گوریچانی کوریا ءِ میزائل چکاس زرباری کوریا ترس ودیتگ

گوریچانی کوریاں اولی رند ءَ یک ھنچیں بیلسٹک میزائلے ءِ چکاس کتگ ھمساھگیں ڈیھ زرباری کوریا ءِ زر ءِ لمب ءَ کپتگ زرباری کوریا ءَ اے دمگ ءِ سر ءَ یک اُرشے گشتگ-

برطانیہ ءِ ھبر رساں ادارہ روئٹرز ءَ زرباری کوریا ءِ جوائنٹ چیفس آس اسٹاف ءِ درور دیان ءَ گوشتگ کہ چار شمبے ءِ روچ ءَ تیابدپی دمگ وانسن ءِ ھند ءَ کم پند ءَ آس دیگ بیتگیں میزائل آس دیگ بیتگ-

دومی نیمگ ءَ زرباری کوریا ءِ سروک یون سوکیول ءِ کارگس ءَ چہ شنگ بیتگیں درشان ءَ گوشگ بیتگ ’ گوریچانی کوریا ءِ نیمگ ءَ سیمسرانی بھر ءُ بانگی ءَ پد اولی رند ءَ وسرا میزائل ءِ آس دیگ دمگ ءِ سر ءَ اُرشی اِنت ‘-

زرباری کوریا ءِ واکدارانی گوشگ اِنت کہ میزائل زر ءَ چہ شست کلو میٹر کم پند ءَ کپتگ کہ ھردوکیں ڈیھانی میان ءَ آڑوکیں سیمسرانی اِنت –

میزائل زرباری کوریا ءِ شھر سوکچو ءَ پنجاہ ءُ ھپت کلو میٹر دور رودراتکی زر ءَ کپتگ کہ اے دمگ الوائنگ ءَ یک سد ءُ نود ءُ ھپت کلو میٹر ءِ دوری ءَ اِنت-

میزائل ءِ کپگ ءَ پد زرباری کوریا ءَ واکداراں برزی اُرشانی بیھار داتگ ءُ سائرن جتگ –

الوئنگ ءِ واکداراں روئٹرز ءَ گوں گوشتگ کہ ’ ما سھب ءِ ساھت ھشت ءُ پنجاہ ءُ پنچ دمان ءَ سائرن اشکتگ ءُ سرجمی ءَ مھکمیں جاھاں اتکگ اِنت ءُ دانکہ ھمود ءَ بوتگ اِنت کہ دانکہ اے ھال نیتکگ اے میزائل ءِ زر ءَ کپتگ-

زرباری کوریا ءِ لشکر ءِ جارکش ءَ گوشتگ کہ اے وئیل ءِ بارو ءَ پٹ ءُ پول کنگ ءَ ایں ءُ ھمے وڑ گوریچانی کوریا ءِ جوائنٹ چیفس آف اسٹاف ءِ گوشگ اِنت اے اولی رند اِنت کہ گوریچانی کوریا ءِ نیمگ ءَ آس دیگ بیتگیں میزائل زرباری کوریا ءِ زر ءَ کپتگ-

آئی ءَ گوشتگ کہ مئے لشکر زرباری کوریا ءُ امریکہ ءِ ھمسنتیں بیڑاں ھچ بر اوپار کرت نہ کنت الم پسو دیگ بیت اِنت-

پھزداری زانتکار ءُ انٹرنیشنل انسٹیٹیوٹ فار سٹریٹیجک سٹڈیز ءَ بندوکیں جوزف ڈیمپسی ءَ نوکتریں یک پٹ ءُ پولی پوسٹے ءَ نبشتہ کرتگ کہ گوریچانی کوریا ءَ زربار ءُ رودراتک ءَ ھوار میزائلانی آس دیگ ھرچ تک ءَ نہ اِنت-

زانگ بہ بیت گوریچانی ءُ زرباری کوریا ءِ میان ءَ سٹکی ھست اَنت ءُ گوریچانی کوریا ھروھد ءَ میزائلانی چکاس ءَ کنگ ءَ اِنت بلے ات نشانگ کنگ ءِ میزائل اولی رند ءَ دیم ءَ اتکگ بیتگ ھمے وڑ ءَ گوریچانی کوریا جوھری سلاھانی سر ءَ ھم کار کنگ ءَ اِنت کہ روکپتی ڈیھاں ترس ءِ آماچی اَنت-

امریکہ ءُ دگہ ڈیھ تچک ءَ زرباری کوریا ءِ ھمراھداری ءَ کنگ ءَ اَنت ءُ گوریچانی کوریا ءَ چہ وت ءَ ترس اَنت-