پَرّام – سیپ بلوچ

نبشتانک: پَّرام

نبشتہ کار:سیپ بلوچ

دی بلوچستان پوسٹ

بشّ ءِ هَپتمی پّرام اِنت کہ بلوچستان ءَ جاگهے شنز ءُ جاگهے جاگهے هار کُرتگ ئِے چوناها بلوچستان ءَ موسمی هور زمستان ءَ بنت ، بلے هِندوستان ءَ بشّی هور موسمی هور گْوشگ بنت ، اے بری بشّام ءَ پہ بلوچستان ءُ سند ءَ نوکیں رَمس ءِ ایر کرتگ ، پیریں گْوش اَنت کہ بشّام ءَ بلوچستان ءَ چشیں هور ، بوتگ اَنت بلے سک کم ، نوزدسد ءُ نود ءُ هشت، ءُ پد ءَ دوهزار هپت ءَ بشام ءَ وتی موسمی رنگ پیش اش داشتگ بلے اے بری کہ چو مان رتکگ اے وڑیں پرام کم بوتگ انت-

تیره بندانی اولی شهم ءَ بِگر داں تومشان ءِ نزیکی سیمسراں بشّام ءَ وتی رنگ یک هساب ءَ داشتگ ، وهد ءُ باریگانی گپ اَنت کہ چہ هند ءُ سند ءَ بشام ءَ وتی لانک بستگ دیم پہ کولواه ءُ مکران ءَ گْواراں بوتگ داں سیستان ءُ بلوچستان ءَ شتگ ، بلے اے بری بشام ءَ هِند ءُ سند ءَ بگر دانکہ مکران ءَ هما گپانی دْروشم ءَ وتی لانک بستگ ءُ سپر کنان اِنت-

بش ءَ بلوچستان ءِ بُرزی دمگاں زنڈیں زنڈیں تاوان داتگ مردمانی ، گِس دور داتگ اَنت ، مال دلْوت بُرتگ اَنت ، بازیں کچے مردم بُڈینتگ ءُ کُشتگ اَنت ، بلے بشام ءَ آواران ءِ سیمسراں بگر دانکہ کولواه ءُ مکران دگہ رنگے سینگار اِتگ اَنت ، کاه ءُ کهچر، کوه ویرانگ ءُ کهت سالیں گیاب سبز ءُ سینگار اتگ اَنت وڑ وڑیں کاه ءُ درمان رس اتگ اَنت ،هپوتک ، کٹینگ سیمسور درست بش ءِ موسمی وردن انت کہ رس اتگ اَنت ، اے گپ هست کہ گنجیں پنجگور ءِ انگور ءُ جلگهیں کیچ ءِ هامین ءِ بُرتگ بلے اے کهتیں زمین کہ کاه ءُ کهچرانی رنگے شموشتگ ، اے دروشمانی دیم ءَ سال جتیں هامین ءِ هچ بستار نہ اِنت-

مدتے گْوستگ کہ بلوچستان ءَ بے هوری ءَ دْراهیں جنگل ویران بوتگ اَنت ، کْوه سیاه ترّ اتگ انت ، چاه ءُ چمگانی آپ ، هُش اتگ انت، نوں درست آباد اَنت ، بے هوری ءَ مُرگ ساهدار ، جنگلانی تھے جنگلی ساهدار درست ، گار بیگواه ءُ مران بوتگ اَنت ، نوں امیت اِنت کہ مارا آ گوستگیں آجو دروشمیں بلوچستان آ دْروشم ءَ گندگ ءَ نہ اَیت کہ بیست سال پیسرا بوتگ ، بلے اے رندی ئیں هوراں هنچیں رژنے شھمینتگ کہ دل ،اے کھچرانی ندارگاں گوں ملما اِنت ، باریں کد آ رژنائیں روچ کیت ءُ بلوچستان وتی کدهاں گوں میلانک بیت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔