بلوچستان: ھئوراں پد بلوچستان ءِ مھلوک نادراھیانی آماچ

بشّی ھئورانی درچ ھلاس بوتگ بلے ھئور ءُ ھارانی آماچ بوتگیں بلوچستان ءِ جھمنندیں مردم وڈ وڈیں نادراھیانی آماچ بوان انت –

مروچی آدینگ ءِ روچ ءَ دکی ءَ دل ءُ لاپ ءِ نادراھی ءَ دو زھگ بیران بوتگ انت – دکی ءَ یک ھزار ءُ پنچ سد مردماں گیش مردم دل ءُ لاپ ءِ نادراھی ءِ آماچ بوتگ انت – دکی ءَ دو سالی جنکو عائشہ ءُ دگہ ھپت سالی جنکو ءِ وتی زند ءَ چہ زبھر بوتگ انت – گوستگیں چیزے روچانی میان ءَ دکی ءَ دل ءُ لاپ ءِ نادراھی ءَ بیران بوتگیں مردمانی کچ شش ءَ سربوتگ انت –

دکی، لونی، تل ءَ ھوار دگہ نوزدہ میتگاں دل ءُ لاپ ءِ نادراھی تالان بوتگ – بلوچستان ءِ جانسلامتی ءب واکداراں اے جاورانی گر ءُ دار ءِ ھاتر ءَ تنی وھدی ھچ وڈیں گامگیج نہ زرتگ ءُ ناکہ میڈیکل بنجل برجم کتگ انت – دکی ءِ ڈسٹرکٹ ہیڈ کوارٹر ھسپتال ءَ جانسلامتی ءِ درمان نیست انت – درمان ءُ جانسلامتی ءِ پروفیشنل اسٹاف نہ بوگ ءِ سوب ءَ نادراھ دلسیاہ انت –

بلوچستان ءِ ھار آماچیں دمگاں وڈ وڈیں نادراھی آیگ ءَ انت بلے درمان ءِ نہ بوگ ءِ سوب ءَ نادراھانی الاج کنگ باز مشکل انت وھدیکہ دومی نیمگ ءَ دگ آپ ءَ برتگ انت چریشی دومی دمگاں ءَ روگ ءُ آیگے راہ ءُ در بند انت مزنیں شھراں پہ الاج ھاتر ءَ روگ ھم باز مشکل جوڈ بوتگ –

ھئوران پد ھما جاہ ءَ کہ ھئورانی آپ یکجاہ انت ھمودا چہ بازیں نادراھی ءِ تالان بوگ ءَ انت – ھار آماچیں مھلوک پوسٹ، گیسٹرو، ملیریا، لاپ درد، دل ءُ لاپ ءِ نادراھیاں ھوار پچیں آزمان ءِ چیر ءِ نندگ ءِ سوب ءَ بازیں نادراھیانی آماچ بوگ ءَ انت –

دومی نیمگ ءَ ھزدار ءِ دمگی واکدار ءُ جانسلامتی ءِ واکدار گیسٹرو نادراھی ءِ کم کنگ ءَ ھم بے سوب بوتگ انت – شش سد ءَ گیش نادراھ نادراھجاھاں ارگ بوتگ انت ھزدار ءُ کش ءُ کری دمگاں گیسٹرو نادراھی ءَ بیران بوتگیں مردمانی کچ بیست ءَ.سر بوتگ انت –

ھار آماچیں دمگاں شُتگیں پیرا میڈیکس ءِ گوشگ انت کہ ھر ھما جاہ ءَ ھئورانی آپ اشتاتگ انت گڈا اود ءَ وڈ وڈیں نادراھی تالان بوگ ءَ انت – ھار آماچیں مردم پچیں آزمان ءِ چیر ءِ نندگ ءَ پوسٹ، گیسٹرو، ملیریا، لاپ درد ءُ دل لاپ ءِ نادراھیانی آماچ بوان انت –

ھئور ھارانی سوب ءَ بلوچستان ءِ بازیں ھند ءُ دمگ ءِ ھار ءَ برتگ انت ترندیں ھئورانی سوب ءَ ھاک ءِ گِس کپتگ انت بازیں مردمے پچیں آزمان ءِ چیر ءَ زند گوازینگ ءَ لاچار انت – صوبائی ڈیزاسٹر مینجمنٹ اتھارٹی ءِ رِد ءَ ھئور ءُ ھارانی سوب ءَ تنی وھدی دو سد ءُ ھپتاد مردم بیران بوتگ انت وھدیکہ اشانی تہ ءَ ھما مردم ھم ھوار انت کہ نادراھیانی آماچ بوتگ انت –

ھنوگیں ھئور ھارانی آماچ بوتگیں لسبیلہ نندوک ڈائریا ءُ پوسٹ نادراھیانی آماچ انت – دمگی مردمانی گوشگ انت – پروشت ءُ پروشیں دگ ءُ ڈاکٹرانی کمی ءِ سوب ءَ نادراہ ھسپتال ءَ سربوت نہ کن انت – ھار آماچیں دمگ نصیر آباد ءُ ھب چوکی ءِ بازیں زھگ ءُ زالبول ءِ پوست ءُ چمانی آماچ انت –

جانسلامتی ءِ واکدارانی رِد ءَ ھئور ءُ ھاراں اوشتوکیں آپانی سوب ءَ اسھال، ڈینگی ق ملیریا، ءُ پوست ءِ انفکشن، معدہ ءِ نادراھ ءُ آپ ءَ پیدا بوگ ءِ ایندگے نادرھی بلوچستان ءُ سندھ بازیں ھترہ انت وھدیکہ مکسانی تہ ءَ ھم گیشی اتکگ –

بلوچستان ءِ فلاحی گلاں جانسلامتی ءِ واکدار، سرکار ءُ میان استمانی ادارھاں چہ لوٹ کتگ کہ ھار آماچیں دمگانی کمک کنگ بہ بیت اگاں ناں جاور ھال چدوگنتر نگیگ بنت –