش انتزامیہ ءِ واکداراں کش اتگ ءُ برتگ کہ اود ءَ آئی ءِ پجار چل ءُ پنچ سالی ئیں مھمد ولی براھوئی ء مھمد مراد جھمنند قطار جنجک زاھدان ءِ نام ءَ زانگ بیتگ-

ھالانی رد ءَ گوشگ بیتگ کہ مھمد ولی ءِ دو سد پس بیتگ اَنت ءُ چریشی ءَ دزاں آئی ءِ پس برتگ ءُ آئی ءِ دست ءُ پاد بستگ ءُ چات ءَ چگل داتگ ءُ مروچی آئی ءِ لاش گندگ بیتگ-