چائنہ-پاکستان ایکنامک کوریڈور (سی پیک) ءِ پھازگ ءُ سلامتی ءِ درگت ءَ ھواریں ورکنگ گروپ کا 9می دیوان یک شمبے ءَ چینی سفارت جاہ بیتگ۔ دوھیں نیمگ ءَ ھواریں کوشستاں گوں پاکستان ءِ تہءَ چینی شھریانی ءُ پراجیکٹانی پھازگ ءَ باوری کنگ ءِ ھاترءَ دژمنیں تاگتانی پندلانی بگیر ءَ ھواریءَ گوں دیمپانی کنگ ءِ شور بندی کنگ بیتگ۔
دیوان ءِ ھواریں پاگواجھی اسپیشل سیکریٹری وزارت داخلہ سیف انجم ءُ ڈائرکٹر جنرل وزارت پبلک سکیورٹی چین ءَ کُتگ۔
اے گپ ءِ اھد کنگ بیتگ کہ پاکستان ءَ سی پیک پراجیکٹانی پھازگ ءُ سلامتی ءَ باوری کنگ دو نیمگی سیادی ءَ دیما برگ ءِ ھاترءَ سک باز ھژدری اِنت۔
دیوان ءَ سرکاری گامگیج، پاکستان ءَ چینی پراجیکٹ ءُ کارمندانی پھازگ ءَ باوری کنگ ءُ چینی شھریانی نشانگ کنوکانی درگت ءَ پَٹ ءُ پولی گامگیج ساڑءَ اَتگ اَنت۔
دو نیمگی سیادی ءِ کوشستاں گیشتر مھکم کنگ ءِ ھاترءَ جتاھیں ھواریں گامگیجانی سرءَ شور بندی کنگ بیتگ کہ اِشی تہءَ کانود برجاہ داروکیں گلانی نیام ءَ کمکاری ءَ گیشتر ودینگ ءُ آیانی کارانی وڑءُ پئیم ءَ تہ ءَ گھتری آرگ ھوار اِنت۔
دیوان ءَ نان کوریڈور پراجیکٹانی پھازگ ءِ ھاترءَ جتاھیں کارکنوکیں ٹولی ءِ اڈ کنگ ءِ ھیال ءِ سرءَ ھم جیڑیتگ۔
چائنہ-پاکستان ایکنامک کوریڈور (سی پیک) ءَ بلوچ آجوئی لوٹوکانی نیمگ ءَ چہ گھگیری ءِ دیمپانی اِنت۔ گوستگیں بازیں سالاں چہ بلوچ آجوئی دوستانی نیمگ ءَ چہ سی پیک ءُ آئی ءَ بندوکیں پراجیکٹاں اُرشانی دیمپانی کنگ کپگ ءَ اِنت۔
وھدیکہ گوستگیں پنچ سالانی تہءَ سی پیک ءُ دگہ پراجیکٹانی سرءَ کارکنوکیں چینی انجینئرز ءُ کارمند پنچ ترندیں فدائیں اُرشانی تہءَ نشانگ کنگ بیتگ اَنت۔ اے اُرش بلوچ لبریشن آرمی ءِ مجید بریگیڈ ءِ نیمگ ءَ کنگ بیتگ اَنت۔
ھمے سال ءَ اپریل ءِ ماہ ءَ کراچی ءِ کنفیوشس انسٹی ٹیوٹ ءِ کارمند ھم یک فدائی اُرش یے تہءَ نشانگ کنگ بیتگ اِت اَنت کہ اِشی تہءَ سئے چینی شھریاں ھوار 4 مردم مُرتگ اَت وھدیکہ لشکریاں ھوار چار مردم ٹپی بیتگ اَت۔
اُرش ءِ ذمہ داری بلوچ لبریشن آرمی ءَ من اِتگ اَت۔ گل ءِ جارکش جیئند بلوچ ءَ درشان شنگ کنان ءَ گُشتگ اَت کہ بی ایل اے مجید برگیڈ ءِ اولی زالبولیں فدائی شاری بلوچ ءَ اے اُرش کُتگ۔
نکی ایشیاء ءِ رپورٹ ءِ ردءَ جون ءِ ماہ ءَ چینی وزارت خارجہ ءَ پاکستان ءَ گُشتگ اَت کہ آ یک چینی پھازگی کمپنی ءَ پاکستان ءِ تہءَ کار کنگ ءِ پرمان بہ دنت۔ رپورٹ ءِ ردءَ اَے گپ ءِ راستی روتاکاں گوں ھستیں سرکار ءِ دو وزیرانی نیمگ ءَ کنگ بیتگ۔
اھوالانی گُشگ اِنت کہ اسلام آباد ءَ اے دزبندی رد کُتگ، بلے زانتکارانی گُشگ اِنت کہ بیجنگ چُشیں گامگیجانی ھاترءَ پاکستان ءِ سرءَ زور پر دیان کنت۔