زاھدان: ایرانی لشکر ءِ آنسوگیساں بیران بیتگیں زالبول ءِ پجار ءُ یک زدگینے ءِ بیران

سر بیتگیں ھالانی رد ءَ زاھدان ءَ سی ستمبر ءَ ایرانی لشکر ءِ آنسوگیس ءَ یک بیران بیتگیں زالبولے ءِ نام دیم ءَ اتکگ-

گیشیں ھالانی رد ءَ بیران بیتگیں زالبول ءِ پجار ھشتاد ءُ ھشت سالی ئیں زلہخا ترزی ءِ نام ءَ زانگ بیتگ ءُ گل مھمد ءِ چک گوشگ بیگ اِنت-

ھالانی تہ ءَ گوشگ بیتگ کہ اے زالبول ھما وھد ءَ بیران بیتگ ایرانی لشکر ءَ زھرشانی کنوکانی شنگ ءُ شانگ کنگ ءَ شھر ءَ آنسو گیس جتگ ءُ چریشی ءَ آئی ءِ دم گٹ اتگ ءُ بیران بیتگ-

ھالانی رد ءَ گوشگ بیتگ کہ زلیخاہ اوگانستان ءِ جھمنندیں بلوچے بیتگ کہ بازیں سالاں چہ پیسر زاھدان ءَ اتکگ ءُ نندوک بیتگ-

ھالانی رد ءَ گوشگ بیتگ کہ زلیخاہ ءِ کھول ءَ بیھار دیگ ءُ گوشگ بیتگ کہ اگاں شما اے ھال کش ات گڑا شمئے کھول ءَ جھمنندی کارڈ چہ پچگرگ بنت-

ھمے وڑ ءَ زاھدان ءَ سی ستمبر ءَ زدگ بیتگیں یک مردمے بیران بیتگ-

بیران بیتگیں مردم ءِ پجار حبیب اللہ یعقوبی ءِ نام ءَ زانگ بیتگ کہ زھگ ءِ جھمنند اِنت –

ھالانی رد ءَ گوشگ بیتگ کہ آئی ءَ گوستگیں روچ ءَ وتی درد نہ سگ اتگ ءُ بیران بیتگ-

زانگ بہ بیت زاھدان ءَ سی ستمبر ءَ بازیں مردمے ایرانی لشکر ءِ تیرانی نشانگ ءُ کشگ بیتگ ات اَنت-