ماتویں چاگرد – سیپ بلوچ

نبشتانک: ماتویں چاگرد

نبشتہ کار: سیپ بلوچ

دی بلوچستان پوسٹ

چارُمی بھر

سُهب ءِ گْوربام ءَ سَمل پاد اَتک چاه ءُ نان ءِ جوڑ کت نوں سمل ءَ وتی ماتو آجو کتگ اَت همک کارانی گْوشاد اَت بلے مرچی سمل ءِ زند ءِ ویرانیانی مستریں سهب اَت کہ سمل ءِ کماش اتک ءُ چُل ءَ نشت سمل ءَ چاه دیم ءَ دات سمل ءِ ماتو ءَ پسانی شیر دوشتگ اِت اَنت هیزک ءَ کنگ ءَ اِت اش کہ سمل ءِ پت مرچی ڈگارانی سرے روگ ءِ وڑ ءَ نہ اَت سمل ءِ ماتو ءَ دهکان جست کت سمل ءِ پت تو هال کن رُوچ بُرز اِنت تو مرچی ڈگاراں نہ روئِے –

دهکان ءَ پسہ دات کہ مرچی رواں برات زتکیں وتی زامات ءِ چارگ ءَ کہ چہ دَرملک ءَ واتر اتگ سمل ءِ دست ءِ چاه کپت سمل ءِ کُٹ ءَ هیسکگے جت سمل ءَ در اتک !چالاکیں ماتو ءَ گْوشت تئی گپے اِش کنگ ءَ سمل ءَ پچار میارے کت در اتک دهکان ءَ نسوارے دپ ءَ کت چادر بڈا جت دَر اتک چہ گدان ءَ روان بوت پہ برات ءِ لوگ ءَ دهکان وهدیکہ سر بوت برات ءِ لوگ ءَ برات زتکے وش اهت کُت ءُ وتی برات ئِے گْور ءَ گپے سرینت سوالی ءِ جست کت سوالی جان تئی موکل چنچوک اَنت ؟سوالی ءَ پسہ دات کہ دوماه انت ناکو-

گڑا دهکان ءَ وتی برات گْوشت کہ سوال جان ءَ موکل نیست بیا چکّاں سیر دیاں ، وتی کْول ءَ سرجم کن آں دهکان ءِ برات ءَ گْوشت هو منی اوں دل ءَ بوتگ گپ ءَ سریناں شر اِنت تو وت گپ جت دهکان ءَ گْوشت چُک و هردو تئی ئیگ انَت ، دیرے نہ لوٹ ایت نکاه اِش دیاں ، دهکان ءِ برات ءَ گْوشت شر اِنت یک ءُ دو روچ ءَ رند تیاری کن آں چُکّاں سانگ دیاں ، هنچو داں سئے چار روچ ءِ گْوزگ ءَ رند سوالی ءُ سمل ءِ نکاه بوت ، سمل ءَ نوکی شانزدهمی سال سرجم اَت ، ءُ اولی مهواریانی هساب اَت بلے سمل ءَ نزانت کہ منی گون ءَ چے بوگ ءَ اِنت-

سمل ءِ مهواری پچ اِت اَنت کہ اے شپی سمل اِش نکاه دات ءُ سالونک ءُ بانور اِش کت اَنت ، سئی ءُ پنچ سال امر ءِ سوالی ءَ اوں نزانت اے زند ءِ اُرز ءُ متاه چے اِنت سمل بیوانکی ءُ ارسانی زر ءَ تپیگیں بندن ءَ گوں کلّہ ءَ ارسانی هار ءَ مل اِتگ اَت زندے گرانتریں بارے بڈا گوں ودار ءَ اَت-

داں سوالی ءَ کلہ ءَ دور کت ءُ بازین مِنتّے کت سمل ءَ را کہ وتی گپاں کن آں بلے سمل ارسانی زِر ءَ اُوژناگ اَت هچیگی نہ اَت داں سمل ءَ را سوالی ءَ ٹوهینت ءُ کنٹیں میت شپ ءَ وپت ءُ واب کت ءُ هونانی بوه نہ مار اِت کہ اے یک جنکے ءِ کجام ارزشت انت چے انت پہ نوک رستگیں جنکے ءَ اے جست پہ سوالی هیپ اوں نہ ات پرچا کہ سوالی بے الم ءُ بے زانتے اَت ،شپ وتی تهلیں اندوهاں گوں گْوست ءُ سمل دردانی لَد ءَ امباز اَت-

روان انت—

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔