چہ ھزدار ءَ سَے ورناہ ءَ آوار جنگ ءَ پد بیگواہ کنگ بیتگ اَنت

بلوچستان ءَ زورانسری آوار جنی ءِ دْرچ یکشلہ برجاہ ءَ اِنت یک ھپتگے ءِ تہ ءَ ھپت ورناہ زورانسری آوار جنگ بیتگ اَنت- نوکیں ھالانی رِد ءَ بلوچستان ءِ دمگ چہ ھُزدار ءَ سے ورناہ زورانسری بیگواہ کنگ بیتگ اَنت-

دی بلوچستان پوسٹ ءِ پتر ءَ سربیتگیں ھالانی رِد ءَ ھُزدار ءَ چہ سول کالونی ءَ دو روچ ءَ ساری پاکستانی لشکر ءَ سے ورناہ عاصم مجید ، سکندر ءُ آصف زورانسری آوار جتگ اَنت-

اے ورناہ ھُزدار ءِ دمگ اسد آباد ءِ نندوک اَنت وھدے کہ شاپنگ سینٹر کار ءَ گوں ھمگرنچ اَنت-

زورانسری آوار جنی ءَ پد تنی وھدے اے درگت ءَ ھچ وڑیں ھال نہ رس اِتگ- اے درگت ءَ دمگی واکدار درشان ھم دیم ءَ نیتکگ اَنت-

زانگ بہ بیت بلوچستان ءَ یک ھپتگے ءِ تہ ءَ زورانسری آوار جنی ءِ ھپت وئیل نکش بیتگ اَنت اشی ءَ ساری چہ شال چار نودربر پاکستانی پوج ءَ بیگواہ کتگ اَنت چریشی ءِ پدری کھول ءَ کتگ اَنت-

اشی ءَ پد اے ورناھانی کھول ءَ واکدار نیمگ ءَ چہ ایف آئی آر نکش نہ کنگ ءِ شکایت کتگ-

چہ شال ءَ بیگواہ کنگ بیتگیں ورناھاں چہ سے یل کنگ بیتگ وھدے کہ یک نودربرے وحید سخی جھمنند آبسر تربت انگت بیگواہ ءَ اِنت- اِھوالکارانی رِد ءَ وحید سخی میٹرک نودربرے ءُ تیاری ءِ کنگ ءِ ھاتر ءَ شال ءَ بیتگ ءُ آ بیگواہ کنگ بیتگ-