چہ ملتان ءَ دست کپتگیں کنٹانی جاور ءُ پوشاکاں زانگ بیت کہ کنٹ زوربیگواھیں بلوچانیگ اَنت-بی این ایم

بلوچ نیشنل مومنٹ ءِ جارکش ءَ وتی درشان ءَ گْوشتگ چہ ملتان ءِ نادْراھجاہ ءَ دست کپتگیں کنٹانی جاور، پوشاک ءُ ھما رنگ ءَ کہ آ سرپچیں جاھے چگل دیگ بیتگ اَنت چہ ایشی ءَ مارا ترس اِنت کہ اے کنٹ زور بیگواھیں بلوچانی بیت کن اَنت۔

آئی ءَ گْوشتگ آدینگ ءِ روچ ءَ چاگردی رسانکدر ءَ دلپدرد کنوکیں تامر ءُ اکسانی پجیگ ءَ اے ھال شنگ بیتگ کہ چہ نشترنادْراھجاہ ملتان ءِ بان ءِ سر ءَ پنچ سد ءِ نزیک ءَ بے کسیں مردمانی ژانگولیں کنٹ دست کپتگ۔اے کنٹ چہ انسانی منگہ ءِ چپی ءَ بان ءِ سر ءَ چگل دیگ بیتگ اَنت کہ آیانی گوشتاں جونوار ءُ کانگی چونڈگ ءَ بیتگ اَنت۔اے کنٹ پنجاب ءِ سر وزیر ءِ شورکار ’تارک گجر‘ ءَ پدر کرتگ اَنت بلے چہ ایشی ءَ پد ھم پاکستانی رسانکدر ءَ اے ھال چیر داتگ چہ ایشی ءَ ھم زانگ بیت کہ راست پاکستانی ادارھانی بگیری ءَ اِنت پمیشکا چیر دیگ بیگ ءَ اِنت۔

’ھمے ماہ ءَ چہ پنجاپ ءَ 168 پجارگ نہ بیتگیں مردمانی کنٹ دست کپتگ کہ بے کس لیکگ ءُ گمسار کنگ بیتگ اَنت۔‘

آئی ءَ گْوشتگ چہ پنجاپ ءَ مزنیں کچے ءَ پجارگ نہ بیتگیں مردمانی کںٹ دست کپگ ءَ اِنت کہ آ اود ءَ گْوستگیں زمانگ ءَ ھم بلوچ سیاسی زندانی آزارجاھاں بند کنگ بیتگ اَنت۔مارا ھمے ترس اِنت کہ اے کنٹ زور بیگواھیں مردمانیگ اَنت کہ آیاں وتی جاندْراھی پڑ ءِ نودربرانی وانینگ ءَ نام گیپتگیں نادْراھجاہ ءَ داتگ اَنت۔ اے گپ ھمے نادْراھجاہ ءِ ترامکاراں ھم من اتگ کہ اے کنٹ پاکستان ءِ سرکاری پھزداراں نادْراھجاہ ءَ آؤرتگ اَنت۔ کنٹ انچوش ٹپ ءُ ٹور بیتگ اَنت کہ سارتجاہ ءَ ایر کنگی نہ بیتگ اَنت پمیشکا پہ آیانی ھشک ءُ کانپولینگ ءَ آ بان ءِ سر ءَ ایر کنگ بیتگ اَنت داں چہ ھڈاں گوشت گستا بہ بیت ءُ ھڈ پہ نودربرانی سر ءُ سوج ءَ کارمرد کنگ بہ بہ اَنت۔

جارکش ءَ گْوشتگ پیش ءَ ھم بلوچ ءَ وتی اے ترس ءُ گمان پدر کرتگ کہ پنجاپ ءَ اینچکیں مزنیں کچے ءَ بے کسیں مردمانی کنٹانی دست کپگ کسانیں گپے نہ اِنت کہ نادلگوش کنگ بہ بیت پمیشکا میان استمانی راج ءُ مردمی اگبالانی پانکجن پاکستانی سرکار ءِ سر ءَ زور بہ دئے اَنت کہ آ پہ اے کنٹانی پجا آرگ ءَ ’ڈی این اے‘ آزمائش بہ کن اَنت۔