تربت ءَ سلاہ بندیں مردماں آئل ٹینکر ءِ سر ءَ اُرش کتگ

بلوچستان ءِ دمگ کیچ ءَ ناشناسیں سلاہ بندیں مردماں ٹیل بروکیں گاڑی ءِ سر ءَ اُرش کتگ-

گاڑی ءِ سر ءَ اُرش تربت ءِ دمگ ڈنک ءَ بنجاھی شھدگ ءِ سر ءَ کنگ بوتگ – بنداتی ھالانی رِد ءَ اُرش ءَ ٹینکر ءَ تاوان رستگ وھدیکہ ڈرائیور ھم زدگ بوتگ –

دمگی اھوالکارانی رِد ءَ اے ٹینکر پاکستانی نیوی ءِ ھاتر ءَ ٹیل سر کنگ ءَ بوتگ بلے تنی وھدی واکدارانی نیمگ ءَ اے درگت ءَ ھچ وڈیں ھال شنگ کنگ نہ بوتگ –

گوست ءَ تربت ءُ کش ءُ گوری دمگاں بوتگیں اے دابیں اُرشانی زمّہ واری بلوچ آجوئی لوٹوکیں سلاہ بندیں گلاں منّ اِتگ انت بلے اے اُرش ءِ زمّہ واری تنی وھدی ھچ گل ءَ نہ منّ اِتگ –