روکپتی بلوچستان: پنچ نودربر بیگواہ، نودربرانی زھرشانی

روکپتی بلوچستان ءِ بنجاھی شھر زاھدان یونیورسٹی ءَ چہ پنچ نودربر بیگواہ، نودربرانی زھرشانی-

زاھدان یونیورسٹی ءَ چہ زیک ءَ بہ گر داں مروچیگ ءَ شش نودربر آوار جنگ بیتگ اَنت کہ اشانی توک ءَ دو بچک ءُ سَے جنک ھوار اَنت-

آوار جنگ بیتگیں نودربرانی پجار مھدی ءُ سھیل ءِ ناماں زانگ بیتگ اَنت ءُ دگہ دو جنکانی پجار نہ بیتگ اَنت-

ھمے وڑ ءَ چد ءُ پیسر بزانکہ گوستگیں روچ ءَ زاھدان ءَ دولتی نرجس ءَ ھم یک جنکیں نودربرے ایرانی چیریں ادارھاں آوار جتگ ءُ بیگواہ کرتگ –

آئی ءِ پجار یاسمین ءِ نام ءَ زانگ بیتگ ءُ چریشی ءَ پیش پیش ؤانگجاہ ءِ پرنسپل رھوت کنگ بیتگ ءُ پد ءَ چیریں ادارھاں وانگجاہ ءِ سر ءَ بیڑ برتگ ءُ یاسمین آوار جتگ ءُ بیگواہ کرتگ-

ھالانی رد ءَ مروچی دگہ چار نودربرانی آوار جنگ ءِ ھلاپ ءَ زاھدان سائنسز آف میڈیکل یونیورسٹی ءِ نودربراں زھرشانی کتگ ءُ یونیورسٹی انتزامیہ ءِ گیٹ ءِ دپ ءَ اوگام جنان ءَ نودربرانی یل کنگ ءِ لوٹ کتگ-

زانگ بہ بیت گوستگیں روچ ءَ ھم زاھدان میڈیکل آف سائنسز ءِ نودربر نادر آسکانی چیریں ادارھاں آوار جتگ ءُ برتگ ات-

روکپتی بلوچستان ءَ ودی بیتگیں شورش ءَ پد بازیں کچے ءَ مردمانی آوار جنگ ءُ بیگواہ کنگ ءِ درچ یکشل ءَ برجاہ اَنت-

آیانی گوشگ اِنت اے نودربرانی سر ءَ ایرانی چیریں ادارھانی بھتام اِنت کہ آیاں زھرشانی ءُ دگہ دگہ ناشریاں بھر زرتگ-