گوادر ءَ ڈاکٹر عزیز بلوچ ءِ اولی سالروچ ءِ درگت ءَ مراگش

گوستگیں روچ ءَ سَے نومبر ءَ بلوچستان ءِ تیاب دپی دمگ گوادر ءَ جیوز ءِ چیر دستی ءَ انسانی کمکار، پوریاگرانی ھک ءُ چاگردی جھدکار نمیرانیں واجہ ڈاکٹر عبدالعزیز بلوچ ءِ اولی سالروچ ءِ درگت ءَ یاتگیری مراگشے برجم دارگ بوتگ – مراگش ءَ گْوادر ءِ وانگ ءُ زانگ، چاگردی، لبزانکی ءُ راجکاری پڑاں گوں سیادی داروکاں ھوار لس مردماں بھر زُرتگ-

مراگش ءَ وھاب مجید، ناصر سھرابی، کھدہ علی، الہی بخش الھین، خدا بخش ءُ ڈاکٹر رئیسہ عزیز وتی ھیال درشان اِتگ انت – مراگش ءَ ترانکاراں ڈاکٹر عزیز بلوچ ءِ رُژناہ پگری، بلوچ راجکاری ءُ جھانی سھریں دیمرئی دوستیں آشوب ءَ گوں داں گُڈی وھد ءَ مھکمی ءَ ھمگرنچ بوھگ، چاگردی بروری، پوریاگرانی اُگبال ءُ کمکاری ءِ سر ءَ ساڑاھی تران کُتگ –

آھانی گوشگ ات کہ نمیرانیں ڈاکٹر عزیز بلوچ دائم گیر آرگ بیت ءُ آئی ءِ جھد ھچ بر بےھال کنگ نہ بنت-

مراگش ءَ بھر زورکانی گوشگ ات کہ ما بس آئی ءِ درور ءَ دات کنیں کہ آئی ءَ ھر پڑا مارا گھگیری ءَ سوج داتگ ، آئی مارا ڈسکریج نہ کتگ بلکنہ مارا کمک کتگ – آھانی گوشگ ات کہ ڈاکٹر جوانیں ءُ زانتکارے مردمے ءَ ات ھاوند پشکپتگیناں ھمے زانت زانگ ءَ بہ دنت –

آھانی گوشگ ات کہ ڈاکٹر گریب دوست ءُ انسان دوستیں مردمے بوتگ آئی زند پہ بلوچ راج ءِ کمکاری ءَ گوستگ – ڈاکٹری بہ بیت، راجکاری یا کجام ھم دروشم ءَ آئی ءَ وتی زند پہ بلوچ راج ءَ ندر کتگ – آئی ءِ پگر ھمے بیتگ کہ منی بلوچ راج پدمنتگ مہ بیت دیما در بہ ایت دیمروئی بہ کنت –

مراگش ءَ بھر زوروکیں ءُ مراگش ءِ جار چین کے بی فراق ءِ گوشگ ات کہ پوریاگر ایکٹوسٹ، سوشل ایکٹوسٹ ، مارکسٹ کجام ھم کارست ءِ بہ بیت آ وتی پگر ، وتی اسکول آف تھاٹ ءَ کجام رنگ ءَ وتی چاگرد ءَ گوں ھمگرنچ کنت ، زاھر انت آئی زند جاور ھال ءِ بیت ، ھما چاگرد ءَ کہ مھلوک زند گوازینگ انت آ چاگرد کہ برزی ءُ جھلی سر ءَ بہ بیت مزنی کسانی ءِ زات ءُ زریات سر ءَ بہ انت یا شاؤنسٹ بیس ءِ بداریت زاھر انت اشی ءِ پیلو ءِ بیت آ آئی ءَ چیلنج کنت گڈا چیلنج کنگ ءِ بنیات ءَ اول ڈاکٹر ءِ جند ءَ وت ءَ ھمے جاور ھال ءَ گوازینتگ وت ءَ ھمے جاہ ءَ ساڑی کتگ کہ آ اے چاگرد ءَ چی رنگ ءَ بدلی ءِ دروشم ءِ بہ دنت ایں –