چم راھیگ ات اَنت ودار آسر نہ بیت بیگواھیں رشید ءِ مات بیران

بلوچستان ءِ دمگ ھزدار ءِ جھمنند ءُ پنچ سالاں بیگواھیں رشید بلوچ ءِ مات بیران بیتگ-

کھول ءِ رد ءَ گوستگیں شپ ءَ رشید ءِ مات ءَ دل ءِ دور ءَ گپتگ چریشی ءَ اے دل پٹی پراھی ءَ مرگ ءِ اجل جوڑ بیتگ-

بیگواھیں آصف ءِ گوھار ءُ رشید ءِ ناکوزگ سائرہ بلوچ ءَ وئیل ءِ ھال راست کتگ ءُ چاگردی ترامجاھاں نبشتگ کتگ کہ’ کَے گوش ایت ریاست مات اِنت، اے مئے ماتاں ورگ ءَ اَنت، بیگواھیں رشید ءِ مات وتی زھگ ءِ آیگ ءِ وداراں بیران بیتگ‘-

آئی ءَ گوشتگ کہ ’ گڈی ساھت ءَ اگاں آئی ءِ دپ ءَ چیزے دراتکگ گڑا بس زھگ ءِ نام، اے ماتانی دلاں چست بیستگیں درد یک روچے ءَ ادارھانی واستا کھر بنت ءُ ریچ اَنت ‘ –

سی ءُ یک اگست دوھزاد ءُ ھژدہ ءَ پاکستانی پوج ءَ نوشکی زنگی ٹاور ءَ پکنک ءَ روکیں دَہ مردم دزگیر کتگ اَت انت کہ ایشانی اکس ھم پوج ءَ رسانکدراں شنگ ءُ تالان کتگ ات اَنت-

بلے ایشانی توک ءَ آدگہ مردم دو سال ءُ کم ءُ گیشیانی وھداں یل کنگ بیتگ اَنت ءُ ایشانی ھمراھی ءَ آوار جنگ بیتگیں آصف ءُ رشید بلوچ داں انگت ءُ بیگواہ اَنت-

بیگواھیں آصف ءُ رشید ءِ یل کنائینگ ءِ واستا آیانی کھولاں شال، کراچی ءُ اسلام آباد ءَ زھرشانی یاداشت کنائینتگ اَنت ءُ ایشانی ھواری ءَ ایشانی کھول ھم بیگواھیں مردمانی کمیشن ءَ پیش بیتگ اَنت بلے ایشانی دیم ءَ آرگ ھچ پیم ءَ داں انگت ءَ نہ بیتگ-

بلوچستان ءَ بازیں مات وتی زھگانی وداراں ھشکی ءَ نیشتگ ءُ بیران بیتگ اَنت ءُ ایشانی ھواری ءَ زھرشانیانی وھد ءَ ھم چوشیں وھد گندگ ءَ اتکگ اَنت کہ بیگواھیں مردمانی مات بے ھوش بیتگ ءُ کپتگ اَنت-

بلوچستان ءِ راجدوست ءُ انسان ھکانی گل پاکستانی پوج ءَ انسانی ھکانی لگتمالی ءُ مردمانی بیگواھی ءِ زمہ وار کرار دیگ ءَ اَنت-