بلوچستان ءِ دمگ کلات ءِ ھنکین منگچر ءَ گمانی پئیم ءَ نصیب اللہ ء غلام محمد ٹک محمدحسنی ءِ دست ءَ گوں بیتگیں بمب ءِ ترک اِتگ کہ اِشی سوب ءَ آ ھما دمان ءَ بیران بیتگ۔
اھوالانی ردءَ تراک وئیلی دروشم ءَ بیتگ وھدیکہ تراک ءَ بیران بیتگیں مردم سرءَ بروبر نہ بیتگ۔
تراک ءِ سوب ءَ دو دگہ مردم نیاز اللہ ء محمدعمر محمدشہی ءُ مجیب الرحمٰن ء عبدالرازق جتوئی کمو ٹپی بیتگ اَنت-
واکدار وئیل جاہ ءَ سربیتگ اَنت تراک ءَ پد بیران ءُ ٹپی بیتگیں مردم نادراھجاہ ءَ بُرتگ اَنت، وئیل ءِ درگت ءَ گیشتر پَٹ ءُ پول پولیس کنگ ءَ اِنت۔
دومی نیمگ ءَ خاران ءَ چہ اھوال اِنت کہ سلاہ بندیں مردماں تیرگواری کُتگ ءُ بیگ محمد ء ٹکری بشام ساسولی نامی مردمے کُشتگ، ءُ وئیل جاہ ءَ چہ تتکگ اَنت۔
ھندی مردمانی رد ءَ کُشگ بیتگیں مردمے سیادی گوں سرکاری ٹولی ءَ بیتگ، بلے کوش ءِ پُشدر داں انگت زانگ نہ بیتگ۔