گوادر پورٹ دیمروئی نہ اِنت لٹ پُل اِنت – ھک دو تھریک ءِ گوادر پورٹ ءِ دیم ءَ نندانک

بلوچستان ءِ تیاب دپی دمگ گوادر ءَ ھک دو تھریک ءِ نندانک برجاہ، مروچی ھزارانی کچ ءَ درنگاز کنوکاں سی پیک شھدگ ءِ سر ءَ نندانک جتگ ءُ گوادر پورٹ بند کتگ ءُ آئی بگیری ءَ اوگام جتگ –

بلوچ ءِ زر ءَ در کانودی ٹرالنگ، بلوچستان ءِ زورانسری آوار جتگیں مردمانی یل نہ کنگ، سیمسر ءِ پچ کنگ ءَ ھوار دگہ لوٹانی بگیری ءَ مروچی بیست ءُ چارمی روچ ءَ شھید لالا حمید چار راہ ءِ سر ءَ ھک دو تھریک بلوچستان ءِ نندانک برجاہ بوتگ –

ھمے میان ءَ نندانک ءَ درنگاز کنوکاں مزنیں کچے ءَ سراں کپن بستگ ءُ گوادر پورٹ ءِ بگیر ءَ اوگام جتگ گڈا ھمے وھد ءَ زالبولانی ھم مزنیں کچے ءَ اتکگ ءُ نندانک جاہ ءَ نشتگ انت –

گڈی ھالانی رِد ءَ تنی وھدی مزنیں کچے ءَ مردم گوادر پورٹ ءَ ھمگرنچیں دیمی زر ءِ ایکسپریس وے ءَ نندانک ءَ نشتگ انت –

ھمے وھد ءَ مولانا ہدایت الرحمن ءُ دگہ مردماں تران کنان ءَ گوشتگ کہ گوادر ءَ در کانودی ٹرالنگ ھلاس کنگ بہ بیت، بازارانی نزیک ءِ پانگس ھلاس کنگ بہ بنت، سیمسر ءَ ھمگرنچیں باپاری کنوکیں مردمانی جیڑہ گیشگیوار کنگ بہ بنت –

آھاں زورانسری آوار جنگ بوتگیں مردمانی یل کنگ ءِ لوٹ ھم کتگ ءُ گوشتگ کہ درسیں مردم وش ءُ سلامتی ءَ یل کنگ بہ بنت ءُ اے دیریگیں جیڑہ گیشگیوار کنگ بہ بیت ءُ نشہ ءِ باپاری ءِ بگیری ءَ جوانیں گامگیج زورگ بہ بیت –

آھانی گوشگ ات کہ اے پورٹ پہ مئے ھاتر ءَ نہ انت اشی ءِ برورد پنجاپ ءَ رسگ انت مئے بھر ءَ بس پوجی پانگس انت –

آھانی گوشگ ات کہ پرگینگی ءُ بنجاھی سرکار یک پاٹی ءِ دست ءَ بلیک میل بوتگ انت – اگاں آ گوں ما گند ءُ نند نہ کن انت گڈا گوادر پورٹ ءِ دیم ءَ نندانک برجاہ بیت اِنت –

درنگاز کنوکانی گوشگ ات کہ اے پورٹ پہ دیمروئی ءِ نہ اِنت لٹ پُل ءِ پورٹ اِنت ءُ ایشی ءَ ما نہ منّ ایں – مئے گور ءَ پہ ورگ ءَ آپ نیست ءُ آ اشی ءَ دیمروئی گش انت –