جینیوا : بلوچ نیشنل مومنٹ( بی این ایم) ءِ سرکماش ڈاکٹر نسیم بلوچ ءَ ھم سنتیں راج ءِ کارگس ءِ دیم ءَ پی ٹی ایم یورپ ءِ زھرشانی ءَ بھر زرتگ۔
آئی ءَ گوں زھرشانی مچی ءَ تْران کنان ءَ گْوشتگ چیردستیں راجانی بھر کنوکیں وتساچیں سیمسری لیکارانی کور کنگ ءَ مارا ھم پت بیگ لوٹ ایت۔انچوش کہ مئے درد یک اَنت ھمے پیم مئے منزل ھم باید یک بہ بیت۔
آئی ءَ گْوشتگ چیردستیں راجاں پاکستان ءِ بگیر ءَ گوں تچکیں دیدانکے ءَ جھد کنگ لوٹ ایت انچوش کہ بلوچ نیشنل موومنٹ چہ پاکستان ءَ پہ بلوچ راجی آجوئی ءَ جھد ءَ اِنت۔
آئی ءَ گْوشتگ پاکستان چیردستیں راجاں پہ وڑے زوراکیانی نشانگ کنگ ءَ اِنت۔پشتون ، بلوچ ءُ سندیانی وس ءُ واک ءِ بھر کنگ ءَ وڑ وڑیں پندل کارمرد کنگ بیتگ۔ ’ڈیورنڈءِلیکار‘ رنگیں لیکار کشگ ءُ مارا بھر کنگ بیتگ۔اے پندلانی بگیری ءَ ما درساں جھد کرتگ ءُ جھد کنگ ءَ ایں۔مارا پہ اے زمزیلانی پْروشگ ءُ وتساچیں لیکارانی کور کنگ ءَ یکشلیں جھد ءُ ھم پتی پکار اِنت۔
’ ما گوں انچیں ریاستے ءَ دیم پہ دیم ایں کہ آ چہ وتی ناشرکاری ءُ مردمی اگبالانی لپاشگ ءَ زانگ بیت۔انچیں بے بند ءُ دودیں ریاستے کہ مارا مردم سرپد نہ بیت ایشی ءِ بگیر ءَ سوبمند بیگ پہ ما ھژدری اِنت پرچا کہ ایشی ءِ چیردستی ءَ مئے ربیدگ، زبان ءُ دومان بیرانی ءِ دیمپانی اَنت۔‘
آئی ءَ گْوشتگ پاکستانی ریاست ءِ ادارہ ماں مئے سیکولر ءُ مڑاھداریں چاگرد ءَ مزھبی تند روی ءَ نپت دیگ ءَ اَنت۔
ڈاکٹر نسیم ءَ وتی گْوشتانک ءِ تہ ءَ چیردستیں راجانی میان ءَ گوں تچکیں دیدانک ءَ ھم پتی ءُ ھمکاری ءِ سر ءَ زور داتگ ءُ گْوشتگ ما لوٹ ایں کہ مئے یکیں دژمن ءِ بگیر ءَ چیردستیں راجانی منزل ھم یک بہ بیت۔
آئی ءَ بی این ایم ءِ ’راجی آجوئی ءِ جھد‘ ءِ دیدانک ءِ سر ءَ درسیں چیردستیں راجاں جھد ءِ لوٹکی دیان ءَ گْوشتگ بی این ایم ءِ دیدانک چہ پاکستان ءَ بلوچ راج ءِ آجوئی اِنت ۔ما لوٹ ایں کہ ما پہ اے مول ءَ یکجاھی ءَ جھد بہ کن ایں –