بلوچستان ءِ دمگ بولان ءَ مروچی سھب ءَ پاکستانی پوج ءَ بیڑ بُرتگ، جتاھیں ھندانی تہءَ ھیلی کاپٹر آزمان ءَ گردگ ءَ گندگ بیتگ۔
اھوالانی ردءَ بولان ءِ جتاھیں ھنداں بزگر، گمبدی، کمان ءُ کَش ءُ کِراں گن شپ ءُ دگہ ھیلی کاپٹرانی تر گرد برجاہ اِنت وھدیکہ سبی ءَ ھم پوج پیش گامی کنگ ءَ اِنت۔
بلے داں انگت ھچ پئیمیں تاوانانی اھوال سر نہ بیتگ وھدیکہ واکدارانی نیمگ ءَ اے درگت ءَ ھچ پئیمیں لیکہ دیما نئیتکگ۔
یات بہ بیت گوستگیں ماہ ءَ ھرنائی ءِ ھند زردآلو ءِ جاہ ءَ سلاہ بندیں مردماں بنجاھی دگ بستگ اَت ءُ گاڑیانی پَٹ ءُ پول ءِ نیام ءَ دو مردمانی پجار چارگ ءَ پد وتی ھمراہ بُرتگ اِت اَنت، وھدیکہ سلاہ بنداں کوئلہ بروکیں چار ٹرکانی ٹائر ھم تراکینتگ اِت اَنت۔
ھمے وئیل ءَ پد پاکستانی پوج ءَ بیڑ بندات کُتگ اَت کہ آ بیڑءَ بھر زیروکیں دو ھیلی کاپٹراں چہ یکے سلاہ بندیں مردماں نشانگ کُتگ ءُ دور داتگ اَت۔
ھیلی کاپٹر ءِ تباہ بئیگ ءِ سوب ءَ پاکستانی پوج ءِ شش کارمند مُرتگ اِت اَنت۔
ھمے کاروائی ءِ زمہ واری بلوچ لبریشن آرمی ءَ من اِتگ اَت۔ جارکش جیئند بلوچ ءَ گُشتگ اَت کہ اے اُرش چیریں اھوالانی پدءَ بی ایل اے ءِ اسپیشل ٹیکٹیکل آپریشنز اسکواڈ ءَ کُتگ۔
پدءَ گل ءِ جارکش جیئند بلوچ ءَ درشانے شنگ کنان ءَ گُشتگ اَت یک پیشہ ور اور زمہ واریں پوج ءِ پئیمءَ، بلوچ لبریشن آرمی ءِ سینئر کمانڈ کونسل ءَ نی پاکستانی پوج ءَ گوں بندیگانی مٹ ءُ بدل کنگ ءِ پرمان داتگ۔ بی ایل اے میان اُستمانی کنونشنز ءُ جوڑ کُتگیں جنگی رھبنداں من اِیت۔ بلوچ راج ءِ یک زمہ واریں راجی تاگت دروشم ءَ بی ایل اے مھذبیں جھانیں درستیں قانود ءُ رھبندانی سرءَ کاربند بیت اِنت۔
آئی ءَ گُشتگ اَت کہ بی ایل اے بلوچ سیاسی بندیگانی یل کنگ ءِ بدل ءَ دوھیں دزگیریں بندیگانی یل کنگ ءَ ساڑی اِنت۔ بلے، اگں ھمے نیام ءَ پاکستانی پوج کجام ھم پئیمیں زوراکی پیش دارگ ءِ کوشست کنت گُڑءَ اے بندیگاں بلوچ راجی آمید گِس ءِ نیمگ ءَ داتگیں سزا ءِ سرءَ زیت ءَ زیت گام زیرگ بیت۔
جیئند بلوچ ءَ دو روچ پیسر شنگ کُتگیں درشانے ءِ تہءَ گُشتگ کہ بی ایل اَے سینئر کمانڈ کونسل ءَ اے پیسلہ کُتگ کہ پاکستانی پوجیاں دگہ یک ھپتگے ءِ موہ دیگ بیگ ءَ اِنت۔ اے وھد ءِ سرجم بیگ ءَ داں اگں پاکستانی پوج ءَ پدریں ءُ جوانیں گام نہ زرت گُڑءَ 4 نومبر 2022 ءَ بندیگ کلیم اللہ ءُ بندیگ محمد فیصل ءِ سزا ءِ سرءَ گام زیرگ بیت اِنت۔