بلوچ راجداریں باسکانی زورانسری آوار جنی ءِ بگیری ءَ زھرشانی برجاہ

سندھ ءِ مزن شھر کراچی پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چارھزار ءُ چار سد ءُ چِل روچ سرجم بوتگ انت –

مرچی چہ لسبیلہ ءَ مٹھا خان لاسی، درمحمد لاسی، نبی بخش لاسی ءَ ھوار دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بیگواھیں مردمانی یل کنگ ءِ کار اُشتاتگ وھدیکہ دوسری آوار جنی ءُ ژانگولیں جونانی چگل دیگ ءِ تہ ءَ گیشی اتکگ بلے اشی ابید ھم مئے زھرشانی بنجل اخلاقی سوبمند بوتگ، پہ انسانیت ءِ ھاتر ءَ چست بوتگین ھر گال نوکیں گوستانک ءِ نبیسگ ءَ انت ءُ جھان ءَ الم گپ جنگی انت زوراکی گوستانک یک روچ ءِ الم ھلاس بیت –

آئی ءَ گوشتگ کہ بلوچ راجی پرایمنین جھد ءَ دیم ءَ اے وھدی ھما چیلنج کہ ھست انت چریشی ءَ اندازگ جنگ بیت انت کہ نوں پُرایمنیں جھد ءَ وتی فیز بدل کتگ انت ادا ھما وڈ کہ گندگ بیت آھانی دیمپانی کنگی انت ھما وڈ کہ راج دوستی ءِ نام ءَ بلوچستان ءِ تہ ءَ سرکار ءُ چیرہ ادارہ وتی جوڈ کرتگیں کشندہ ٹولی دست ءَ بلوچ راجداریں باسکاں آوار جنگ ءَ انت، جھد وت درسیں چیزاں پدر کنگ ءَ انت مدامی اے وڈیں پندل زانگی انت ءُ آھانی دیمپانی گوں تمردی ءَ کنگی انت پرچا کہ اے وتی سرکار ءِ رکینگ ءِ ھاتر ءَ اے کار ءِ تہ ءَ چدوگیشتری کار انت –

ماما قدیر بلوچ ءَ دیمتر ءَ گوشتگ کہ بلوچ چکچینی ءِ دروشم ءَ پاکستان گوں وتی زوراکیاں جھان ءِ دیم ءَ پدر انت – زورانسری آوار جنگ بوتگیں بلوچ پرزنداں وتی چیریں زنداناں بر انت ءُ آھانی سر ءَ زوراکی کن انت، ژانگولیں جونانی دگ، ویرانگاں چگل دیگ ھمک روچی دود ءِ جوڈ بوتگ – زانگ نہ بیت کہ اے دابیں دگہ چنچو ناشناسیں یکجاھیں کبر مکران، رخشان، لسبیلہ، ڈیرہ بگٹی ءُ ھزدار ءَ دگہ جاھاں ھست انت –