نمدی یے پہ دلپْروشیں نودربراں
نبشتہ کار: سبول بلوچ
دی بلوچستان پوسٹ
وانگجاہ ءِ شرپمندیں بانُک ءُ واجھاں دْروت ءُ سلام، انچوشکہ ما وتی لبزانکی جُنز ءِ تہ ءَ مارگ ءَ ایں کہ مئے وانگجاہ ءِ بازیں نوک ھوار بیتگیں نودربر دلپْروش اَنت چریشی ءَ وڑ وڑیں جُست ھم کن اَنت لھتے گْوش ایت “ما چون بلوچی نبشتہ ءُ راست نبیسّگ ءَ ھیل کُت کن ایں؟”-
زُبان دوست ءُ راجدوستیں بانُک ءُ واجھاں، چہ دُرستاں پیسر ھمے سرپد بَہ ات کہ بلوچ یک گُلامیں راجے پمیشکا بلوچی ماں بلوچستان ءِ ھچ وانگجاہ ءَ وانینگ نہ بوگ ءَ اِنت۔ ما دْراہ چہ ھمے یوٹیوب، وٹس ایپ ءُ پیسبوک ءَ وتی راجی زُبان ءَ وت وانگ ءُ دربرگ ءَ ایں پمیشکا اے جُست ءِ پسّو ھمے یک اِنت کہ تو وت بلوچے ئے پمیشکا تو بلوچی ءَ وت ونت ھم کُت کن ئے۔ بلوچی وانگ ءُ دربرگ ھم پہ بلوچ ءَ سک آسان اِنت، اگاں تو بلوچی ونت کن ئے گُڑا اے ھم گنج اِنت۔ گِند ئے پہ بلوچی راست نبیسّگ ءَ مارا تھنا اشتاپ کنگی نہ اِنت۔
گُڑا باید اِنت ما وت ءَ دلپروش ءُ دلگران مہ کن ایں، پْروش مہ ور ایں کہ من بلوچی راست نبیسّگ ءَ نزور آں بلکیں وت ءَ راجی زُبان ءِ جُھدکار، ھزمتکار ءُ سرمچار جوڑ بکن ایں۔ باید اِنت ما پیسر بلوچی دَرونتاں بوان ایں پرچا کہ دُنیا ءِ ھر جاہ نودربراں راست نبیسّگ ءِ ھیل ءُ سرپدی چہ درَونتانی وانگ ءَ رس ایت۔ اگاں تو اول بلوچی دَرونتاں وانان کن ئے گُڑا وت سرپد بَہ ئے ءُ زوت بلوچی راست نبیسّگ ءَ ھم بلد بَہ ئے پمیشکا گوں تو دزبندی اِنت کہ اشتاپ مہ کن اول بلوچی درونتاں وانان ءَ بلوچی کُمکّارگال، تپورگال، رنگ گال ءُ پیوندگالانی سرپد بیگ ءِ جُھد بکن کہ اے دْراہ ایش اَنت۔
کُمکّارگال: آں، ایں، ئے، ایں، ئِے، اش، ایت، اِنت ءُ اَنت۔
رنگ گال: یں یا ھیں ءُ ئیں
تپورگال: ءِ ءُ ءَ
پیوندگال: ے یا یے ءُ اں
چہ درونتانی وانگ ءَ پد ما بلوچی ءِ زُبان دوستی ءُ راجدوستی نبشتانک ءُ آزمانکاں وان ایں۔ باید اِنت ما پیسر اے چیزاں وت دلگوش بکن ایں ءُ راج ءَ ھم اے وڑیں چیزانی بابت ءَ سرپدی بدے ایں۔ مُدام بلوچی نبشتہ بکن ایں، وتی نبشتگیں گالرِداں وت یکبرے وان ایں ءُ راج ءَ ھم بلوچی وانگ ءُ دربرگ ءِ کُمک بہ کن ایں۔ بزانکہ وتی سْیاد ءُ پجّاروکاں وٹس ایپی وانگجاھاں ھوار بہ کنائین ایں۔
چوناھا ما لوٹ ایں کہ شما ھرکس بلوچی وٹس ایپی وانگجاھاں اڈ دیان ءَ وتی دمگ ءِ نودربراں وت بلوچی بوانین اِت کہ شُما نزوریں نودربرانی تہ ءَ وانینگ ءِ بیسہ(Confidence) ودی بیت۔ اگاں شما نودربراں وانین اِت گُڑا چہ ایشاں شمارا پائدگ رس ایت. وھدیکہ شما نودربرانی چکاساں گِران ءَ آیانی رَدیاں راست بہ کن اِت گُڑا چہ رَدیانی راست کنگ ءَ نودربر ءُ اُستاد دوئیناں دیمروی بیت۔ بزاں بِل اِت کہ ما رَدی بہ کن ایں۔ اگاں ما رَدی کنگ ءَ ایں گُڑا بزان کہ ما جُھد کنگ ءَ ایں پرچا کہ رَدی وَ کار کنوک ءُ جھدکار ءِ دست ءَ بیت، ھما کہ ھچ کار نہ کنت ءُ بے کاری ءَ وھد ءَ زوال کن اَنت گُڑا آیانی دست ردی وَ نہ بیت پمیشکا باید انت ما ھر کس پیسر بلوچی درونتاں وت وان ایں ءُ پد ءَ راج ءَ ھم بلوچی بِہ وانین ایں۔
بلوچ بات اِت، مُدام سلامت بات اِت ءُ پہ راجی زُبان ءِ دیمروی ءَ جُنزان ءُ مئے ھمراہ بات اِت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔