روکپتی بلوچستان: زاھدان ءَ بیران بیتگیں مردمانی کچ 95 ءَ سر بیتگ اَنت

روکپتی بلوچستان ءَ زھرشانی بیڑ ءَ ایرانی لشکر ءِ تیرگواری ءَ چہ بیران بیتگیں مردمانی کچ 95 ءَ سر بیتگ اَنت ءُ اشانی ھوار ھوار 300 ءِ کچ ءَ مردم زدگ بیتگ اَنت-

گوستگیں آدینگ ءِ روچ ءَ نماز جمعہ ءَ مکی مسیت ءَ ایرانی لشکر ءَ نمازیانی سر ءَ تیرگواری کتگ اَت پد ءَ اے زھرشانی گیش بیان بیت ءُ چریشی ءَ اود ءَ زھرشانی جاور مٹ بیت ءُ ھونی جاورے ءَ شت اَنت –

داں انگت ءَ مردم بازیں کچے ءَ زدگیں جاوراں نادراہ جاھاں تھتیگ اَنت ءُ اشانی تہ ءَ روچ پہ روچ بیرانیانی کچ گیش بیان اَنت –

نوکتریں ھالانی رد ءَ بیرانیانی کچ تنی وھدی نود ءُ پنچ ءَ سر بیتگ اَنت ءُ بازیں کچے ءَ مردم ھم زدگ اَنت ءُ اود ءَ آیانی جاور ناگیگ گوشگ بیتگ اَنت-

زاھدان ءَ گوستگیں آدینگ ءَ پد سیکورٹی پھزداری گیش کنگ بیتگ اَنت ءُ اود ءَ لس مردمانی سر ءَ نگاہ چاری ءُ دگہ گر ءُ دارانی واستا بازیں کچے ءَ سیکورٹی دارگ بیتگ اَنت-

گوستگیں روچ ءَ زاھدان ءِ امام جمعہ ءِ پیشوک مولانا عبدالحمید ءِ سروکی ءَ سرکاری باسکاں ھوار دمگ ءِ مزنیں مردمانی ھمراھی ءَ یک نیادے دارگ بیتگ اَت-

نیاد ءَ گوشگ بیتگ اَت اے روچ یک ھونی روچے دارگ بہ بیت ءُ چریشی ءَ چہ اود ءَ بیران بیتگیں مردمانی ھون دیگ بہ بیت ءُ گرگ بیتگیں مردم آجو کنگ بہ بنت-

آیاں گوشتگ ات کہ اے وڑیں جاور گیشتر ڈیھ ءُ ڈیھکاریاں تاوانانی نیمگ ءَ برت کن اَنت کہ چریشی ءَ چہ دمگ ءِ جاور ناساز بیت کن اَنت-

روکپتی بلوچستان ءِ بنجاھی شھر زاھدان ءَ ھما وھد ءَ زھرشانی بندات بیتگ ات اَنت کہ گوستگیں ماہ ءَ تیابدپی شھر چھبار ءَ یک پانزدہ سالی ئیں جنکوے ءِ گون ءَ پولیس ءِ آفسر ءِ بھتام ءِ سلکاری ءِ پژدر ءَ بندات بیتگ اِت اَنت-

چریشی ءَ بنداتی ءَ چھبار ءَ زھرشانی بندات بیتگ اِت اَنت ءُ پد ءَ اے زھرشانی گیش بیان ءُ روکپتی بلوچستان ءِ دگہ دگہ جاھاں ھم کنگ بیتگ اَنت-