نبشتانک: بلوچ راج ءُ آئی ءِ راجی زبان
نبشتہ کار : شاھد اھمد
دی بلوچستان پوسٹ
ھو ما بلوچ ایں ءُ بلوچی زبان مئے ماتی زبان اِنت میان اُستمانی روچ ءَ آ دگہ راجانی مھلوک وتی ماتی زبانانی روچ بیست ءُ یک (21) اُستپان ءَ بَھر زورگ ءَ اَنت باید اِنت ما بلوچ ھم وتی ماتی زبان بلوچی ءَ وتی مارشتاں درشان بہ کن ایں چی ءَ کہ اے روچ پہ ما انچیں روچے کہ آ دگہ راج ھم وتی ماتی زبان ءِ تہ ءَ وتی ھیال ءُ لیکاھاں درشان کن اَنت۔
اے گپ راستے کہ بلوچی زبان آ دگہ راجانی پَئیم ءَ آجو نہ اِنت کہ وتی ماتی زبان ءَ وانگجاہ ءِ تہ ءَ وانینگ بہ بیت چمیشکا مئے بلوچی ماتی زبان بندیگ کُتگ پرچاکہ ھر راج ھمے کوشست کن اَنت کہ مئے راجی زبان دگنیا ءِ تہ ءَ نبشتہ ءُ گپ بہ کن اَنت بلے ما بلوچ وت وتی راجی زبان ءِ تہ ءَ نبشتہ ءُ گپ کنگ ءَ دل نہ لوٹ ایت کہ ھبر ءُ نبشتہ بہ کن اَنت چی ءَ کہ دری زباناں مئے راجی زبان ءِ سر ءَ سک باز سان دَور داتگ کہ ما وت وتی زبان ءِ تہ ءَ مَنّگ ءَ جاڑی نہ ایں ءُ اگاں ما وتی زبان ءِ تہ ءَ نبشتہ ءُ ھبر بہ کن ایں گڑا ما دری زبان ءِ تہ ءَ وتی زبان ءَ ھور ءُ تور گپ ءُ نبشتہ کن ایں ءُ پمیشکا مئے بلوچی زبان ما وت شَگالی کُتگ۔
ایشی ءِ مستریں سبب ایش اِنت کہ ما وت وتی زبان ءَ نہ منّ ایں ءُ ما داں اَبد وتی زبان ءَ دست ئِے وت گار ءُ بیگْواہ کنگ ءَ ایں۔
بیدے زبان ءَ ما یک کوریں، کَرّیں ءُ گُنگیں بنی آدمے بزاں بس بُتّے جوڑ بَہ ایں ءُ دگہ راج مارا چوں سنسکرت زبان ءِ پَئیم ءَ یک روچے بزاں مراگش ءِ پُرسیگ لیک اَنت۔
اگاں شما اے چیز ءَ مَنّ اِت گڑا وتی زبان ءَ بے ھال بہ کن اِت ءُ دری زبان ءَ وتی امبازاں بو زور اِت ءُ اگاں شما نہ لوٹ اِت کہ دگنیا مارا اے رنگ ءَ مہ چار ایت گڑا یک مُشت ءُ تپاک بہ بَہ اِت وتی ماتی زبان ءَ امبازاں بوزور اِت چوں مہ بیت کہ شما چَٹّ ءَ گار بہ بہ اِت۔
ھر بلوچ پوسگ ءِ زمہ واری اِنت کہ وتی ماتی زبان ءَ بہ وان اِت ءُ وتی چُکاں ھم وانین اِت ءُ یک مُشت بہ اِت دری زبان ءِ راج ءَ اے باور کنائین اِت کہ ما ھم یک راجے ءِ بستار ءَ زانگ بَہ ایں ءُ اے ھم باور کنائینگ لوٹ ایت کہ مارا ملکے ھست مئے ملک ءِ نام بلوچستان اِنت ءُ ایشی ءِ چُک پہ وتی راجی زبان ءِ واست ءَ ھر وڑیں کربانی دیگ ءَ ھم جاڑی اَنت۔ شالاءَ بلوچستان زندگ بات ءُ بلوچی زبان دیم ءَ دیمروئی بہ کنات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔