ھزدار: پوج ءِ دست ءَ بیگواھیں ڈاکٹر یل بیتگ

بلوچستان ءِ دمگ ھزدار گریشگ ءَ چار ستمبر ءَ پاکستانی پوج ءِ دست ءَ آوار جنگ بیتگیں یک مردمے یل بیتگ ءُ وتی لوگ ءَ سر بیتگ-

گیشیں ھالانی رد ءَ ھمے ماہ ءَ گریشگ ءَ پوج ءِ دست ءَ آوار جنگ بیتگیں ڈاکٹر کریم بخش یل بیتگ ءُ وتی لوگ ءَ سر بیتگ – بیگواھیں بلوچانی واستا توار چست کنوکینن گل وائس فار بلوچ مسنگ پرسنز ءَ اے مردم ءِ یل بیگ ءِ ھال راست کرتگ-

زانگ بہ بیت چار ستمبر ءِ روچ ءَ ھزداد گریشگ ءَ بازیں کچے ءَ پاکستانی پوج ءَ بیڑ برتگ ءُ پت ءُ چار زھگان ھوار شش مردم دزگیر کنگ ءَ پد ناشناسیں جاھاں برتگ اَنت-

ھزدار گریشگ ءَ پوج ءِ دست ءَ آوار جنگ بیتگیں مردمانی پجار خیر بخش ء شئے مھمد، داد کریم ء شَے مھمد، مقصود ء شَے مھمد، نعیم ء شَے مھمد، شَے مھمد ءُ ڈاکٹر کریم بخش ءِ ناماں زانگ بیتگ ات اَنت-

پنچ رمس ءَ پوج ءِ دست ءَ آوار جنگ ءُ بیگواھی ءَ پد شش مردمانی زورانسری آوار جنی ءِ ھلاپ ءَ دمگی مردماں زھرشانی کنان ءَ بنجاھی شھدگ بند کتگ ات ءُ زھرشانی کنوکاں گریشگ ءَ پوج ءِ دست ءَ آوار جنگ بیتگیں مردمانی یل کنگ ءِ لوٹ کرتگ ات –