زاھدان: ایرانی لشکر ءِ سر ءَ اُرش، یکے کُشگ بیتگ ءُ دو زدگ

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ ایرانی لشکر ءِ سر ءَ اُرش بیتگ، چریشی ءَ یک کارندھے مرتگ ءُ دو زدگ بیتگ اَنت-

اُرش سلاہ بنداں زاھدان ءَ ھواریں ھند خاش ءَ کتگ کہ اود ءَ ایرانی لشکر ءِ یک کارندھے کُشگ بیتگ ءُ دو زدگ بیتگ اَنت-

سرکاری تکاں اے اُرش راست کنگ ءُ گوشگ بیتگ کہ اُرش ءَ یعقوب دھمردہ بیران بیتگ ءُ محمد قیاضء ءُ حسین پارسا کیا زدگ بیتگ اَنت-

سیستان ءُ بلوچستان ءِ پولیس ءِ آفیسر محمد قنبری ءَ رسانکدران گوشتگ کہ شھید غفاری چوکی ءِ سر ءَ سلاہ بنداں اُرش کرتگ ءُ اود ءَ چوکی ءَ جاڑیگیں یک کارندھے جنگ بیتگ ءُ دو زدگ بیتگ اَنت-

تنی وھدی اے اُرش ءِ زمہ واری ھچ کس ءَ پہ وت ءَ نہ زرتگ ءُ چد ءُ پیش ھم ایرانی پولیس ءِ سر ءَ اُرش کنگ بیتگ اَنت ءُ ھمے وڑ سِی ءُ یک دسمبر ءَ زھدان ءِ ھند تردست ءَ ایرانی پولیس ءِ سر ءَ اُرش بیتگ ات کہ اے اُرش ءِ زمہ واری مزاران گمنام بلوچستان نامیں گلے ءَ پہ وت ءَ زرتگ ات-