دروگیں میڑاں آوار جنگ بوتگیں مردمانی کوش ءِ بگیری ءَ لاہور ءُ نوشکی ءَ زھرشانی

بلوچستان ءِ دمگ نوشکی ءُ پنجاپ ءِ شھر لاھور ءَ بلوچ یکجھتی کمیٹی ءُ بی ایس او پجار ءِ چیردستی ءَ سی ٹی ڈی ءِ دست ءَ دروگیں میڑاں زورانسری آوار جنگ بوتگیں مردمانی کوش ءُ ملتان نشتر نادراھجاہ ءَ ناشناسیں جونانی دست کپگ ءِ بگیری ءَ زھرشانی ءُ روانک کشگ بوتگ –

لاھور ءَ بلوچ یکجھتی کمیٹی ءِ نیمگ ءَ چہ لبرٹی چار راہ ءَ زھرشانی روانک ءِ کشگ بوتگ کہ اودا جنین ءُ مردیناں مزنیں کچے ءَ بھر زرتگ – درنگاز کنوکانی دست ءَ بیگواھیں مردمانی اکس ءُ پلے کارڈ بوتگ انت کہ آھانی سر ءَ بلوچ چکچینی ءِ بگیری ءَ نارہ نبشتہ بوتگ انت –

درنگاز کنوکاں نشتر نادراھجاہ ءَ دست کپتگیں ژانگولیں جونانی ڈی این اے کنگ ءُ پٹ پولی کمیشن ءِ جوڈ کنگ ءُ راستی ءِ دیما آرگے لوٹ کتگ –

لاھور ءَ بلوچ درنگاز کنوکانی گوشگ ات کہ گوستگیں دو دھکاں وڈ وڈا بلوچ ءِ کُشت کوش کنگ بوگ ءَ انت ما گمان کنگ ءَ انت کہ نشتر نادراھجاہ ءَ دست کپتگیں جون بیگواھیں بلوچانی بوت کن انت ھمے ھاتر ءَ ما لوٹ کن ایں کہ آھانی پجار کنگ بہ بیت ءُ اشی ءَ ھواریں درسیں مردمانی بگیری ءَ کانودی کار کنگ بہ بیت – بلوچ ءِ کُشت کوش ءِ اولی وئیل نہ انت چدوساری سال دوھزار چار ءَ توتک ھزدار یکجاھیں کبرے ءَ یکسدو شست ءُ نُھ جون دست کپتگ انت کہ روچ مروچی آھانی پجار نہ بوتگ ءُ ناکہ اے کشت کوشاں ھواریں کتکار شزا دیگ بوتگ انت بلکنہ آ گیشتر مھکم کنگ بوتگ انت –

درنگاز کنوکانی گوشگ ات کہ گوستگیں دو دھکاں وڈ وڈا بلوچ ترسینگ بوگ ءَ انت بلوچ ءِ چکچینی بوگ ءَ انت – سی ٹی ڈی ءِ دست ءَ زورانسری آوارجنگ بوتگیں مردمانی کوش ءِ تہ ءَ گیشی آیگ انت – چدوپیسر زیارت ءَ نُھ بیگواھیں بلوچ دروگیں میڑ ءَ کشگ بوتگ انت ھمے گوشگ بوتگ کہ سلاہ بند بوتگ انت کہ سرا سر دروگ انت اے درگت ءَ سرکار ءَجوڈیشل کمیشن ھم جوڈ کنگ بوتگ بلے آئی ءِ ھچ وڈیں انکوائری نہ بوتگ ءُ ناکہ کتکار شزا دیگ بوتگ انت بلے اے درچ ءِ گیشی آرگ بوتگ –

آھانی گوشگ ات ھمے ماہ ءَ اکتوبر ءَ مستونگ ، نوشکی ءُ ڈیرہ مراد جمالی ءَ دروگیں میڑے نام ءَ سینزدہ زورانسری آوار جنگ بوتگیں مردمانی جون چگل دیگ بوتگ انت – ما ھمے پھمیں اگاں اے کُشت ءُ کوشانی سر ءَ توار چست کنگ نہ بوت بلوچ چکچینی ءِ ھمے وڑ ءَ برجاہ بیت اِنت –

دومی نیمگ ءَ بلوچستان ءِ دمگ نوشکی ءَ بی ایس او پجار ءِ چیر دستی ءَ زورانسری آوار جنگ بوتگیں مردمانی دروگیں میڑ ءَ کوش ءِ بگیری ءَ زھرشانی کنگ بوتگ –

زھرشانی ءَ مزنیں کچے ءَ مردماں بھر زرتگ – ترانکارانی گوشگ ات کہ جونانی چگل دیگ ءَ راج ھلاس نہ بنت ھمے ھاتر ءَ اے درچ بند کنگ بہ بیت – وھدیکہ ریاست وت وتی کانوداں لگتمال کنت گڈا آ ریاست ءِ تہ ءَ ایمنی نہ ایت درکانودی سیاسی باسکانی آوار جنگ ءُ دروگیں میڑاں آھانی کُشگ کانودانی لگتمالی یے –

آھانی گوشگ ات کہ سی ٹی ڈی کانودانی لگتمالی ءُ کشت کوشی ءِ ادارھے جوڈ کنگ بوتگ کہ بے نپیں گامگیج یے –

آھانی گوشگ ات کہ تابش وسیم ءِ جرم ھمے بوتگ کہ آ سیاسی باسک ءُ شائرے بوتگ کہ آئی ءَ زانت لوٹ اتگ کہ گوستگیں روچاں اوار جنگ ءُ پدا جون چگل دیگ بوتگ –

آھانی گوشگ ات کہ جنرل مشرف ءَ ھما آس بلوچستان ءَ روک کتگ ھما آس ءِ جمبور کنگ ءَ دورگیں میڑاں مردم کشگ بوگ ءَ انت کہ سرا سر زلم انت – اے ورنایانی ھونانی زمہ کئی سرا کئیت کئیا چہ ھساب گرگ بہ بیت – ھما وفاقی وزیر نمائندگاں کہ کھولانی نندانک ءَ کائینت ءُ کول کن انت کہ نوں جون دست نہ کپ انت یا ھما وتگڑیں اسمبلی ءَ کہ سرکار بھر انت –

آھانی گوشگ ات کہ بلوچستان ءِ جیڑہ پہ لاشانی چگل دیگ گیشگیوار نہ بنت – بلوچستان ءِ جیڑو سیاسی جیڑویے آ پہ ٹیبل ٹاک ءَ گیشگیوار بیت اِنت بلے وتگڑیں ھاکماں گوں بلوچاں ناں بلکنہ بلوچ ءِ مال ءُ مڈیانی زلورت انت –

لاھور ءُ نوشکی ءِ درنگاز کنوکاں انسانی ھکانی گلاں چہ لوٹ کتگ کہ آ بلوچ چکچینی ءِ ھاتر ءَ گامگیج بہ زور انت ءُ آوار جنگ بوتگیں مردمانی یل کنائینگ ءَ وتی کرد ءَ پیلو بہ ہن انت –