نوشکی : ورنایے یل کنگ ءَ پد یکرندے پد ءَ بیگواہ کنگ بیتگ

نوشکی ءِ نندوکیں ورناہ دومی رند ءَ زورانسری آوار جنگ ءَ پد بیگواہ کنگ بیتگ-

ٹی بی پی اِھوالکار نوشکی ءِ رِد ءَ چار ماہ ءَ ساری یل کنگ بیتگیں ورناہ سلال بادینی ء حاجی عبدالباقی بادینی جھمنند نوشکی گوستگیں روچ ءَ یکرندے پد ءَ چہ شال ءَ زورانسری آوار جنگ بیتگ-

اِھوالکارانی رِد ءَ سلال بادینی گوستگیں روچ ءَ شال بروری دگ ریلوے کالونی ءَ آئی ءِ سیادانی لوگ ءَ ساھت دوازدہ نزیک ءَ پاکستانی پوج ءُ چیریں ادارھانی کارندھاں زورانسری آوار جتگ چریشی ءَ پد آئی ءِ درگت ءَ ھچ وڑیں ھال دز نہ کپتگ-

اے ورناہ اولی رند ءَ پنچ مارچ 2022 ءَ دگہ یک ورنایے ھارون بادینی ء شاھنواز خان بادینی جھمنند نوشکی ءِ ھمراھی ءَ چہ پنجاب ءِ بُنجاھی شھر لاھور ءَ ھما وھد ءَ بیگواہ کنگ بیتگ وھدے نیکراھی تبلیگ ءِ ھاتر ءَ درتکگ اَنت-

کھول ءَ گْوشتگ کہ اے دوئیں مسیت ءِ تہ ءَ پاکستانی پوج ءُ سادھیں پوشاکانی تہ ءِ کارندھاں زورانسری گران کتگ ءُ برتگ اَنت-

چمّدیستانی رِد ءَ تبلیگی جماعت ءِ امیر ءَ آ دارگ ءِ جُھد کتگ ءُ قران مجید ءِ ھاتر داتگ ءُ آ زورانسری آوار جنی ءِ دارگ جُھد کتگ-

سلال بادینی پد ءَ جون 2022 ءَ یل کنگ بیتگ بلے یکرندے پد ءَ آ زورانسری آوار جنگ بیتگ-

دمگی مردمانی رِد ءَ اے ورنا ئے پت، ٹکی مرد حاجی عبدالباقی بادینی ، شعیب ءُ فرید شش جون 2022 ءَ نوشکی قادر آباد ءِ ھند ءَ تیرگواری کتگ ءُ کُشتگ اَنت- اے مردمانی کُشگ ءَ ھکومتی ءِ سروکی ءَ سلاہ بندیں ٹولی ءِ ھواریں مردمے دزمان بیتگ-

بلوچستان ءَ زورانسری آوار جنی ءِ جیڑہ یک بلاھیں جیڑھے گْوشگ بیت، اود ءَ گوستگیں روچاں چیزے مردم یل کنگ بیتگ ءُ پد ءَ ھمود ءَ زورانسری آوار جنی نکش کنگ بیتگ وھدے گْوستگیں روچاں ڈیرہ مراد جمالی ءَ سی ٹی ڈی ءِ دستاں کُشگ بیتگیں چار مردم ءِ پجّار ھم زورانسری آوار جنگ بیتگیں مردماں چہ بیتگ اَنت-