نبشتانک: کریمہ کھربا گونگیں نودی شل
نبشتہ کار: نودگیر بلوچ
دی بلوچستان پوسٹ
سرڈگارے ءِ سر ءَ کہ اُرش بیت، زورآور ءِ ھلاپ ءَ راجی زرمبشت ھم چست بنت وتی زمزیلانی سِندگ ءَ لس مھلوک پاد کیت۔
انچش کہ بانک کریمہ جاگھے گْوش ایت ’آشوب مدام چہ مھلوک ءَ چست بیت مھلوک ءِ تہ ءَ ردوم زور ایت ءُ چہ مھلوک ءِ کمک ءَ سوبمند بیت‘۔
راجی زرمبشت وتی راھشوناں وت شوھاز ایت آیاں در گیج ایت آ مھکمیں کارست وتی اجتماعی لوٹانی ھاتر ءَ وتی زاتی سیت ءُ نپاں کِمار نہ کن اَنت، وتی واھشتاں گٹگیر کن اَنت، آ ھمے سلھیں مکسد ءِ ھاتر ءَ وتی سرانی کربان کنگ ءَ ھم چَک ءُ پد نہ بنت آ مزنیں واھگانی پدگیر بنت۔
پمیشکا مزنیں منزلانی واھگداریں مردم ھمے پاد اتکگیں لس مھلوک ءَ چِن اَنت ءُ نز کار اَنت ایشاں ادارھانی تہ ءَ یک جاہ کن اَنت ءُ ایشانی لیکھی نزوریانی سر ءَ کار کن اَنت آ زان اَنت کہ جنگانی سپر ارزان نہ اِنت۔
چوناھا گلامی ءِ تَوک ءَ چہ گور ءَ در لگوشگ چوشیں آسانیں کارے ھم نہ اِنت گلامی تھنا پوجی بُنجلانی یا چیک پوسٹانی نام نہ اِنت گلامی ھما ترس ءُ لبّ ءِ ھم نام اِنت کہ گلام ءِ مجگ ءَ پُترتگ آئی ءَ بُرّان اِنت نزور کنان اِنت آئی ءِ توکل ءَ پروشان اِنت ھمے سَوب اِنت کہ بازینے پد کنزان کنت باز پہ لب ءُ باز پہ ترس چریشانی تہ ءَ بازینے کہ وتی راہ ءَ جتا کنت گڑا بدواھگ ءِ ھمراہ داری ءَ کنت ءُ جنز ءِ تاوان دیگ ءَ، زمین ءِ سودا بازی ءَ ءُ مڈیانی لٹ ءُ پُل ءَ ھم چک ءُ پد نہ بیت اِنت۔
گلامی ءِ تَوک وتی جاہ ءَ بلئے بلوچ ءِ سر ڈگار ءِ سر ءَ نندگ تنیگت پہ ھچ زوراک ءَ ارزان نہ بیتگ بلوچ سرڈگار ءَ اے سکت مدام بیتگ کہ پہ وتی کوہ ءُ گیابانانی رکّینگ ءَ مھکمیں سر ودی بہ کنت اے بامرد برے ھمل ء جینئد اِنت برے یوسف عزیز مگسی اِنت ءُ برے فدا احمد اِنت یا کہ بی بی بانڑی اِنت، بانک کریمہ اِنت ءُ یا کہ شیرزالیں شاری اِنت۔
دنیا ءِ راجی زرمبشتانی تہ ءَ زالبولانی کرد مزن اِنت بیدء پنجاہ درسد آبادی ءَ اے پند بُرّگ نہ بیت بلئے وتی چیزے بے سریں قبائلی روایتانی سَوَب ءَ بلوچ ءِ پیسری راجی داواھاں جنینانی الکاپی ءَ گوں بوگ ءِ درور نہ رس ایت۔
اے دوھزار پنچ ءِ زمانگ اَت کہ بلوچ راجی جنز ءِ نوکیں درے پچ بیت یک نوکیں نامے کریمہ ءِ دروشم ءَ دیم ءَ کیت ءُ دو ھزار بیست ءَ ھمے نام یک اھدے وتی نام ءَ رجین ایت ءُ دنیا ءِ درائیں ایردستیں راجاں پہ مادنیں کشکے ءِ چیدگ ءَ ساز ایت مرچی ھمے کشک ءَ ھزاراں آشوبی زندگی ءِ بے مانائی ءَ پروشان ءَ سپر کنان اَنت۔
بانک 1986 ءَ ماں دبئی ءَ ودی بیت بلئے آئی ءِ بوگ ءَ پد آئی ءِ کھول دیم پہ تمپ ءَ روت تمپ راجی بامردانی کسھانی ھلک اِنت ءُ کساں سالیں کریمہ ھمے کسھانی میان ءَ رُد ایت ءُ مزن بیت اے چپ ءُ چاگرد ءَ فدا احمد، حمید ءُ غلام محمد ھم ودی کتگ اَنت۔
پہ گاریں بلوچاں ءُ بلوچستان ءَ آپریشنانی ھلاپ ءَ توار چست کنان ءَ بانک ءِ سْیاسی سپر ءِ بندات چہ بی ایس او ءَ 2006 ءَ بیت بانک کریمہ یکبرے سینٹرل کمیٹی ءِ باسک گچین کنگ بیت پد ءَ 2008 ءِ کونسل سیشن ءَ کمک کماش گچین کنگ بیت وھدے کہ 2009 ءَ سرکار بی ایس او ءِ مستریں کمک کماش زاکر مجید ءَ بیگواہ کنت، گل ءِ گیشتریں ڈبہ بانک ءِ کوپگاں کاینت۔ اے زانگلوکیں جونانی زمانگ اِنت گار ءُ بیگواھانی زمانگ اِنت بلوچستان ءِ سیاست ءَ اے گران تریں فیز اِنت 2012 ءِ کونسل سیشن ءَ بانک مستریں کمک کماش گچین کنگ بیت ءُ چیرمین زاھد کماش گچین بیت۔
2013 ءَ بی ایس او آزاد ءِ سر ءَ ریاست بندش جَنت اے زمانگ ءَ سپر کنگ، سرکل جنَگ، زھرشانی کنگ ءُ سیاسی مچیانی سر ءَ سرکار وڑ وڑیں پابندی جنت بلئے بانک گَل ءِ مھکم کنگ ءَ شپ چار ایت نہ روچ پابندیانی سَوَب ءَ گل ءِ گیشتریں لیڈرشپ بلوچستان ءِ جتا جتائیں ھند ءُ دمگاں رو آ کت نہ کنت ھمے زمانگ ءَ گل ءِ کارگشاد ھم شھید کنگ بیت۔ بلئے بانک بلوچستان ءِ کُنڈ کُنڈ ءَ گَل ءِ پروگرام ءَ بارت ءُ سر کنت۔
2014 ءَ بی ایس او چیرمین زاھد بلوچ بیگواہ کنگ بیت گڑا ڈبہ پد ءَ بانک ءِ سر ءَ کاینت۔ اے زمانگ ءَ آ چوناھا گل ءِ وائس چیئر پرسن بیت۔ بانک چہ 2006 ءَ بلوچ ءِ راجدپتر ءَ نوکاز کنان اِنت بلئے اے 2015 اِنت کہ اولی رَند ءَ راجدپتر ءَ بی ایس او ءِ سر کماش جنکے گچین کنگ بیت۔ سرکاری جبر ءِ ھمراھی ءَ اے بھتامانی زمانگ بیت۔ گوں بد واھگ ءَ ھور وتی مردم ھم اے مناپکی ءَ گوں بنت۔ گل ءِ ھلاپ ءَ وڑ وڑیں پندل سازگ بیت۔ لیڈرشپ ءِ کردارکشی کنگ بیت بلئے بلوچ ءِ مھکمیں سر اے پندلاں کِمار نہ کنت۔
اے گواچنی گپے کہ بانک پہ بلوچ زالبولاں یک کشکے ءِ دنز ءُ گباراں چنڑ ایت بلئے آ راجی زرمبشت ءَ تھنا پہ زالبولاں درورے نہ اِنت آ نوں پہ سرجمیں راج ءَ، پہ کسان ءُ مزناں یک چیدگے جوڑ بیتگ ھما چیدگ کہ چاگرد ءِ گھتگیں روایتاں پروش ایت۔ ھما چیدگ کہ درامد ءِ مکرانی دیم ءَ اوشت ایت بانک ءِ جھد پہ اے کدام بستگیں چاگرد ءَ ھچبر شموشکار نہ بیت ۔
راجی جنز ءَ ابید ھم آ پہ بلوچ زالبولاں یک رول ماڈلے ءِ بستار ءَ دار ایت آئی ءِ جھد پہ زالبولانی وانینگ ءُ آیاں چاگرد ءِ بے سریں ربیت ءُ سانکلاں چہ آجو کنگ ءَ بِھ پراموش کنگ نہ بیت-
آ ھمک زالبول ءَ راجی زانشت دنت ءُ آیاں پہ اے سرڈگار ءِ وتواجھی ءِ ھاتر ءَ جھد کنگ ءِ سکین ءَ دنت۔ مرچی بلوچ زالبول دنیا ءِ کُنڈ کُنڈ ءَ روگ ءَ اَنت پہ وانگ ءَ بایدیں آ وتی ھمے آدینک ءَ ھجبر مہ شموش انت کہ آئی ءِ جھدانی بردورد انت مرچی بلوچ زالبول دیما اَتکگ انت زند ءِ ھر پِڑ ءَ گون انت۔
تُمْپ ءُ تُربَت ءِ دمکاں بگر داں کراچی ءُ شال ءِ دگاں بْیاں آ یک انچیں کِسھے پَشت گیج ایت داں اے گیدی ءَ بلوچے ھست آئی ءِ آواز بلوچستان ءِ ھرچ کوہ ءِ دل ءَ مھکمیں سنگرے ءِ دروشم ءَ مان ایت۔
آ چہ لس نامے ءَ در کپتگ ءُ پہ بلوچ راج ءَ لیکھے جوڑ بوتگ ءُ کبلھے یے بستار ءَ دار ایت ءُ ھمے کبلہ ءَ سرمتابیں سر پہ ھاک ءِ سجدگ ءَ کپنت۔ ھاکءِ سجدگ ءُ بوسگانی شھماں چہ دنیا ءِ دپتر ءِ مزن زھرگیں کِرد شاری ءِ دروشم ءَ دیم ءَ کاینت۔
کریمہ ءِ جاگہ ھورک اِنت آئی ءِ جاگہ ءَ کس گِپت نہ کنت بلئے آئی ءِ توار زمین پھازانی ھون ءِ گڈی ترمپ ءَ داں برجاہ مان ایت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔