کتاب : سامراج کی موت
نبشتہ کار : فرانزفینن
رجانک کار : خالد محمود ایڈووکیٹ
چمشانک دیوک: گل ھسن بلوچ
دی بلوچستان پوسٹ
“سامراج کی موت ” اِے کتاب ءِ رجانک کار ھالد مھمود ایڈووکیٹ اِنت 176 تاک دیم ءِ نبشتگیں کتابے ،2017 ءَ رجانک ءُ چاپ بُوتگ چے ” فکشن ہاؤس، لاہور” ءَ نیمگ ءَ ۔ اِے کتاب ءِ نبشتہ کار پرانزپینن (فرانزفینن) اِنت کہ آ وت الجزائر ءِ جاھمنندے بیت ءُ پرانس ءَ پہ نفسیات ءِ وانگ ءَ روت اِے ھما وھد بیت کہ الجزائر پرانس ءِ ایردست بیت آئی کالونی جوڑ بیت اِنت گُڑا پرانزپینن وتی ڈاکٹری کورس ءَ پور ءَ نہ کنت الجزائر ءِ جُھد آجوئی ءَ ھوار کپ ایت تاں گُڈی ساہ ءَ الجزائر ءِ آجوئی ءَ پہ دیمونی دنت چوشکہ پرانزپینن وت یک نفسیات بّلدے بیت آئی ءِ سَے کتاب اَنت( سامراج کی موت ، افتادگان خاک، ساہ جلد اور سفید چھرے) اِے کتاب اَنت نفسیات ءُ ایردستی ءِ سر ءَ نبشتہ کنگ بُوتگ اَنت۔ “سامراج کی موت ” اِے کتاب الجزائر ءِ ایردستی ءُ لبریشن فرنٹ ءِ کردار ءُ چاگرِد ءِ تہ ءَ ریڈیو ، پِس ءُ بچکیں زھگ ، پس ءُ جنکیں زھگ، مرد ءُ جنین، ڈاکٹر ءُ نادُرہ ھمے وڑیں سرھالانی سر ءَ تراں کنت کہ وھدے پرانس ءَ الجزائر ءَ سر ءَ اُرش کُتگ ھما روچاں رند آئی ءَ چے چے زُراکی کُتگ الجزائر ءِ مھلونک ءِ سر ءَ آ ایشانی سر ءَ گوں شریں دْروراں تْران کنت۔ اِے کتاب من پیش ءَ ونّتگ، نوں دوبر وانّتگ من ءَ دویں بّراں سک دوست بوتگ پرچا کہ یکے ایش اِنت آ ایردستیں چاگردے ءَ سر ءَ نبشتہ کنگ بُوتگ۔ من ءَ اِے وڑیں چیزانی وانگ سک دوست بیت۔ دومی مزنیں چیز ایش اِنت کہ مروچی مئے چاگِرد ءُ مئے راج ھمے چیزانی آماچ اِنت۔ من سدّکاں اِے کتاب ءَ ھرکس بہ بوان اِیت وتی راج ءُ سرزمین ءِ سرئے زُراکیاں ءُ وتی گلامی ءَ شَریں وڑے ءَ مار اِیت۔
چوشکہ رسانک دَر ءِ بلائیں کردے بیت پہ ایردستیں راج ءُ پہ زُراکیں راج ءَ دوئیناں بلے ھر وھداں ما گند ایں سامراجیں استاناں وھدے دومی راج وتی ایر دست کُتگ اَنت گُڑا رسانکدَر آئی بلائیں وسَیلگے بُوتگ۔ ھمے وڑ ءَ پرانس ءِ واست ءَ ریڈیو بلائیں وسیلگے بیت آ الجزائر ءِ راج ءَ تہ ءَ لبریشن فرنٹ ءِ بگیری ءَ ریڈیو ءَ کارمرز کنت۔ اول سر ءَ وھدے کہ لبریشن فرنٹ وتی جُھد ءَ بندات کنت ریڈیو ءِ سر ءَ انچو پابندی نہ بیت، ھرچی کہ جُھد وتی جوش ءَ روت ھمینچو ریڈیو ءِ سر ءَ پابندی لگ اِیت۔ ھر وھداں کوشست کنت سامراج وتی جنرل ءُ کرنل وتی ھّیروانی نام ءَ گیت ایشانی سر ءَ مراگش کنت الجزائر ءِ مھلونک ءَ بارت مراگشاں ۔الجزائر ءِ مھلونک ءَ را چہ آوانی جند ءُ رھشون ءُ شھمیراں بے ھبر کنگ لوٹ اِیت تانکہ وتی راجی بامرداں دل ءَ بہ بَر اَنت۔
دیمتر ءَ جنگ وتی گُڈی سیمسراں سر بیت گُڑا مھلونک ریڈیو ءِ تہ ءَ ھم ھالاں شنگ کنگ بندات اَنت گُڑا وھدے الجزائر ءِ ھالانی دیگ ءِ وھد بیت پرانس ءِ سامراج ریڈیو ءِ سسٹماں ھراب کنت تانکہ مھلونک الجزائر ، لبریشن فرنٹ ءِ اُرش ءُ پیگاماں چہ بے ھبر بہ بیت۔ آ وھداں کہ ریڈیو سامراج ءِ دست ءَ بیت، گُڑا کُجا کہ لبریشن فرنٹ ءِ اُرشے بُوتگ یا پرانس ءِ لشکر ءُ لبریشن فرنٹ ءِ سر ءَ یا لَس مھلونک ءِ سر ءَ اُرش کُتگ گُڑا سامراج ءَ ھمے ھال شنک کُتگ کہ پلاں میتگ ءَ لبریشن فرنٹ ءِ دھشت گرداں مھلونک ءِ سر ءَ اُرش کُتگ ما مھلونک ءِ رکینگ ءَ شُتگ ایں جنگ بُوتگ۔ اگاں لَس مھلونک شھید بُوتگ آواں ءَ سرمچار لّیک اِتگ دیم پہ دیمی جنگ ءِ نام داتگ اگاں مھلونک ءِ نیمگ ءَ زھرشانے چیزے بُوتگ گُڑا ھمے گپّ دیم ءَ آرتگ اِش کہ دھشت گرداں لَس مھلونک ءِ سر ءَ اُرش کُتگ ما مھلونک ءِ بچارینگ ءَ شُتگ ایں دھشت گردانی تیرگواری ءَ اِے جنگ بُوتگ اَنت۔ دگہ ھزاراں پندل سازیتگ اِش ھمے ریڈیو ءِ وسیلگ ءَ ۔
دیمتر ءَ آ الجزائر ءِ تہ ءَ پِس ءِ گوں زھگاں ، جنین ءِ گوں مرد ءَ ڈاکٹر ءِ گوں نادُرہ ءَ ھمے وڑیں چیزانی سر ءَ نبشتہ کنت چوشکہ الجزائر ءِ راج یک مزھبی راجے بیت اسلام ءِ سّکیں منوگر بنت۔ وتی زالبولاں چہ گِس ءَ در آیّگ ءَ نِیل اَنت۔ اگاں شھر ءُ بازارے ءَ شُتگ اَنت گُڑا بُرکہ کُتگ اِش سامراج کہ کیت آ زالبولاں وتی دست ءِ چیر ءَ کنگ لوٹ ایت آ چار ایت زالبول منی دست ءَ اتک اَنت مردیں الم کاینت، ھمے وڑ ءَ آ زالبولانی نفسیات ءِ زانگ ءُ مردینانی بگیری ءَ پاد کنگ ءِ واست ءَ مراگشے چیزے بیت ، مردیناں گْوش اِیت وتی زالبولاں گوں بیار اِت تانکہ بہ زاں اَنت زالبول چونیں نفسیاتے واھُند اَنت ۔ ھمدا زالبولاں ھمے سرپد کنگ ءِ جُھد ءَ کنت کہ شمئے سر ءَ ھرچی زُراکی بوگ ءَ اِنت یا شما لاچار کنگ بُوتگ اِت کُلانی زمہ وار مردیں اَنت۔ ھمے وڑ ءَ سامراج الجزائر ءِ تہ ءَ برات کُشی ءِ یک مزنیں دْرچے بندات کنت مھلونک ءَ وت ما وتی جیڑھاں دست ءُ گریباں کنت تانکہ وتی مکسد ءَ سوبمند مہ بنت۔ آجوئی ءِ جنگ ءَ پیش پِس ءُ بچکیں زھگ ءِ وت ما وتی نزدینکی انچو نہ بوتگ اَنت زھگ ءَ پس ءِ دیم ءَ گپ جت نہ کُتگ، پِس ءِ موکل ءَ ابید جُھد آجوئی ءَ ھوار بوت نہ کُتگ ئے، وھدے زھگ ءَ چیرواکی جُھد ءَ ھوار بوتگ گُڑا پِس ءَ گند ایت زھگ نون ھوار اِنت لبریشن فرنٹ ءُ آجوئی ءِ جنگ ءَ پِس ءِ تہ ءَ آجوئی ءِ جنگ ءَ انچو بدلی آرتگ پِس زھگ ءِ مکن کنگ ءِ بدل ءَ وت آجوئی ءِ جنگ ءَ گوں زھگ ءِ ھم کوپگ بوتگ۔ اگاں پِس ءُ جنکیں زھگ ءِ بابت ءَ بچار ئے جنکیں زھگ بِس گِس ءَ بند بُوتگ اَنت ابید بُرکہ ءَ بازار ءَ ترگ ءَ بلائیں ایبے سرپد بنت گُڑا لبریشن فرنٹ ءِ سنگت نند اَنت دیوان کن اَنت کہ مارا زالبول چوں جُھد ءَ ھوار کنگی اَنت؟ تاں وھدے ما سُوبمند نہ بئیں تانکہ جُھد آجوئی ءَ ما وتی زالبولاں ھوار نہ کن ایں۔ اول سر ءَ لبریشن فرنٹ ھما زالبولاں زور ایت کہ آواں آروس کُتگ آوانی مرد ھم جنگ ءَ ھوار اَنت دیمتر ءَ نشتگیں جنکاں ھم ھوار کن اَنت آواں ٹریں کن اَنت تانکہ آ شھر ءُ بازاراں سامراج ءِ سر ءَ ارزانی ءَ اُرش بکن اَنت ءُ جُھد کارانی راہ چاری ءُ ورگی ءُ دگہ سامان سر بہ کن اَنت پہ ارزانی ءَ ۔ دژمن چار ایت زالبول منی سر ءَ اُرش کنگ ءَ اَنت گُڑا زالبولانی بُرکہ ءِ سر ءَ بندش جنت گُڑا زالبول ھما پرانسیسانی وڑ ءَ وتی کن اَنت آوانی سر ءَ اُرش کن اَنت ۔ اگاں کسے ءَ دیستگ پلانی جنک ابید بُرکہ ءَ گردگ ءَ اِنت آئی پِس ءِ کرا شکایت کُتگ اِے وھد پِس ءِ واست ءَ بلائیں تُرسے بیت کہ منی زھگ جنگ ءَ ھوار اِنت اگاں دژمن ءِ دستاں گّرگ بوت یا جنگ بوت آئی ءِ باریں ھال چے بیت ھمے وجہ ءَ پِس وت ھم ھوار بیت گوں جُھد ءِ جنک ءِ ھمراہ بیت۔ پیش ءَ زالبول ءَ را اِے موکل نہ بُوتگ کہ مردینانی دیم ءَ گپ بہ کن اَنت بلے نوں زالبول وتی جنگ ءِ کسّھاں پہ وشی وتی کھول ءِ کرءَ کنت۔ ھمے وڑ ءَ براس ءِ گوں براس ءَ پیش ءَ کہ بُوتگ مستریں براس ءِ کر ءَ کستریں ءَ گپّ کُت نہ کُتگ بلے جنگ ءَ انچو بدلی آرتگ براس وت ما وت سنگت ءِ وڑ ءَ بُوتگ اَنت ۔کستریں براس کمان دار مستریں براس آئی ءِ پدگیری ءَ کنت۔ ھمے وڑ ءَ جنین ءُ مرد ءِ بابت ءَ نبشتہ ءَ کنت مردیں ءَ جنین وتی ملکیت لّیک اتگ بلے جنگ ءَ انچیں بدلے آرتگ جنین ءَ وتی مرد شگان جتگ، تی ماس ءُ گوھارانی ازت لگت مال بُوگ ءَ اِنت براس تئی زندانی اِنت تو نشتگ ئے گُڑا مردین ءَ را گیش سکھین رسیتگ آ جنگ ءَ ھوار بُوتگ جنین وت ھم۔
ڈاکٹر ھم گوں نادُراھاں انچو بُوتگ اَنت انچو کہ سامراج ءِ لشکر ۔ ڈاکٹراں ھم ریاستی چریکیانی کار پیّلو کُتگ نادُراھانی بابت ءَ پٹ ءُ پول کُتگ سامراج ءَ را سر کُتگ اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔