من پَہ تو پَھر بَنداں اَبَّا جان
نبشتہ کار: ھَوَا بلوچ
دی بلوچستان پوسٹ
اَبَّاجان من چَہ ترا پَھِلی لوٹ آں کہ منی کِرّ ءَ چُشیں لبز نیست کہ من تئی کِرْدْ ءُ باؤستانی بابت ءَ چیزے نِبشتہ بِہ کَن آں ، من ھَردیں کہ نَدْ ءَ دَست ءَ کَن آں ترا جیڑاں کہ پَہ تو من وتی ھیالاں دَرشان بِہ کناں بَلّے منی نَدْ من ءَ مُدام کَرْوج اِیت ءُ تئی گْرَان بَھائیں کِرْدْانی دیم ءَ لبز وتی پَسّواں دے اَنت-
اَبَّا جان او اَبّلِی منی ، وَھدے من نَدْ دَست ءَ کُت نَہ زاناں چے نِبشتہ بِہ کَن آں چَہ کُج ءَ بُنگیج بِہ کَن آں کہ تئی داتگیں دَرس ءُ سوجانی کِسّھاں گوں لبزاں من دیم ءَ آؤرت نَہ کَن آں منی اے چاریں دانک تئی شان ءُ کِرْدْ ءِ دیم ءَ شَرّمندگ بَنت تئی کِرْدْ ءُ جُھد وت وتئی پَجّار ءَ کَنت ءُ گواڑگیں پُلّاں شُون دَنت پرچاکہ تئی کِرْدْ ءَ وت ءَ جھان ءِ دیم ءَ پَدّر کُرت ءُ تئی داتگیں کُربانی ءَ وت ءَ سَرجمیں راجدَپتر ءَ زندگ کُت ۔
بَلّے اَبَّا جان من بس ھمئے گُش آں ترا اِشتاپی کَنگی نَہ اَت ترا اَنگت باز پَند بُرَگی اَت ترا اَنگت کوھانی آرپیں پِت بُوّگی اَت ترا اَنگت جَلَگی اَت کہ اے دْرَاجیں پَند ءِ تَہ ءَ مارا تئی پَنتانی مَیار گوں تئی گاماں ھَوار دیم ءَ کِنزَگی اَت اَبّلِی تو پَہ من یک کتابے ءِ دروشُم ءَ اِت ئِے من ھم پَھر بَنداں کہ من چَہ وتی آرپیں پِت ءَ چے آئی ءِ سَسّا ءُ ھیالاں گوں راجی جُنز ءِ مارشتاں سَر ریچاں اَبَّا جان من اَنگت گُش آں کہ تو کَمُوکیں ماتھل کُتیں
اَبَّاجان من ءَ یات اِنت تو من ءَ مُدام گُشت منی چُک بس بُوان وتی بَد ءُ نیک ءَ بِہ زان وت ءَ جوان جاہ بیار وتی ھَکانی پَد جَنگ ءَ بِہ زان وتی راج ءِ بَزّگی ءَ بِہ مار وتی ایردستی ءَ بِہ زان کہ ترا وت زُبانے ھَست ترا وت بَھشت رَنگیں زمینے ھَست کہ زورَاکیانی آماچ اِنت گوستگیں ھَپتاد سال اِنت کہ مئے وَتن گیر مَھذب اِیں دُژمنے ءِ لَگتَانی چیر ءَ اِنت بَلّے بلوچستان ءَ بیست سال بیت کہ جنگ یک شَل ءَ بَرجاہ اِنت اے بیستیں سالانی توک ءَ بے کِساس وَرناہ ، پیر، کماش ءُ زالبولاں دیمونی داتگ زمین زادگیں وَرنایاں مُدام لشکر ءِ بھگیری گوں تُرندی ءَ جنگ بَرجاہ داشتگ ءُ دُژمن بے وار ءُ لَاچَار کُتگ، اے جنگ بلوچ ءِ گُڈّی جنگ اِنت اے جنگ وت واجھی یے جنگ اِنت اے جنگ ءِ تَہ ءَ بَزّگی ، واری ، بے لوگی ،دَر پَہ دَری دُرست مردُم ءِ سَر ءَ کاینت اَنچو گُش اَنت کہ جنگ بے رَھم بیت جنگ دوست ئیگ ءُ مھروانیں مردُماں چَہ ترا سِند اِیت تئی ھَنکِین ءُ میتگ تئی شھر ءُ دیار تئی لوگ ءُ جاگھاں تَباہ ءُ ویرندان کَنت بَلّے لَھتیں مردُماں وت ءَ را مُھکم کَنگی اِنت پرچاکہ اے جنگ ءِ آکِبَت آجوئی اِنت مارا ءُ شُمارا وتی زند ءِ واھشت ءُ وشی سَرڈگار ءِ ھاتر ءَ کُربان کَنگی اَنت پَہ زمین ءِ ھاتر ءَ ھَمنچوک کُربانی بِہ دئے اِیں کَمّ اَنت مَروچی ما زندگیں راجانی دَرْوَرْ دئِے اِیں ھمئے گُش اِیں کہ پَہ زندگ بُوّگ ءِ ھاتر ءَ دیمونی دئیگی اِنت ھمئے دیمونیانی برورد باندا مئے راج ءَ نوکیں زندے بَکشائیت او مئے آؤکیں پَدریچ وتی جِند ءِ سَر زمین ءِ سَر ءَ پَہ اِیمِن ءُ آجوئیں زنِدمانے گوازینت کَنت ۔
مَروچی وَرناہ ءُ کماشاں ھمئے پیسلہ کَنگی اِنت کہ گُلامی ءِ زند مارا ھچ وَڑ ءَ کَبول نَہ اِنت ءُ دُژمن ھَر وَڑ ءَ زُلم ءُ زورَاکی بِہ کَنت ما پَہ زمین ءُ راج ءِ رَکّینَگ ءَ وتی ساہ ءُ سَراں کُربان کَنگ ءَ ھچ چَکّ ءُ پَد مَہ بِہ اِیں دُژمن ءِ ھَر زُلم ءُ زورَاکیانی دیم ءَ میلانک بُوّگی اِنت دانکہ دُژمن بِہ زانت بلوچ پَہ وتی زمین ءِ ھاتر ءَ ھَر وَڑیں جُھد کُرت کَنت ءُ ھَر وَڑیں کُربانی دات کَن اَنت پَہ تئی زُلم ءُ زورَاکیاں ھچبر پُشت کِنز نَہ بیت ۔
اَبَّا جان تو ھَر وَھد ءَ گُشت مَروچی مئے دُژمن اَنچو نِزور ءُ لَاچَار بُوّتگ کہ مئے مات ءُ گُوھاراں زندانی کَنگ ءَ اِنت مئے زمین ءِ سَر ءَ پَہ زُور اَتکگ ءُ نِشتگ مئے مال ءُ مَڈیاں اَچ مارا پُلَگ ءَ اِنت ھَر نیمگ ءَ بلوچ ءِ گِدَانْ جَمبُور اِنت بَلّے پَہ مُھکمی راجی لوٹ ءِ توار چو بولان ءُ سیاھیجی ءِ بالاد ءَ مِک اِنت۔
من گوں وَت ءَ ھَوار سَرجَمیں ایردستیں مَھلوک ھمئے گُشگ لوٹ آں اگاں کَسّے زورَاک ءِ زورَاکیانی دیم ءَ پَد کِنز اِیت گُڑا آ کَدی ھم سوبمَند نَہ بیت ۔
اے سَاھت ءَ ھَر بلوچ ءَ جنگ ءَ بَھر زُورَگی اِنت پیر ءُ کماش بَنت یاکہ وَرناہ ءُ زالبول کُلاں یکمُشت بُوّگی اِنت ءُ ھون واریں دُژمن پْروش دئیگی اِنت ۔ وَھدیکہ مردُم ءَ گوں زمین ءَ مھر بیت گُڑا اُمر اوں کِساس کَنگ نَہ بیت بلکیں تُوکل ءُ زِرد ءِ پیسلہ اَرزِشت دار اِیت کہ تو ماتیں زمین ءِ رَکّینَگ ءَ چے کُت کَن ئِے۔
وَھدیکہ من ءَ اَبَّا جان ءِ شھیدی ئِے ھال سَر بُوّت گُڑا من سَک مُلور ءُ بے تاھیر بُوّت آں کہ چَہ من ءَ منی مھروانیں اَبَّا گِسَر بُوّت اے سَاھت منی ھیال ءَ چَہ کیامت ءَ کَمتِرّ نَہ بُوّتگ اے سَاھت ءَ منی چَمّانی اَرس تَرمپ، تَرمپ ءَ رِیچان ءُ مُلور بُوّتاں من ءَ ھمئے سَما بُوّت کہ گُش ئِے آزمان منی سَر ءَ کَپت منی چَمّانی رُژن لَھم لَھم ءَ شُتاں پَدا بازیں جیڑگ ءَ رَند من وتءَ چِت ءُ نَزّ آؤرت ءُ گُشت اَبَّا تو وت گُشتگ اے راہ کُربانی ءِ راہ اِنت اگاں مَروچی ما کُربان مَہ بِہ اِیں گُڑا پَہ آؤکیں پَدریچ ءَ اے گُلامی ءِ سیاھیں شَپ کَدی ھم بَام نَہ بیت-
آجوئی مئے ءُ شُمئے راج ءَ یک وَشھالیں زندئے دَنت گُلامیں راج ءُ گُلامیں زند ءَ اے جھان ءَ ھچ وَڑیں بستار نیست اے زندِمان پَہ آجوئی ءَ وَش اِنت بَلّے آجوئی ھون لوٹ اِیت دانکہ ما وتی ساہ ءُ سَراں کُربان مَہ کَن اِیں چَہ گُلامی ءِ مُھکم اِیں سانکلاں آجو بُوّت نَہ کَن اِیں بَلّے اے راستیں گَپّے کہ پِت ئِے رَوَگ ءَ زَھگ ءَ سَک دَرد بیت پَہ زَھگ ءَ مَزنیں تاوانے ھم بیت بَلّے ھمئے ھون ءُ کُربانی مئے آجوئی ءِ مانزمان اَنت من ءَ اَنچو سَما بُوّگ ءَ اِنت اَبَّا جان تو منی دیم ءَ نِشتگ ئِے ءُ من ءَ سِکِین ءُ دلبَڈی دئیگ ءَ ئِے کہ من باندا وت ءَ چَہ اے راہ ءَ گار مَہ کَن آں تو من ءَ ھمئے گُشگ ءَ ئِے کہ جُھد شُمئے ئیگ اِنت ءُ شُمئے کوپَگ ءَ اِنت اے کِسّہ ھلاس نَہ بیت اَبَّا جان تو اَنُوں مئے میَان ءَ ساڑی نَہ ئِے بَلّے ھما پِگر کہ تئی بُوّتگ آ پِگر چوں ساچان اِیں جَمبَر ءَ ساھگ اِنت ، اَبَّا جان تئی رَندگیری تئی داتگیں پَنت ءُ سوج پَہ من یک کتابے ءِ دروشُم ءَ اَنت من مُدام اَنچو ترا وَانگ ءَ باں گُمان بیت تو منی دیم ءَ نِشتگ ئِے ءُ منی رَھشونی ءَ کَنگ ءَ ئِے ۔
تئی زمین مھریں بچکنداں من مُدام گیرکاراں من جَزماں کہ منی آرپیں پِت ءِ رتکگیں ھون آجوئی ءِ مستاگ باں ، اَروَاہ آسُودگ بات اَبَّا جان ھَواریں-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔