آئی پی ایل ءِ گوستگیں سیزن ءِ وڑ ءَ اے رندی ھم سنرائزرس حیدرآباد جوانیں گوازی پیش دارگ ءَ نہ انت – مروچی لکھنو سپر جائنٹس گون ءَ بوتگیں گوازی ءَ پنچ وکٹاں بے سوب بوگ ءَ پد آئی ءَ وتی بنداتی ھردو گوازی ھار داتگ انت ءُ پوئنٹ ٹیبل ءِ تہ ءَ درساں چہ جھل شُتگ – دومی نیمگ ءَ کے ایل راہل ءِ سروکی ءَ لکھنو ٹیم سَے گوازیانی تہ ءَ دو گوازیاں سوبمند بوگ ءَ پد پوئٹٹ ٹیبل ءِ تہ ءَ ٹاپ پوزیشن ءَ انت –
آدینگ ءِ روچ ءَ بوتگیں گوازی ءَ لکھنو ءِ دیم ءَ حیدرآباد ءَ بس یکسد ءُ بیست ءُ یک رن جوڑ کرت کتگ ـ پہ اے ٹارگٹ ءِ پروشگ پہ لکھنو ءَ انچو گران نہ ات اشی ابید ھم ٹیم ءَ تاں گڈسر ءَ جوانی ءَ کوشست کنگی ات – کپٹن کے ایل راہل ءَ سِی ءُ پنچ رنانی اننگز ءِ گوازی کتگ ءُ بلے ھو گوستگیں دو گوازیاں نیم سنچری کنوکیں لیبی کائل میئرس اے رندی جلدی آؤٹ بوتگ ءُ دیپک ھدا سیمی گوازی ءَ ھم بے سوب بوتگ – لکھنو ءَ چِل ءُ پنچ رنانی سر ءَ دو وکٹ کپتگ گڑا ھمدا پد ءَ کپٹن راہل ءُ کرونال پانڈیا ءَ پنجاہ ءُ پنچ رن ھواری ءَ جوڈ کتگ ـ کرونال ءَ جوانیں گوازی پیش داشتگ بلے سینزدھمی اوور ءَ عمران ملک ءِ بال ءَ آؤٹ بوتگ بلے اے وھدی لکھنو ءَ سد رن جوڑ کتگ بوتگ ءُ گوازی چہ حیدرآباد ءِ دست ءَ شتگ بوتگ – لکھنو ءَ شانزدھمی اوور ءَ یکسد ءُ بیست ءُ دو رنانی ٹارگٹ پروش اِتگ –
کرونال پانڈیا ءَ ھژدہ رن داتگ ءُ سَے وکٹ گپتگ ءُ آئی وتی اولی اوور ءَ مینک اگروال آؤٹ کتگ – پاری ءِ وھدیکہ ھشتمی اوور بوگ ءَ بوتگ گڑا کرونال ءَ انمول پریت سنگھ ءُ ایڈن مارکرم آؤٹ کتگ واتر دیم داتگ انت – حیدرآباد ءِ گرانتریں لیبی ہیری بروک ھم اے رندی بے سوب بوتگ – اے رندی روی بشنوی ءَ شانزدہ رن ءِ سر ءَ یک وکٹ ءِ گپتگ، چل سالی تجربہ کار ءُ لیگ اسپنر امت مشرا ءَ بیست ءُ سَے رن داتگ دو وکٹ گپتگ – گڈی دو اووراں عبدالصمد ءَ دہ بالاں بیست ءُ یک رن جوڈ کتگ – حیدرآباد ءِ نیمگ ءَ درساں گیشتر رن راہل ترپاٹھی ءَ سِی ءُ چار رن جوڈ کتگ –