بلوچستان شھدربرجاہ ءِ استاد ءُ کارمندانی لوٹانی سر ءَ دلگوش نہ کنگ زانشت دُژمنی یے – بساک

بلوچ اسٹوڈنٹس ایکشن کمیٹی ءِ بنجاھی جارکش ءَ وتی درشانے ءَ گوشتگ کہ بلوچستان شھدربرجاہ ءَ پہ پگارانی نہ رَسگ ءِ بنیاد ءَ زھرشانی کنوکیں استاد ءُ کارمندانی ھکی یے لوٹانی سر ءَ دلگوش نہ کنگ بژنی گپے – دیر اِنت کہ آ پہ وتی پگارانی نہ رسگ ءِ سر ءَ زھرشانی کنگ ءَ اَنت کہ چہ ایشی ءَ شھدربرجاہ ءَ وانگ ءُ زانگ ءِ کار اوشت ءِ آماچ اِنت- باز رند ءَ آیانی زھرشانی کنگ ءُ شھدربرجاہ ءِ وانگ ءُ زانگ ءِ کارانی ماٹوکنگ ءَ ابید انگت ءَ آیانی لوٹانی نیمگ ءَ دلگوش گْور نہ کنگ سرکار ءِ نابودی ءِ منّانک اِنت – بلوچستان ءَ زانشتی کارانی نہ بیگ ءِ سْوب ءَ نودربرانی باندات زوال بیگ ءَ اِنت – بلوچستان ءَ شھدربرجاہ ءِ کمی ءِ سْوب ءَ بلوچستان شھدربرجاہ ھما اولی زانشتجاہ اِنت کہ نودربر چہ دور ءُ دریں دمگاں وتی وابانی سرجم کنگ ءَ کاینت بلے بژن کہ سرکار سنگین نہ اِنت ءُ لوڈ ءُ گوڈانی سْوب ءَ بلوچستان شھدربرجاہ جیڑھانی ڈوارجاھے جوڑ بیتگ – ھمک روچ یک نوکیں جیڑھے چِست بیت کہ چہ ایشی ءَ زانشتی ءُ دگہ کار اوشت ءِ آماچ اَنت۔ اے دُرسیں جیڑھانی زمہ وار سرکار اِنت کہ شھدربرجاہ ءِ رکینگ ءَ وتی کِرد ءَ پیلو بہ کنت بلے پہ زانشتی کاراں زر نیست ءُ اے زانشت دُژمنی کارے –

جارکش ءَ گْوشتگ کہ راج ءِ دیمروئی ءَ استاد ءِ یک ٹوھیں بستارے کہ چاگرد ءِ وانگ ءُ زانگ ءُ ھیلکاری ءِ پدانک اِنت۔ بلے ھمک روچ بلوچستان ءَ استاد دگانی سر ءَ درکپگ ءَ اَنت کہ بژنی گپے ءُ ایشی ءِ زمہ وار سرکار اِنت۔ بلوچستان شھدربرجاہ ءِ استاد ءُ کارمنداں یک سالے بیت کہ پہ وتی پگاراں زھرشانی کنگ ءَ اَنت۔ ایشی ءَ پیش جنکانی بھادر ھان شھدربرجاہ ءُ بلوچستان شھدربرجاہ آپ انپارمیشن ٹیکنالوجی، انجینئرنگ اینڈ منیجمنٹ سائنس ءِ استادانی پگارانی نہ دیگ ءِ سْوب ءَ زھرشانی کنگ اے گپ ءَ نشون دنت کہ بلوچستان سرکار پہ وانگ ءُ زانگ ءِ باروا سنگین نہ اِنت – بلوچستان سرکار ءِ پہ آدگہ وتسریں کاراں زر گشینگ ءُ دیمروئی ءِ اوگام جنگ ءَ زوال بیت گڑا دومی نیمگ ءَ وانگ ءُ نبشتہ کنگ ءِ کار پُشت ءَ دور دیگ بیتگ اَنت۔ اے دُرس زانشت دُژمنی شوندات اَنت کہ چاگرد چہ وانگ ءُ نبشتہ کنگ ءِ پگر ءَ در کنگ ءُ گوں دومی ءُ سیمی جیڑھانی نیمگ ءَ دلگوش کنگ یک پندلے –

جارکش ءَ گڈسر ءَ وتی درشان ءِ تہ ءَ گوشتگ کہ گوستگیں پنچ ماہ اِنت کہ استاد ءُ کارمند پگاراں ھوار پہ آدگہ لوٹاں زھرشانی کنگ ءَ اَنت ءُ آیانی زھرشانی ءِ پلہ مرزی ءَ کنیں ءُ دزبندی کنیں کہ زوت آیانی پگار دیگ بہ بنت داں شھدربرجاہ ءِ جنک ءُ بچکیں نودربرانی وانگ ءُ زانگ برجاہ بہ بیت –