شال: زورانسری آوار جنگ بوتگیں مردمانی یل نہ کنگ ءِ بگیری ءَ زھرشانی برجاہ

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی 5ھزار ءُ چار روچ سرجم بوتگ انت –

مروچی سیاسی باسک لعل محمد بلوچ، ظہور احمد بلوچ ءُ داد محمد بلوچ ءَ ھوار دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ سھب ءَ بگر تاں بیگاہ ءَ ودار کنگ ءَ پد وھدیکہ روچ ایر رؤت گڈا ما ھم وتی ھیالانی تہ ءَ گار بہ ایں ھمے پگر کنیں ءُ وت دل ءَ گوں روچ ءَ ھبر کنیں کہ مروچی تو ایر شُتگ یے بلے باندا الم تو پہ ما وشیں ھالے کار یے ءُ یک بے وس، بے سھارئیں ماتے ءَ گوں چک ءَ دچار کپگ ءِ وشیں ھال ءَ دنت – بلے بلوچیں مات روچ ءِ درآیگ ء گوں وتی چکانی راہ ءَ چاران چاران داں بیگاہ ءَ شد کشیں زھرشانی ءَ نشتگ انت بلے اناگت ءَ اے بے رھمیں روچ زرد تریت ءُ وتی ایر رؤگ ءِ اشارہ ءَ بے وسیں مات ءَ دنت –

ماما قدیر بلوچ ءَ گوشتگیں اے دردیگ ءُ بے وسی ءِ کسہ ھما ماتانی انت کہ آھانی جگرانی ٹکراں بازیں وھدے بیت زندانانی تہ ءَ بندیگ انت ءُ زلم ءُ زوراکی سگگ انت – وتی زند ءُ مرگ ءِ جنگ ءَ کنگ ءَ انت – آھانی تہ ءَ بازینے چہ وتی زند ءَ زبھر بوتگ ءُ اے دنیا ءِ یل داتگ بلے آئی ءِ کھول ءُ مات ءُ مردم ھچ ءَ سرپد نہ انت بس ھمائی ودار ءَ نشتگ انت – بلوچ مات نیم سدی بیت کہ ھمے درد ءُ زوراکی ءِ تہ ءَ گوزگ ءَ انت ـ آھانی دوستگیں مردم چہ آھاں سِدنت دوبر نہ مل انت بلے مرگ الم ھمے ماتانی گور ءَ سر بیت –