پاکستان ءِ پرگینگ پنجاب ءِ شھر ملتان ءِ نشتر نادراھجاہ ءِ چھت ءِ سرءَ بازیں جون دزکپتگ اَنت، جون چہ نشتر نادراھجاہ ءِ ڈیڈ ہاؤس ءِ چھت ءَ دزکپتگ اَنت۔
چاگردی رسانکدراں شنگ بیتگیں عکسانی تہءَ گندگ بیت کہ جون کپتگ اَنت۔ مردمانی گُشگ اِنت کہ دزکپتگیں جونانی کساس پنچ سدءَ گیشتر اِنت وھدیکہ نادراھجاہ ءِ واکداراں اے کساس رد کُتگ۔
دومی نیمگ ءَ بلوچ سیاسی ءُ چاگردی تکانی نیمگ ءَ اے گمان دیما پیداک اِنت کہ اے جون بیگواھیں مردمانی بیت کن اَنت۔
چاگردی رسانکدرانی تندجاہ ٹوئٹر ءِ سرءَ بلوچ اھوالکار کیّا بلوچ ءَ نبشتگ کہ پنچ شمبے ءَ ملتان ءِ نشتر نادراھجاہ ءِ چھت ءِ سرءَ بازیں بے وارثیں جون دزکپتگ اَنت۔ پَٹ ءُ پولی ٹیم پولکاری کنگ ءَ اِنت بلے اے کچ ءَ جون کئے ءَ نادراھجاہ ءَ سرکُتگ اَنت، زاناں ھچ کس ءَ نہ دستگ اَنت؟ نادراھجاہ ءَ زاناں CCTV کیمرہ نیست اَنت؟ بازیں جونانی پُچاں چہ گندگ بیت کہ چُشیں پُچ بلوچ گورءَ کن اَنت۔
وھدیکہ نادراھجاہ ءِ واکدار اے گپاں رد کنگ ءَ اَنت۔ نشتر نادراھجاہ ءِ جارکش ڈاکٹر سجاد ءِ گُشگ اِنت کہ نادراھجاہ ءِ چھت ءِ سرءَ بے وارثیں جونانی کساس چار بیتگ۔ جارکش ءِ ردءَ قدرتی پئیم ءَ ھشک کُتگیں جون نودربرانی وانگ ءِ ھاترءَ بنت۔
دومی نیمگ ءَ بے وارثیں جونانی دزکپگ ءِ سرءَ نادراھجاہ ءِ اناٹومی تک ءِ سروک ءِ لیکہ دیما اتکگ کہ بے وارثیں مردمانی جون پیوری فیکیشن ءِ عمل ءَ چہ گوازینگ بنت ھمے ھاترءَ آ چھتانی سرءَ ایر کنگ بنت۔
پنجاب ءِ سر وزیر ءِ نوٹس گرگ ءَ پد نشتر میڈیکل یونیورسٹی ءِ وائس چانسلر پروفیسر ڈاکٹر مہناز خاکوانی ءَ ھم سئے مردمی پَٹ ءُ پولی کمیٹی ءِ اڈ داتگ کہ اِشی تہءَ ڈاکٹر غلام مصطفیٰ، ڈاکٹر طارق پیرزادہ ءُ پروفیسر ڈاکٹر عباس نقوی ھوار اَنت۔
نشترمیڈیکل یونیورسٹی ءِ جارکش ءِ ردءَ بے وارثیں مردمانی جوناں بندیں کوٹیانی تہءَ چھت ءَ ایر کنگ بیت وھدیکہ وانینگ ءِ لوٹانی ھاترءَ دزگپتگیں ھڈ ھم قانودی کاروائیاں پد زیرگ بنت ءُ جونانی گور کنگ ھما پولیس اسٹیشن ءِ ردءَ کنگ بیت اِنت۔
دومی نیمگ ءَ اَے درشانانی سرءَ ھم بازیں مردم جُست چِست کنگ ءَ اَنت، مردمانی گُشگ اِنت کہ پہ وانینگ ءِ ھاترءَ ھما جون کہ آرگ بنت آیانی تہءَ مردین ءُ جنین دوھینانی جون ھوار بنت بلے ادا تھنا مردینانی جون اَنت۔
زانگ بہ بیت چدو پیسر ھم لاھور ءَ چہ پنجاہ ءَ گیشتر بے وارثیں جون آرگ بیتگ اَنت کہ آیانی پجار نہ بیتگ اَت، چُشیں وئیلانی درگت ءَ بلوچانی لیکہ اِش اِنت کہ اے پئیمیں گیشتریں جون بیگواھیں بلوچانی بنت کہ اشاں پاکستانی لشکر وتی ٹارچر سیلانی تہءَ کُشگ ءَ پد بلوچستان ءَ دیر دور دنت دانکہ آیانی پجار کنگ باوری مہ بیت۔