بولان مروچی چارمی روچ ءَ ھم پوج ءِ انگیر برجا، شدکشی ءِ گمان

بلوچستان ءِ دمگ بولان ءَ مروچی چارمی روچ ءَ ھم پوج ءِ لشکر کشی برجاہ بوتگ – اے ھم ھال آیگ انت کہ پوج ءَ بولان ءِ بازیں دمگ سرجمی ءَ انگیر کتگ ءُ رؤگ ءُ آیگ ءِ سرجمیں راہ ءُ در بند کتگ انت – ھمے میان ءَ بازیں بالگرد ھم تر ءُ گرد ءَ گندگ بوتگ انت –

دمگی اھوالکارانی رِد ءَ رؤگ آیگ ءِ سرجمیں راہ ءُ درانی بند بوگ ءِ سوب ءَ دمگ ءِ تہ ءَ وردنی راشن ءِ ڈکال انت – سرجمیں دمگ ءَ کرفیو انت – مھلوک انگیر ءِ تہ ءَ انت اے میان ءَ نادراہ ھم سک باز دلسیاہ انت کہ پہ آھاں درمان ءُ ڈاکٹرانی گور ءَ رؤگ ءَ نیلگ ءَ انت –

دمگی اھوالکار ءِ رِد ءَ سرجمیں دمگ وھد وھد ءِ سر ءَ بمب تراکانی توار ھم آیگ ءَ انت – چریشی ءِ سوب ءَ لس مھلوک ءِ جان ءُ مال ءِ تاوان ءِ ھال ھم آیگ انت –

اھوالکار ءِ رِد ءَ اے ھم ھال آیگ انت کہ کوھی دمگاں گلہ ءِ کشت ءُ کشانی کنوکیں دھکانکار چہ گساں در کنگ بوگ انت ءُ آھاں تیرباران کنگ ءُ کُشگ انت – ھمے گمان کنگ بوگ ءَ انت کہ لس مردم بلوچ سرمچار زاھر کنگ بنت –

گوستگیں روچ ءَ پاکستانی پوج آئی ایس پی آر ءَ دمگ ءِ تہ ءَ لشکر کشی ءِ ھبر راست کتگ ءُ گوشتگ کہ جنگ چوپ ءَ دو ایس ایس جی کمانڈو مرتگ انت – آئی ایس پی آر ءَ چار بلوچ سلاہ بندانی کوش ءِ ٹاہ ھم داتگ ات بلے تنی وھدی دمگی اھوالکارانی نیمگ ءَ اے ھبر راست کنگ نہ بوتگ –

لشکر کشی بولان ءِ دمگ کمان، اوچ کمان، یخو، بزگر ءَ ھوار ھرنائی ءِ کوھی دمگاں کنگ بوگ ءَ انت وھدیکہ مروچی سبی ءِ کوھی دمگاں ھم بالگردانی تر ءُ گرد ءِ تہ ءَ گیشی گندگ بوتگ –

بولان ءُ کش ءُ گوراں لشکر کشی ھنچیں وھدے ءَ کنگ بوتگ کہ بلوچ لبریشن آرمی ءَ گوستگیں روچاں دزگیر کتگیں دو پاکستانی پوجی کارمندانی یل کنگ ءِ بدل ءَ وتی لوٹانی گڈی مھلت چار نومبر داتگ ات –
یات بہ بیت کہ ھمے سال ءِ بیست ءُ پنچ ستمبر ءِ شپ ءَ ھرنائی ءِ دمگ زردآلو ءِ ھند ءَ سلاہ بندیں مردماں بنجاھی شھدگ بستگ ات گاڑی پٹ پول کتگ ات انت ءُ پجار کنگ ءَ پد دو مردم دزگیر کتگ ءُ گوں وت برتگ اِتنت – وھدیکہ سلاہ بندیں مردماں اشکر بروکیں چار ٹرکانی ٹائر ھم تراکین اِتگ اتنت –

اے وئیل ءِ پد پاکستانی پوج ءَ لشکر کشی بندات کتگ ات کہ اے لشکر کشی ءَ دو بالگرداں ھم بھر زرتگ ات کہ آھانی تہ ءَ یک بالگرد ءِ سلاہ بندیں مردماں جتگ ءُ چگل داتگ ات، بالگرد کپگ ءَ پاکستانی پوج ءِ شش کارمند مرتگ اتنت –

اے مردمانی دزگیری، بالگرد ءِ جنگ ءُ دور دیگ ءُ اشکر بروکیں ٹرکانی سر ءَ بوتگیں اُرش ءِ زمہ واری بی ایل اے ءَ منّ اِتگ اتنت –

بلوچ لبریشن آرمی ءِ جارکش جیئند بلوچ ءَ پدا رند ءَ وتی داتگیں درشان ءِ تہ ءَ بلوچ راجداریں باسکانی یل کنگ ءِ بدل ءَ پوجی کارمندانی یل کنگ ءِ گپ جتگ ات –

گوستگیں روچاں بی ایل اے ءَ وتی یک دگہ درشان ءِ تہ ءَ پاکستانی پوجی کارمندانی یل کنگ ءِ وتی لوٹانی منگ ءِ ھاتر ءَ پاکستانی پوج ءَ ھپتگے ءِ مھلت داتگ ات – جارکش ءَ گوشتگ ات کہ اے مھلت ءِ ھلاس بوگ ءَ پد بی ایل اے دزگیر کتگیں جنگی بندیگ جونیئر کمیشنڈ آفیسر کلیم اللہ ءُ ملٹری انٹلجنس ایجنٹ محمد فیصل ءَ بلوچ راجی آمیدگس ءِ نیمگ ءَ دیگ بوتگیں شزایے سر ءَ گامگیج زوریت –

زانگ بہ بیت بلوچ راجدوستیں گل ءُ انسانی ھکانی بازیں گل مدامی پاکستانی پوج ءِ سر ءَ ھمے الزام ءَ جنگ ءَ انت کہ بلوچ سرمچارانی ھاترءَ لشکر کشی ءِ نام ءَ پاکستانی پوج بلوچستان ءِ کوچگاں جاھمنندیں مھلوک ءِ سر ءَ بمبگواری کنت ءُ ھمے میان ءَ دزگیر کتگیں ءُ بیران بوتگیں ءُ مردماں بلوچ سرمچار زاھر کنت –