شال ءَ بیگواھیں مردمانی پانکجنیں گل وی بی ایم پی ءِ زھرشانی برجاہ

زورانسری آوار جنگ بوتگیں بلوچانی ھاتر ءَ برجاھیں زھرشانی بنجل ءَ چار ھزار ءُ نُھ سد ءُ نود ءُ دو روچ سرجم بوتگ انت، مروچی چہ نوشکی ءَ سیاسی ءُ چاگردی باسک فیض امیر بلوچ، شمس بلوچ ءُ خرم بلوچ ءَ بنجل ءَ اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ دسمبر ءِ ماھ ءَ بگر تاں روچ ءُ مروچی ریاستی زوراکی تیزی ءِ گوم ءَ برجاہ انت، دسمبر ءِ بندات ءَ تربت ءِ بازیں دمگاں بلوچ پرزندانی شھید کنگ ءَ پد مشکے ءِ کش ءُ کری ھند ءُ دمگ نشانگ کنگ بوتگ انت، ڈیرہ بگٹی، کوھلو ءُ بولان ءَ پوج ءَ وتی زوراکی برجاہ داشتگ انت ءُ بلوچ ورنایانی ھمراھی ءَ زالبول ھم زورانسری آوار جتگ انت بیگواہ کتگ انت، ژانگولیں جونانی دست کپگ ءِ تہ ءَ ھم گیشی اتکگ –

ماما قدیر بلوچ ءَ گوشتگ کہ مروچی پارلمنٹ ءِ تہ ءَ نشتگیں یا ریاستی کبزہ ءِ بھر بؤکاں پگر کنگی انت کہ زوراکیں ریاست ءُ آئی ءِ پوج ءَ گوں بلوچ ءِ ننگ ءُ ناموس ءَ ھچ وڈیں واستہ نیست آ وا بس مڈیانی ھدوک انت – ایردستی ءِ سپر ھمینچو دور روان کنت ھمے داب ءَ اے ریاست بلوچ ءِ مات ءُ گھارانی ننگ گوں گوازی کنت –

آئی ءَ گوشتگ کہ بلوچ راج ءَ وتی دوستگیں مردمانی یل کنائینگ ءِ ھاتر ءَ جھد ھما جاہ ءَ آؤرتگ ءُ سر کتگ کہ اشی ءِ ھاتر ءَ المی انت کہ ھر تک ءُ پھناتاں سیادی داروکیں مردم وتی رکینگ ءِ ھاتر ءَ دژمن ءِ درسیں ھنر ءُ پندلاں بہ زان انت ءُ جھد ءِ تہ ءَ وتی کرد ءَ پیلو بہ کن انت –