بلوچستان : دو جتائیں دمگاں پاکستانی پوج ءِ سر ءَ اُرش، اُرش زمہ واری بلوچ سلاہ بندیں گل ءَ زرتگ

بلوچستان ءِ دو جتائیں دمگ مستونگ ءُ پنجگور ءَ پاکستانی پوج ءِ سر ءَ سلاہ بندیں مردماں اُرش کتگ ءُ دومی نیمگ ءَ اے اُرش زمہ بلوچ آجوئی لوٹوکیں سلاہ بندیں گل بلوچ لبریشن آرمی ءَ زرتگ-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں دو جتائیں اُرشاں زورگریں پاکستانی پوج ءُ یک ھال اھوالی ٹاورے نشانگ کتگ-

جیئند بلوچ ءَ گْوشتگ کہ بی ایل اے سرمچاراں گوستگیں شپ ءَ مستونگ ءِ دمگ کھڈکوچہ ءَ زورگریں پاکستانی پوج ءِ یک بُنجلے بُنجاھی دروازگ سر ءَ اوشتوکیں کارندھانی سر ءَ دستی بمب اُرشے کتگ چریشی ءِ آسر ءَ جانی تاوان چست کنگ کپتگ-

جارکش ءَ دیمتر ءَ گْوشتگ وھدے کہ بی ایل اے ءِ سرمچاراں دو روچ ءَ ساری پنجگور ءِ دمگ گچک ءَ کھن ءِ ھند ءَ یوپون شرکت ءِ ھال اھوالی ٹاورے ءِ مشینری مانداشتگ ءُ ناکارگ کتگ اَنت-

بلوچ لبریشن آرمی اے اُرشانی زمہ واری ءَ منّ اِیت- بلوچ ڈیھ ءِ وتواجھی ءَ تاں مئے اُرش زورگریں پوج ءُ آئی ھمکارانی سر ءَ برجاہ مان اَنت۔