بولان یکشل ءَ پاکستانی پوج ءِ انگر ءَ اِنت، شپانکے کُشگ بیتگ

بولان کش ءُ گوراں پاکستانی لشکر ءِ نیمگ ءَ چہ لشکر کشی برجاہ ءَ اِنت- لشکر ءِ دست ءَ یک کُشگ بیتگ ءُ یک شپانکے ءِ لاش دزکپتگ-

گوستگیں روچ ءَ سانگان ءِ نزیک ءَ سفری ءِ ھند ءَ محمد غوث ء افضل خان مری ءِ لاش دزکپتگ کہ آ ستمبر 2021 ءَ آوار جنگ ءَ پد بیگواہ کتگ ءُ سے ماہ زورانسری بیگواھی ءَ پد یل کنگ بیتگ- انّی بولان ءَ برجاھیں لشکر کشی ءِ وھد ءَ کُشتگ-

مروچی ھپتمی روچ ءَ بولان لشکر ءِ انگر ءَ اِنت کہ اود ءَ جتائیں دمگاں چہ دگہ لاشانی دزکپگ ءِ ھال سر بیتگ بلے آیانی پدری نہ بیتگ-

بلوچ زالبول ءُ چُک تنی وھدے پاکستانی پوج ءِ کارندھانی دست ءَ اَنت کہ آیانی تہ سیزدہ مردم ءِ پجّار بیتگ اَنت- اے مردمانی سیادی چہ سمالانی ٹک ءَ اِنت وھدے کہ زورانسری آوار جنگ بیتگیں مردمانی کھول ھم ھوار اَنت-

گوستگیں روچ ءَ پاکستان پوج ءِ بنشون آئی ایس پی آر ءَ دمگ ءَ لشکر کشی پدری کتگ ءُ گْوشتگ کہ سلاہ بندیں میڑ ءَ دو ایس ایس جی کمانڈوز مرتگ – آئی ایس پی آر چار بلوچ آجوئی لوٹوکیں سلاہ بندانی جنگ ءِ ٹاہ ھم جتگ بلے آ دگہ رسانکدراں انگت تچکیں ھال نہ بیتگ اَنت-

اشی ءَ پد بلوچ لبریشن آرمی ءِ جارکش جیئند بلوچ ءَ درشان شنگ کتگ ءُ گْوشتگ کہ میڑ ءَ پاکستان پوج ءِ ھشت ایس ایس جی کمانڈوز جتگ-

دومی نیمگ ءَ اے دمگاں روگ ءُ آھگی سرجمیں راہ ءُ در بند بوگ ءِ سبب ءَ دمگ ءَ ورگی توژگ کمی ودی بیتگ- میتگانی سر ءَ تُرندی کنگ بوگ ءَ اِنت- ھمے میان ءَ نادُراھاں تُرندیں دلسیاھی ءِ دیمپانی اِنت کہ آیاں دوا درمان ءُ ڈاکٹرانی گور ءَ روگ ءَ نیلگ اَنت-

گوستگیں روچ ءَ چاگردی رسانکدر ٹوئیٹر ءَ بولان لشکر کشی ءُ چک ءُ زالبولانی آوار جنگ ءِ بگیری ءَ یک کمپئینے برجم دارگ بیتگ چریشی ءِ آسر ءَ جتائیں پڑ ءِ مردماں وتی ھیال درشان کتگ اَنت-