ایرانی کردستان ءِ جھمنندیں جنک پولیس ءِ دزگیری ءَ ناگتی بیران، مھلوک ءِ زھرشانی

ایرانی بنجاھی شھر تھران ءَ ایرانی پولیس ءِ دست ءَ دزگیر بیتگیں مھسا امینی ءِ دزگیر کنگ بیتگ ءُ دو روچاں پولیس ءِ بندیگی ءَ پد آ ناگیگیں جاوراں نادراہ جاہ ءَ برگ بیتگ-

مھسا امینی ایرانی کردستان ءِ دمگ سکتیز جھمنند بیتگ ءُ آ تر ءُ تاب ءَ تھران ءَ اتکگ بیتگ ءُ پولیس ءَ دزگیر کتگ –

دمگی مردماں بھتام جتگ کہ مھسا امینی پولیس ءَ بے کساس جتگ ءُ چریشی ءِ سبب ءَ آ بیران بیتگ-

مھسا امینی ءِ ناگتی کوش ءِ ھلاپ ءَ مروچی تھران ءَ زھرشانی بیتگ ءُ اود ءَ زھرشانی کنوکانی شنگ ءُ شانگ کنگ ءَ زھرشانی کنوکانی سر ءَ تیرگواری ھم کرتگ –

زھرشانی کنوکانی سر ءَ پولیس ءِ تیرگواری ءَ چہ زالبول ءُ یک مردینے زدگ بیتگ اَنت –

ھمے وڑ ءَ مھسا امینی ءِ ناگتی کوش ءِ ھلاپ ءَ ایمنسٹی انٹرنیشنل ءَ ھم پدردی درشان کتگ-

ایمسنٹی انٹرنیشنل ءَ گوشتگ کہ مھسا امینی ءِ کوش ءِ پژدر ءَ دلجمیں پٹ ءُ پول کنگ بہ بیت –

آئی ءَ گوشتگ کہ مھسا یک بیست ءُ دو سالی جنکے بیتگ ءُ پولیس ءَ انسانی اگبال لگتمال کتگ ءُ مھسا بے کساس لٹ ءُ کٹ کتگ ءُ چریشی ءِ سر ءَ آ بیران بیتگ –

ایمنسٹی انٹرنیشنل ءَ مھسا امینی ءِ کھول ءِ گون ءَ پدردی ھم درشان کتگ –