رودراتکی ءُ روکپتی بلوچستان ءَ بلوچانی کُشتکشاری بگیری ءَ شال ءَ زھرشانی کنگ

بلوچستان ءِ مزن شھر شال ءَ چارشمبے ءِ روچ ءَ وائس فار بلوچ مسنگ پرسنز نیمگ ءَ زھرشانی کنگ بیت-

زھرشانی ڈیرہ مراد جمالی ءَ سی ٹی ڈی دست ءَ دروگیں میڑ ءَ بیگواھیں مردمانی کُشگ، زورانسری آوار جنی ءِ تہ ءَ گیشی ءُ ایران ءَ بلوچ زھرشانی کنوکانی کُشگ ءِ بگیری ءَ کنگ بیتگ-

دستاں بیگواھیں مردمانی اکس ءُ زورانسری آوار جنی ءِ بگیری ءَ پلے کارڈز چست کتگ اَنت زھرشانی کنوکاں رودراتکی ءُ روکپتی بلوچستان ءُ کُشتکشاری ءُ زورانسری آوار جنی ءِ بگیری ءَ ناراہ جتگ-

ھمے درگت ءَ زھرشانی کنوکاں تران کنان ءَ گْوشتگ کہ رودرتکی ءُ روکپتی بلوچستان ءَ بلوچ راج ءِ بگیر ءَ تاکت کارمرز کنگ ءَ بند بہ کن اِت-

آیاں گْوشتگ کہ ڈیرہ مراد جمالی ءَ بے میاریں بیگواھیں مردماں دروگیں میڑ ءَ جتگ اَنت کہ زیارت ءِ وئیل ءِ دْرچ اِنت-

آیاں گْوشتگ کہ ریاست وتی دست ءِ بیگواھیں مردماں جنگ ءَ اَنت کہ اے کابل ایر جنگ اِنت-

آیاں گْوشتگ کہ بلوچستان ءَ زورانسری آوار جنی ءِ تہ ءَ گیشی بلاھیں جاورے ودی کنگ ءَ اِنت-

زھرشانی کنوکاں یکرندے پد ءَ بیگواھیں مردماں پہ سلامتی دراھگ ءِ لوٹ کتگ ءُ گْوشتگ کہ سرجمیں ادارہ اے انسانی جیڑہ ءَ وتی کرد ءَ پیلو بہ کن اَنت –