سرجمیں بلوچستان ءَ ھشت جتا جتائیں اُرشاں ھشت کارندہ کشتگ اَنت ءُ نوزدہ زدگ کتگ اَنت- بی ایل اے

بلوچ لبریشن آرمی ءِ جارکش جیئند بلوچ ءَ وتی شنگ کرتگیں درشانی ءَ بلوچستان ءَ پوج ءِ سر ءَ بیتگیں ھشت جتا جتائیں اُرشانی زمہ واری منّ اتگ اَنت-

جارکش ءَ گشتگ سرمچاراں ھرنائی، ڈھاڈر، کلات، پنجگور ءُ کیچ ءَ زورگریں پاکستانی پوج ءُ آئی کمکارانی سر ءَ ھشت جتا جتائیں اُرش کرتگ اَنت – چرے اُرشانی آسر ءَ کم چہ کم دشمنیں پوج ءِ ھشت کارندہ مرتگ ءُ نوزدہ زدگ بیتگ اَنت – ھمے وھد ءَ دشمن ءِ چار گاڑی ءُ چار چیک پوسٹ تباہ کرتگ اَنت –

جیئند بلوچ ءَ گشتگ کہ سرمچاراں یک بیڑے ءَ گوستگیں شپ ءَ ھرنائی ءِ دمگ کھوسٹ ءَ پاکستانی پوج ءِ بنجاھی بنجل دو نیمگاں انگیر کرتگ ءُ ترندیں اُرشے کرتگ – اے بیڑ بی ایل اے فتح اسکواڈ ءِ گھگیراں بھر زرتگ، فتح اسکواڈ بی ایل اے ءِ سنائپر ٹیم ءِ کمک گون اِنت – اشی ءِ ھمراھی ءَ بنجاھی بنجل ءِ سر ءَ دو نیمگاں راکٹ گواری کرتگ – اے ترندیں اُرش ءَ دشمنیں پوج ءِ شش کارندہ مرتگ اَنت ءُ میجر رینک آفیسر ءَ ھوار کم چہ کم ھپت کارندہ زدگ بیتگ اَنت –

ھمے وڑ ءَ ھرنائی ءِ دمگ ءَ بنجاھی شھدگ ءَ سنگر گپتگیں سرمچارانی جتا جتائیں داباں پوج ءِ واستا مڈی پجارینوکیں گاڑی ءِ کاروان ءِ سر ءَ یک اُرشے کرتگ – اُرش ءِ آسر ءَ دشمنیں پوج ءِ یک کارندھے مرتگ ءُ دگہ زدگ بیتگ اَنت ءُ آیانی گاڑی ءَ تاوان رس اتگ-

یک جتائیں دابے ءِ اُرش ءَ گوستگیں شپ ءَ کچھی ءِ ھند ءَ ڈھاڈر ءَ بی ایل اے ءِ سرمچاراں قلم دین چوک ءَ زورگرین پوج ءِ یک چوکی ءِ سر ءَ دزبمبے چگل داتگ تراک ءَ چہ چوکی ءِ تہ ءَ جاڑیگین دو کارندہ زدگ بیتگ اَنت-

ھمے وڑ ءَ سرمچاراں کلات ءِ دمگ منگچر ءَ زورگرین پوج ءِ یک گشتی ٹولی ءِ گاڑی آئی ای ڈی اُرشے ءِ نشانگ کتگ ءُ بازیں کارندھے یے زدگ کنگ ءَ سوبمند بیتگ اَنت-

پنجگور ءَ دشمنیں وتگڑیں جشن آجوئی ءِ مراگش ءِ برجم داروکیں ڈسٹرکٹ کمشنر ءِ بنجل ءِ سر ءَ ھما وھد ءَ دزبمبے چگل داتگ کہ آ اود ءَ جاڑیگ بیتگ تراک ءِ آسر ءَ آئی پھازوک زدگ بیتگ بی ایل اے ڈی سی ءُ ڈی پی او ءُ بیھار دنت کہ آ بلوچ بگیرداری ءِ پرکاریاں یکر بہ بیت اگاں ناں گڑا گیش اُرش کنگ بنت-

پنجگور ءِ دمگ گوران ءَ پیری ءِ ھند ءَ سرمچاراں زورگریں پوج ءِ یک پوسٹے ءِ سر ءَ گرنیڈ لانچر ءُ دگہ سلاھاں اُرش کرتگ ءُ سَے کارندہ زدگ کتگ اَنت-

ھمے وڑ ءَ کیچ ءِ دمگ گورکوپ ءَ بی ایل اے ءِ سرمچاراں زورگریں پوج ءِ یک چیک پوسٹے ءِ سر ءَ ترندیں اُرشے کرتگ ءُ چریشی ءَ دشمنیں پوج ءِ یک کارندھے مرتگ ءُ باز زدگ کرتگ اَنت-

کیچ ءِ دمگ تمپ رود بن ءَ سرمچاراں زورگریں پوج ءِ یک پوسٹے ءِ سر ءَ دزبمبے چگل داتگ ءُ دو کارندہ زدگ کتگ اَنت-

جارکش جیئند بلوچ ءَ گشتگ بلوچ لبریشن آرمی اے دراھیں اُرشانی زمہ واریاں منّ ایت – دشمن ءِ وتگڑیں آجوئی ءِ وھد ءَ زورگریں پوج ءِ ترندی اُرشانی مول ءُ مراد ایش اِنت اے کلوہ سر کنگی اِنت دشمن ءِ وتگڑیں روچ ءَ بلوچ راج ءَ گوں ھچ سیادی نیست اِنت پاکستان ءَ مئے یکیں سیادی اِنت زورگر ءُ زیردستی اِنت – زورگریں پوج ءِ سر ءَ مئے ھما وھد ءَ داں برجاہ بنت دانکہ دشمن وتی زورگری ءِ یلو کنگ ءَ لاچار نہ بیت اِنت-